Dios häpe N'okalelhthayajwo tä Lhamya
1Dios, olhamel owo graciasa,
owo graciasa amej.
Olhamel owo eya wet oyen teneka
m'ayhay tä ischehen tä lhenlhi.
2Wet Dios yok, “Lewhäy tä ohuminche,
owohiyela okalelhthayaj tä is alhoho.
3Wet chik w'ahulhi honhat
lhäy'e m'ayhay tä ihi,
olham t'at tä otsoklhi lefwetes.
4Wet ofwenho wichi tä lhainuhatpe iyhäj
wet oyok, Yej alechäjwethä.
5Yej alechäjejlhi akhajyhayaj,
wet yej tektshanejlhi ämtes tä lewoye.”
6Tsi n'okalelhthayaj tä is alhoho
tälhiyet'a tä ifwala tälhche
wok lhip tä ifwala y'uy,
wet tek tälhe ts'anis,
wet tälhiyet'a chenhas tä tumej tä tafwojhiye.
7Mat Dios häpe N'okalelhthayajwo,
wet y'ayhatchä iyhäj wet ineyhatphä iyhäj.
8Lhawuk ichäjilhi takwey
häp n'olhäthi tä lewäk ihi,
tet iwoye hat'es tä õ'kasowek
wet hin'o w'oknajej.
Wet chik Lhawuk itsäyhla hat'estso,
nilhokhiyeja wichi tä ni'isa tä ihi honhat
lhamel iyähiyeja pajla'tha y'im.
9Olham olehiyejt'ala tä oyen silätyaja Jacob laka Dios,
wet owunthiyeja otenkay,
10häp tä lham itäyhthila
m'ak tä wichi tä ni'isahen lhaichäjejwethä,
mat y'isiyeja lhip lakhajyhayaj häp hin'o tä is.
