Salmo|Sal 96

₁Nilhokej wichi, amel tä lhe'pe honhat,

tenay atenek tä nech'ayek

tä lewujyenay Lhawuk.

₂Wunitay häp lham,

en asilätyaja nilhokej ifwalas

häp wichi lefwayhyaj tä iwoyeje.

₃Fwenho nilhokej wichi tä i'pe honhat

häp lham lewujyaj,

lhäy'e m'ayhay tä iwoye tä wichi t'iseltejen.

₄Tsi Lhawuk häpe N'owujtaj tä Lhamya

wet t'uhawetej chik õ'tiyej lewujyaj.

Is chik wichi itiyej lenowayhyaj,

tsi inu'pe dios lhayis.

₅Laha ihihit'a wichi iyhäj laka dios lhayis,

mat Lhawuk häp tä lhenek pule.

₆Lhawuk lewujyaj tä isi iyej t'at,

wet lakhajyhayaj lhäy'e lesilatyaj

ihi t'at Lew'et tä T'amajchet.

₇Nilhokej wichi, amel tä lhe'pe honhat,

wunitay Lhawuk.

Wunitay lakhajyhayaj lhäy'e lewujyaj.

₈Wujyenay tsi t'uhawetej t'at häp lham.

Häne m'ak tä lhen t'awayhata

tä lehoho Lewukwe ka'alhos.

₉N'okwiyej Lhawuk tä ihi

lesilatyaj tä t'amajchet.

Is chik nilhokej wichi

itiyej lenowayhyaj häp lham.

₁₀Fwenho wichi tä i'pe honhat, okwe:

“¡Lhawuk häpe Rey!”

Lham hit'unthi honhat wet ihit tä ihi,

wet itiyej lakalelhthayaj tä is alhoho

nilhokej wichi tä i'pe honhat.

₁₁Is chik pule lhäy'e honhat iwo lakäjyaja.

Is chik lewomekitaj iwo lepaka,

lhäy'e m'ayhay tä ihi.

₁₂Is chik yachuyaj lew'et iwo lakäjyaja,

lhäy'e yachuyaj lhay tä ihi.

Is chik hal'äy tä ihi tayhi

t'änwethä tä lakäjyaj ihi

₁₃tä ihi tä tatache häp Lhawuk tä nek.

Matche, lham nek yämthilek lhayen Niyatayej honhat,

wet lhayenla Niyatayej wichi,

wet yenla lakalelhthayaja m'ak tä is alhoho

lhäy'e m'ak tä matche.