Salmo|Sal 98

₁Tenay atenek tä nech'ayek

tä len'okwiyej Lhawuk,

tsi lham yenlhi m'ayhay

tä wichi wuj tä iseltejen.

Ikalhi letayhfwas häp tä isej lakhajyhayaj tä wuj

lhäy'e takwey tä t'amajchet.

₂Lhawuk hin'älit t'at tä ikalhi letayhfwas,

wet nilhokej wichi tä i'pe honhat hiw'en t'at

tä is alhoho m'ak tä iwoye

tä ifwayhthen häp lham laka wichi.

₃Lhawuk nitichunejch'oye

lehumnhayaj tä nittäya lhäy'e t'ifwtihyaj

tä itiyej Israel lhayis.

Wet nilhokpe honhat tä wichi hiw'en t'at lhaka Dios

tä ikalhi letayhfwas

wet ifwayhthen häp lham laka wichi.

₄Tenay atenkay tä lewoyay akäjyajayej Dios,

häp amel tä lhe'pe honhat.

Choywethä, fwitsenej achoslis

tä lewunit Lhawuk.

₅Chuma arpa tä leten atenkay tä len'okwiyej Lhawuk,

lhäy'e iyhäj m'ayhay lepak tä lewujyenej.

₆Afwutchehen trompetas lhäy'e tson'ataj ch'ul,

choywethä tä lewunit Lhawuk tä lhaka Niyat.

₇Is chik lewomekitaj iwo lechosa,

lhäy'e m'ayhay tä ihi.

Is chik honhat iwo lepaka,

lhäy'e wichi tä ihi.

₈Is chik tewok lhayis iwunit Dios,

wet häte chenhas is chik

lhaip'ajtitwek tä lakäjyaj ihi

₉tä ihi tä Lhawuk tatache.

Tsi lham nek yämthilek lhayen Niyatayej honhat,

wet lhayenla Niyatayej wichi

wet yenla lakalelhthayaja m'ak tä is alhoho.