LIBRO 4
Dios tä n'ilataj wet hin'o tä nit'una
1Iwuk, ahäpe olhamel oletnhawet,
tälhe tä nech'enyaya
pajla'tha nichäte lepes lheley.
2Tälhe tä kamaj newache chenhas
wet kamaj ka'enalhi honhat,
tälhe t'at tä nech'enyaya
pajla'tha nichäte lepes,
ahäpe t'at Dios.
3Wet lehanej at lewoyneje tä lhachajo
tä lhen at honhat moka hin'o tä lhok:
“¡Is chik yachajo tä ahäpehen t'at honhat mok,
amel tä wichi!”
4Tsi häpet am, mil nekchämis
hätet chik ifwala weihalha, pitajit'a,
wet hätet iwoye tä honatsi wet ifwala.
5Hätet iwoye inät tä wuj tä iläfwelche,
wet ichäj hin'ol wet nemhit ichehen,
hätet iwoye n'ofwilhek.
6Lhamel hätet iwoye hal'ä tälhes
tä inuphä tä nech'e fwala,
mat tä honaj tamchäy t'at
tä ifwala hip'o, wet y'il.
7Matche tä tanhoch'ay awäk
pajtha ihämit olhamel.
8Lew'en t'at olhamel och'isukyajay,
lhäy'e m'ak tä ni'isa tä ofwetaj oweskatej tä owoye.
9Matche t'at tä awäk ihämit olhamel ow'atshancheyaj.
Tajyäme t'at nekchämis tä olhamel oihi,
hätet iwoyek oyalh iwomphä.
10Tajlhamat setenta nekchämis wet lepes,
wet elhpej tä takhajay
tajlhamat ochenta nekchämis wet lepes.
Wet tej tä olhamel okäswethä lhamejen tä oläyhen,
mat tajlhamat olhaklis lhäy'e ochumyaj tä in'oyejen.
Nekchämis yofwajkwet tajyäme,
wet olhamel nemhit oichehen.
11¿Atsi tä ihanej awäk lakhajyhayaj
yämthilek tach'ahu ame?
12Chufwen n'oyejen yämthilek ot'amaj lhamejen
häp ifwalas tä oläyhen,
häpkhilek ohusey lehanyaj ihi.
13¡Iwuk, tapil n'oyehen!
¡Yej alepanitlä!
¡P'altsenhen akawosna!
14W'en n'ohohen ahumnhayaj tä wuj tä nech'e fwalapej,
häpkhilek okäjyaj ihi wet otenla otenkay
nilhokej ifwalas tä oläyhen.
15Äm pitaj nekchämis tä okäjyaj ihi,
tech'aynej t'at tä pitaj nekchämis
tä olhaklis in'oyejen.
16Is chik olhamel tä akawos n'ohen
ow'en achumtes lhäy'e awujyaj,
pajla'tha nichäte oles tä lepes lheley.
17Is chik Lhawuk Dios lakäpfwayaj in'amejen,
wet is chik takäpfwaye lhachumtes.
Matche, is chik takäpfwaye lhachumtes.
