Salmo|Sal 83

₁¡Dios, yej lhok tam!

¡Nephä wet woye ämet!

₂Lhek yahin atayhfwas,

häp wichi tä n'äyi amho.

Lhamel t'änwethä wet tatay ahilä.

₃Wuj tä ni'isa m'ayhay

tä t'uhläk iwoyeje aka wichi,

häp wichi tä am let'uyehen.

₄Lhamel yok, “Mäh n'atäyhthen Israel lhayis,

yämthilek nofwej wet tatäy lhey.”

₅Hit'unhatche lhämet tä tatay ahilä

wet y'ajejwek letichunhayajtso.

₆Wet lhamel tä lhaihutchewek

tälhe Edom lhäy'e Moab,

lhäy'e wichi tä Ismael lhayis,

Agar lhayis,

₇lhäy'e wichi tä tälhe Gebal lhäy'e Amón,

lhäy'e Amalek lhayis, Filisteo lhayis,

lhäy'e wichi tä ihi Tiro.

₈Wet Asirio lhayis tä lhaip'ajtej lhamel,

wuj tä tach'ote Amón lhayis lhäy'e Moab lhayis,

tä häpehen lhamel tä tälhe letes p'ante Lot.

₉Dios, woyeje wichitso

m'ak tä lewoyeje p'ante Madián lhayis,

wok häp m'ak tä lewoyeje p'ante Sísara,

wok häp m'ak tä lewoyeje p'ante Jabín

tä iwhäye tewok Kisón.,

₁₀Letäyhthen tä ihi Endor,

wet lhen at häpeya m'ak tä õ'kasoyej honhat.

₁₁Wet laka hin'ol tä len'ohyajay ihiche,

woyeje m'ak tä lewoyeje p'ante

hin'ol tä lheyis Tsetwo lhäy'e M'awotaj.

Wet lhamel laka niyatey,

woyeje m'ak p'ante lewoyeje Zeba lhäy'e Salmuna,

₁₂häp lhamel tä t'uhläk lhayen lewuka

häp honhates tä wuj itshätäy lhäk tä ihi tä Lewuk Dios.

₁₃Ika Dios, tech'aynej hal'ä tälhes

tä yafwthitaj nichätho.

Tech'aynej hal'ä w'oley tä tamchäy

tä yafwthitaj ichäj.

₁₄Mälhyej tä itäj hip'o tayhi wet noj t'at,

₁₅länejen pelhay tä äytesiche,

yämthilek yafwthitaj tä äytaji ichäj lhamel.

₁₆Iwuk, is che len'äfwlhatwethä lhamel

yämthilek iho ame.

₁₇Is che lajit lepesa tä wichi itiyej leläkwyhanyaj,

häpkhilek n'äfwelhen wet y'inhen.

₁₈Is che lhamel ihanej

tä ts'ilak am Dios, ihichet'a elh,

wet ahäpe N'owujtaj tä niyatej imälhewek honhat.