Hin'o yen lefwitajayaja Jerusalén tä wasi
1Dios, nämhen wichi tä tälhehen honhates
wet tiyäjo aka honhat.
Itotyenej m'ak tä ni'isa häp Haw'et tä Amajchet,
wet iwasthi Jerusalén.
2Wet lhamel ichunnhejen istiwin lhayis
lhäy'e itshätäy tä fwitses
häp akawos tä nileya amej.
3Wet lhamel lew'oyis tet iwoye inät
tä õ'tsäy tä ihi Jerusalén,
wet nehit katsik tajänch'oye lep'itseyhay.
4Wet wichi tä ihiche honhates
tä iwhäye olhamel oka honhat,
lhamel wuj tä iläkwethä olhamel
wet t'ischey n'oyejen tä owit'äyhyaj ihi.
5Iwuk, ¿atsihila ifwalak
leleyej tä leti n'oyejen awäk?
¿Wok hä lepes ihichet'ala
tä letawäkwäy n'oyehen?
6Chätyenpe awäk häp wichi tä ihiche honhates
tä lhamel nitäfwela amej,
lhäy'e laka niyatey tä niwoya eya.
7Tsi lhamel ilänhen aka wichi Israel
wet iwasthi honhat tä lew'et.
8Yej wo haya n'oyejen
m'ak tä ni'isa tä ochätilis iwoye p'ante.
Mat lhu wet ti n'oyejen
hap'altsenyaj tä nittäya,
tsi olhamel nemhit okhajyhayaj ihi.
9¡Dios tä olhamel Ofwayhthi, ch'ot n'oyehen!
¡Fwayhat n'ohen wet täyhat n'oyejen otes,
häpkhilek n'äl tä awujyaj ihi!
10Tsi t'uhawethiyejt'ak
wichi tä ihiche honhates yok:
“¿Chip ihi aka Dios?”
¡Dios, päyen n'oyehen tä lewo hayahlä
lhamel tä ilänhen akawos!
11Ch'ahuye lelhakli häp wichi
tä õ'chäje honhat tä kalew'eta.
Fwayhthen häp tä isej akhajyhayaj tä wuj
häp lhamel tä õt'uhläk õ'länhen.
12¡Iwuk, wo hayahlä siete veces
häp wichi tä ailäkwlhi
tä laka honhates iwhäye olhamel oka honhat!
13Wet olhamel tä ohäpe aka wichi
wet ohäpehen aläy tson'atas,
wet lepes ihichet'ala tä owopej graciasa amej.
Otenhipeja otenkay tä owunit ame
yämthilek tiyäj'attsiy.
