Dios itiyej letasnhayaj hupuy tä Babilonia tä hätet iwoye atsinha tä kain'oyaj länek
1Häp siete ángeles tä ichäjwethä siete n'olhäthis, elh iho n'oye wet yok:
–Lhuu, opäynhila ame n'otasnhayaj tä wuj tä Dios itihiyeja atsinha tä kain'oyaj länek tä lhamya tä tatayphä'pe wujpe inät lhayis. 2Häp niyatey tä i'pe honhat iwo lakain'oyajayej häp lham, wet wichi tä i'pe honhat w'oknhasejwethä lakain'oyaj tä tälhe.
3Wet tä oihi t'at Espíritu tä Dios T'amajchet lakhajyhayaj, ángeltso ihän n'oye honhat tä ts'anis. Tä onchäte, ow'en m'akitaj tä ichät, lhethey ihi siete wet lech'ul ihi diez, wet hip'oyej letape n'olheyes tä leläkwyhanyaj tä iyeteje Dios. Wet iche atsinha tä yen lew'uteya, 4lew'uy ifwak'an lhäy'e tä ichät, wet lhaisilatyenej oro lhäy'e lhamsilis tä häpe tuntey tä isis tä wuj laha. Wet ichäjlhi n'olhäthi tä oro tä tapoyejej m'ayhay tä hich'atej tä ni'isa lhäy'e tä kok'aye tä tälho lakain'oyajay. 5Wet n'olesaynek iyej letacho, wet wichi ihanej tä yahyen mat ihanhiyejt'a m'ak tä häpe. N'olesaynektso yok, OHÄPE BABILONIA TÄ LHAMYA, KAIN'OYAJ LÄNHAY LAKO, LHÄY'E M'AYHAY TÄ HICH'ATEJ TÄ NI'ISA TÄ I'PE HONHAT.
6Wet ow'en tä atsinhana w'oknajej t'at Dios laka wichi lew'oyis, lhäy'e lhamel tä õ'länhenpe tä yen lhämeta Jesús. Tä ow'en, lhäy'e lhip tä oseltej. 7Wet ángel tahuy n'oyej wet yok:
–¿Chipte tä leseltej? Ofwenla amho m'ak tä häpe atsinhana lhäy'e m'akitaj tä lhethey ihi siete wet lech'ul ihi diez tä tilhäj lham. 8Häpet m'akitaj tä lew'en, häpe m'ak tä iche p'ante mat athana nemhit iche. Matkat inuhiphäla tä tälho chowej tä najit lech'oye tä n'oteläythayajw'et, wet äp tiyäjiyela letäyhyaj tä lepes wet nofwila. Wet wichi tä ihi honhat tä lheyes newahi häp n'olesaynekhi tä wichi tä ikatej lew'atshancheyaj tä t'un lheyes ihi, tälhe täjp'ante Dios yenlhi m'ayhay, lhamel iselthiyejena chik hiw'en m'akitajtso tä iche p'ante, mat athana nemhit iche, mat yachajihola chik näm.
9Wet ángel äp yok:
–Lhek yahinya, iwatläk elh chik lehanyaj ihi itichunche täja. Häpet siete lhethey, häpe t'at siete chenhas tä atsinhatso i'pe, wet äpte häpe siete niyatey. 10Cinco lhamel nemhit ihi leniyatyaj, elh iche t'at, wet elh kamaj nämhit'a. Mat chik näm, pitajit'ala len'äyij. 11Wet häpet m'akitaj tä iche p'ante mat athana nemhit iche, häpe niyat tä ocho. Mat häpe t'at siete lhamel elh, wet äp tiyäje t'at letäyhyaj tä lepes wet nofwila.
12“Wet häp diez lech'ul tä lew'en, häpe diez niyatey tä kamaj leniyatyajay ihiyejt'a. Mat lhamel lhäy'e m'akitajtso ihihila hora tefwajni chik niyathiyejena wichi. 13Wet diez niyateytso y'ajwek letichunhayajay wet hiw'enhihola lakhajyhayaj lhäy'e len'ohyaj häp m'akitajtso. 14Wet lhamel iwohla laka'tshayajayej Tson'ataj Lhäs. Mat Tson'ataj Lhäs lhäy'e wichi tä afwtintses tä Dios pajche tatshupiye lhäy'e tä t'äne, lhamel ikalhihila, tsi Tson'ataj Lhäs häpe N'owuk tä Matche wet äp Niyat tä Lhamya.”
15Wet ángel äp y'isej tä yok:
–Häp inät lhayis tä lew'enne tä atsinha tä kain'oyaj länek tatayphä'pe, häpehen wichi tä ihiche honhates, lhamel tä wujpey tä w'enha lhamejen lhäy'e tä lhämtes w'enhahiche. 16Wet häp m'akitaj lhäy'e lech'ul tä diez tä lew'enne, lhamel n'äyihihola atsinhatso wet isohiyeja nilhokej m'ak tä iyej pajla'tha ts'ilakche, wet tufwila t'isan, wet iwunhihola. 17Tsi Dios itihi lhamel lehusey häp m'ak tä lham lenech'ethayaj yämthilek iwoye, wet häp tä tamenej tä lhamel yok, “¡Mäh n'aw'enho lhaniyatyajay häp m'akitaj!” Wet mälhhiyejattso pajla'tha wak'alh m'ak tä Dios yäme. 18Wet häp atsinha tä lew'enne häpe t'at hupuy tä lhamya tä yen lakawosa niyatey tä i'pe honhat.
