Pablo ichene len'okhayaj häp Dios leles tä ihi Roma
1-2Häpet atsinha Febe tä lhapuhfwayej Lhawuk, oyok, chumayhlä, mälhyej m'ak tä t'uhawetej che Dios leles iwoyej lhamehen. Tsi lham häpe t'at elh tä wuj tä tach'otehen Dios laka wichi tä ihi hupuy tä Cencreas. Ch'oteje t'at m'ak che häpe che iwatlä, tsi mälhyej tä oyäme, lham tach'otehen wujpe iyhäj, lhäy'e olham wuj tä tach'ot n'oye.
3Ochene on'okhayaj häp Prisca lhäy'e Aquila, häp och'otfwasej Cristo Jesús. 4Lhamel nowayhit'a letapehen yämthilek ifwayhat n'oyej owit'äyhyaj. Wet ts'ilakhit'a olham tä owo graciasayej lhamel, mat häte nilhokej iyhäj Dios leles tä kahäpeya Judío lhayis. 5Häte ochene on'okhayaj lhapuhfwas tä lhaihuthipejwek Prisca lhäy'e Aquila lew'et.
Ochene on'okhayaj Epeneto, opuhfwa tä ohumnek, häp lham tä ichun tä ihi Asia tä ichaye Cristo. 6Ochene on'okhayaj María, häp lham tä wuj tä tachumlhi tä tach'ot amehen. 7Ochene on'okhayaj Andrónico lhäy'e Junias, lhamel tä oka honhat lheley. Lhamel häpehen otan'isfwas tä oihihte n'op'onthi, wet kalelhäjen tä iyej apóstoles. Lhamel lhayachajehte Cristo tä kamaj olham n'am wo ohusek elha.
8Ochene on'okhayaj Ampliato, häp elh tä ohumnek tä opuhfwayej Lhawuk. 9Ochene on'okhayaj häp Urbano tä häpe lhach'otfwayej Cristo, lhäy'e elh tä ohumnek Estaquis. 10Ochene on'okhayaj Apeles, häp lham tä hin'älit tä matche tä ihänlhi Cristo. Häte ochene on'okhayaj Aristóbulo lew'et lheley, 11lhäy'e oka honhat lhele Herodión, lhäy'e Narciso lew'et lheley tä hip'akej Lhawuk.
12Ochene on'okhayaj Trifena lhäy'e Trifosa, häp atsinhay tä yen lechumeta Lhawuk lechumet. Häte lhapuhfwa Pérside, häp atsinha tä y'ahumin lhäy'e tä wuj tä tach'ote Lhawuk lechumet. 13Ochene on'okhayaj Rufo, häp lham tä kalelhäj tä lhaip'ajtej Lhawuk, lhäy'e lako, häp atsinha tä t'u n'oye mälhyej che lhäsn'o. 14Ochene on'okhayaj Asíncrito, Flegonte, Hermes, Patrobas, Hermas, lhäy'e iyhäj Dios laka wichi tä iyej lhamel. 15Häte ochene on'okhayaj Filólogo, Julia, Nereo lhäy'e lech'inhä, lhäy'e Olimpas, lhäy'e nilhokej Dios leles tä iyej lhamel.
16N'okwi amejen, tsufwel amejen tä lhen atetneka tä ahäpehen Dios leles. Nilhokej Dios laka wichi tä ihi lhip che häpe, ichen amehen len'okhayaj.
17Ipuhfwas, onityen amejen che alhämay hin'ohlä häp lhamel tä t'uhläk nemhit w'awulhchä atichunhayajay wet letanhäphänejlhi lechufwenyajay tä kahäpeya n'ochufwenyaj tä pajche i'amejen. Yej alet'ajaye 18tsi tach'othiyet'a Lhawuk Cristo, mat tach'ote lhamel t'akänyajay tä ni'isachehen. Wet lhämtes tä ni'äytesachehen lhäy'e tä akäschehen ikanejen wichi tä niwuja letäfwnhayaj. 19Nilhokej wichi ihanej tä amel lewoye t'at Lhawuk lhämet. Okäjyaj ihi tä mälhyejtso, mat ot'uhläk ahäpehen iyhäj tä lehusey ihi yämthilek letäfwelayej m'ak tä is wet tek alet'aje m'ak tä ni'isa. 20Wet häpkhilek yofwajkwet Dios tä n'otamsek tälhe hip'ajthilahchä Satanás wet ithatlachufwi apach'ol.
Is che Lhawuk Jesús lep'altsenyaj i'amejen.
21Häp och'otfwa Timoteo ichen amehen len'okhayaj, lhäy'e oka honhat lheley Lucio lhäy'e Jasón lhäy'e Sosípater.
22Olham Tercio tä olesayen Pablo laka cartana, häte ochen amehen on'okhayaj tä n'ahäpehen Lhawuk leles.
23Gayo häte ichen amehen len'okhayaj. Olham Pablo oiyej t'at lew'et, wet häpe t'at tä Dios leles lhaihuthipejwek. Häte Erasto tä häpe tesorero tä ihi hupuyna, lham ichen amehen len'okhayaj, lhäy'e lhapuhfwa Cuarto.
¡Is che lewujyaj iyej Dios!
25-27¡Is che lewujyaj iyej Dios yämthilek tiyäj'attsiy, häp tä isej Jesucristo! Tsi Dios tä ihanej iwoyneje tä aikhajyenej Lesilätyaj tä olham oyen lhämeta, tä häpe t'at häp lhämet tä yäme Jesucristo. Häp täja häpe m'ak tä matche tä Dios tä n'ilataj nin'älita p'ante, pitaj lewhäy tä mälhyejtso. Mat nech'e hin'älit t'at, häp tä isej laka profetas lesaynhay p'ante, wet wichi nitäfwelej t'at, tsi Dios ne'tek õ'wo silätayej lhamel tä ihi nilhokej honhates yämthilek ichaye wet iwoye lhämtes.
¡Is che lewujyaj iyej Dios tä ts'ilak lham tä lehanyaj ihi! Amén.
