Apoc 22

₁Wet ángel ipäyen n'oye tewok tä häpe inät tä n'ow'atshancheyaj, tä tälhe Dios lhäy'e Tson'ataj Lhäs niyatyaj, isi hätet iwoye vidrio, ₂wet inukwe hupuy kawayhi tä lhamya. Wet hal'ä tä n'ow'atshancheyaj ihi tewok lhipey, wet nekchämpej, wel'apej, iwo lhaya pajtha doce wel'as. Wet wichi tä ihiche honhates isej lew'oley wet ichesen. ₃Wet nemla iche m'ak at chik häpe chik Dios itiyej lewit'äyhyaj. Häp Dios lhäy'e Tson'ataj Lhäs lhamel leniyatyaj ihihila hupuyna, wet lakawos n'okwihiyeja Dios. ₄Wet tatey hiw'enla, wet lham lhey ihichela'pe letachol. ₅Wet nemla iche honatsi, wet lhamel tek iwatlahlä lechäkw yämlek ihutunpe, wok fwala, tsi lhamel laka isi häpkhila t'at Lhawuk Dios, wet lhamel niyateyla yämlek tiyäj'attsiy.

₆Wet ángel tahuy n'oyej wet yok:

–N'olhämtesna matchehen t'at wet t'uhawetej chik wichi t'ekhaye. Häp Lhawuk Dios tä yämyenwethä profetas, ichen laka ángel yämlek ipäyne lakawos häp m'ak tä ihichelat thahya. ₇Wet yok, Onämlat thahya. Okäpfwayaj tä is iyej elh chik iwoye olhämtes tä ihi lehina.

₈Olham Juan ohäpe elh tä iläte lhäy'e tä hiw'en m'ayhayna. Tä tajyäme tä oläte lhäy'e tä ow'en, otkhoswhäye lepach'ol häp ángel tä ipäyen n'oye, tä ot'uhläk on'okwiyej. ₉Mat lham yok:

–¡Yej woyej n'oye täja! Tsi ohäpe Dios lakawo t'at, mälhyej iwoye am lhäy'e apuhfwas profetas, lhäy'e nilhokej lhamel tä iwoye Dios lhämtes tä ihi lehina. Mat ofwel amho tä oyok, N'okwiyej häp Dios.

₁₀Häte yok:

–Yej lhen askalheka Dios lhämtes tä ihi lehina, mat n'älit, tsi tott'a alhoho lewhäy. ₁₁Ch'anlhaye elh tä ni'isa tä tujlhache t'at m'ak tä ni'isa tä iwoye, wet elh tä kok'aye, tujlhache t'at, wet elh tä is, tujlhache t'at tä iwoye m'ak tä is, wet elh tä lhayen t'amajchetayej Dios, tujlhache t'at.

₁₂Jesús yok:

–Lhek yahinya, onämlat thahya, wet ow'enhihola elhpej laha tä w'awulho m'ak tä iwoye. ₁₃Ohäpe Elh tä ichun, wet äp ohäpe Elh tä ilepese. Ohäpe Elh tä nech'enyaya wet yämlek tiyäj'attsiy.

₁₄Dios lakäpfwayaj tä is iyej lhamel tä ilej lew'uyis, häpkhilek Dios iwahnej chik tufw lhay tä ihi hal'ä tä n'ow'atshancheyaj, wet ikalhi chik tiyäjche lepelis häp hupuy tä Dios t'amajchet. ₁₅Mat häp lhamel tä hich'atej lakeyes imälhehila alhoye, lhäy'e wichi tä lhayen hiyawula, lhäy'e lhamel tä iwoye lakain'oyaj, lhäy'e n'olhikoyis, lhäy'e iyhäj tä n'okwiyej dios tä n'otkwey lhenhay, lhäy'e nilhokej lhamel tä ihumin tä ikanejen iyhäj.

₁₆“Olham Jesús ochen amehen oka ángel yämlek iwo siläta amejen m'ayhayna, wet lhenay asilätyajayej Dios leles. Otälhe David, ohäpe t'at leles tä lepes lhele elh. Wet ohäpe kates lhokwetaj tä isi tä nech'e fwala.”

₁₇Häp Espíritu tä Dios T'amajchet, lhäy'e Dios leles tä õ'tech'aynej atsinha tä iyej Tson'ataj Lhäs, lhamel yok:

–¡Lhuu!

Elh chik iläte, häte is chik äp yok:

–¡Lhuu!

Wet elh chik ichim, chik iwatlä, neke inät tä n'ow'atshancheyaj wet iyäyej, t'awayhat t'at.

₁₈Nilhokej lhamel tä iläte Dios lhämet tä ihi lehina, ofwenho lhamel, oyok, Chik iche elh tä y'isej m'ak chik häpe tähesna, Dios ichätyenla'pe n'owit'äyhyajay tä oyäme tä ihi lehina. ₁₉Wet chik iche elh tä isoyej lhip häp Dios lhämet tä ihi lehina, Dios isohiyeja m'ayhay tä isen tä oyäme tä ihi lehina. N'äyhiyejola hal'ä tä n'ow'atshancheyaj, wet yenhit'ala lew'eta hupuy tä Dios t'amajchet.

₂₀Elh tä yen silätyaja tähestso yokwe:

–Matche, onämlat thahya.

Amén. ¡Lhuu, Iwuk Jesús!

₂₁Is chik Lhawuk Jesús lep'altsenyaj iyej nilhokej Dios leles.