Lhamel tä ipuleye akäswethä tä tatäy Babilonia
1Tä tajyäme täjtso, oläte m'ak tä hätet wichik wujpey lepak tä äytaji tä tum puleye tä yok:
“¡Aleluya!
¡Lhaka Dios häpe t'at N'ofwayhthi!
¡Matche tä lakhajyhayaj ihi,
lhäy'e lewujyaj tä isi!
2Is alhoho lakalelhthayaj
tä iwoye wet matche t'at,
tsi itiyej letasnhayaj atsinha
tä kain'oyaj länek tä lhamya
tä honhat kok'ayeje lemukwehyajay,
wet iwo lahayayej tä lham ilänhen Dios lakawos.”
3Wet lhamel äp yachajo tä yok:
“¡Aleluya!
¡Tutsaj tä tälhoni inuphä yämlek tiyäj'attsiy!”
4Wet häp veinticuatro hin'ol tä lhamenya, lhäy'e cuatro m'ayhay tä wujpe tatelhoy, takhosche katsi wet n'okwiyej Dios tä tatayphä'pe leniyatyaj, wet yok:
–¡Amén! ¡Aleluya!
5Wet nech'e oläte n'opak tä tumho Dios niyatyaj tä yok:
“¡Wunit lhaka Dios, nilhokej amel,
wichi tä len'ohyajay ihiche
lhäy'e iyhäj tä laj len'ohyaja,
häp amel tä letach'ote wet lewoye lhämtes!”
Õ'wo n'okäjyaja'pe Tson'ataj Lhäs whayyhayaj
6Wet nech'e oläte m'ak tä hätet wichik wujpey lechos, wet mälhyej iwoye inät lepak tä nitsäyhchä tä tälhpe chenaj, wet hätet iwoye pelhay tä t'ajanlhi. Wet yok:
“¡Aleluya!
¡Lhawuk Dios tä najit letumfwaya lhayen Niyata!
7¡N'awo lhakäjyaja, n'äm wuj lhakäjyaj
wet n'atiyej lewujyaj!
¡Tsi nichäte lewhäy tä Tson'ataj Lhäs
mälhyet hin'ok tawhayey!
Wak'alh t'at lech'efwa
8wet Dios ifwenho tä yok:
Lhek w'uyhi wesaj tä ipelaj
tä najit lech'ohleya lhäy'e tä isi.
Tsi häpe t'at achumyajay tä isen
tä lewoye tä ahäpe oka wichi.”
9Wet ángel tahuy n'oyej wet yok:
–Lesayen täja: Dios lakäpfwayaj tä is iyej lhamel tä lham t'äneje Tson'ataj Lhäs lakäjyaj tä mälhyet hin'ok tawhayey.
Wet y'isej tä yok:
–Häp tähestso Dios lhämtes tä matchehen.
10Wet otkhoswhäye lepach'ol häp ángeltso yämthilek on'okwiyej. Mat lham yok:
–¡Yej woyej n'oye täja! Tsi ohäpe Dios lakawo t'at, mälhyej iwoye am lhäy'e apuhfwas, häp wichi tä nileyayej Jesús lhämet. Mat ofwel amho tä oyok, N'okwiyej häp Dios. Tsi elh tä Jesús lhämet iyej, häpe t'at profeta wet yen at silätyaja m'ak tä tälhe Dios.
Hin'o tä i'pe yel'ataj tä ipelaj
11Wet nech'e ow'en pule tä tafwoche, wet n'äl yel'ataj tä ipelaj, wet hin'o tä i'pe lhey Matche wet Afwtintsaj, tsi is alhoho lakalelhthayaj lhäy'e laka'tshayaj tä iwoye. 12Tatelhoy hätet iwoye itäj lhal tä y'uho, wet wujpe corona lhayis tä i'pe lhetek. Wet iche lhey tä õ'lesayen tä iyej tä nehit katsik ihanej, ts'ilak lham tä ihanej. 13Wet lew'uy õ'pakej w'oyis, wet lhey häpe t'at Dios Lhämet. 14Wet häp nifwotas tä ipuleye tä lew'uyis wesas tä ipelas wet najit lech'ohleya, lhamel iche'pe yel'atas tä ipelas tä yikche häp lham. 15Wet lefwajnhat tä y'uy tälhche lak'aj, yämthilek itshänhen wichi tä ihiche honhates, wet lham niyathiyejena lhamel häp tä isej lakhajyhayaj tä wuj. Wet lakalelhthayaj hätehlat iwoye hin'o tä t'äsiche uvas, tsi häp tä iyäynhiyejena hat'es tä häpe Dios tä najit letumfwaya lewäk tä lhäy'e lhip tä äytaji. 16Wet n'olesaynek i'pe lew'uy lhäy'e lheche tä yok, NIYAT TÄ LHAMYA WET ÄP N'OWUK TÄ MATCHE.
17Wet ow'en ángel tä takasit tä ihi ifwala, wet ifwitsenej tä t'än tä yok:
–¡Afwenchey tä n'okotses tä ihi pule chowej, lhuyay, ahutayejwek äk tä wuj tä Dios hiw'en amhohen! 18¡Tufway häp honhat kaniyatey p'itseyhay, lhäy'e sip'äl kaniyatey, lhäy'e hin'ol tä takhajayhen, lhäy'e yel'atas lhäy'e hin'ol tä iche'pe, lhäy'e nilhokej wichi p'itseyhay, häp lhamel tä n'okwenkay lhäy'e iyhäj tä kahäpeya, häp wichi tä len'ohyajay ihiche lhäy'e iyhäj tä laj len'ohyaja!
19Wet ow'en häp m'akitaj tä pajche tälho lewomekitaj, lhäy'e niyatey tä i'pe honhat, lhäy'e laka nifwotas, tä lhamel pajche lhaihutwekhen tä t'uhläk iwo ka'tshayajayej häp hin'o tä i'pe yel'ataj tä ipelaj, lhäy'e laka nifwotas. 20Mat nech'e õ'tsoklhi häp m'akitajtso, lhäy'e laka profeta tä kamatache tä yenlhipej letetnhay tä ihi tä lham itayche. Häp letetnhaytso iselkatejenpej wichi wet ikanejen lhamel tä tachumlä m'akitaj letetnek tä õ'tiyej letacho wok takwey wet n'okwiyej häp lepeyak. Wet nech'e m'akitaj lhäy'e profeta tä kamatache, õ'mälhyet iläyej tä õ'thate itäj tä hätet iwoye lewomekitaj tä azufre y'uho tä ihi. 21Wet iyhäj, häp lefwajnhat tä tälhche lak'aj hin'o tä i'pe yel'ataj tä ipelaj, häp tä ilänhen, wet nilhokej afwenchey tä n'okotses yipsejen lhamel lep'itseyhay.
