Rom 5

₁Häp tä mälhyejtso, n'aisej t'at lhat'ekhahyaj wet Dios n'ahi'isyen, wet lhatamsek iyeji häp lham tä n'aisej Lhawuk Jesucristo. ₂Wet tä Cristo lham tamenej tä y'asakanho häp Dios lep'altsenyaj tä y'ehina, häp tä n'aisej lhat'ekhahyaj, wet y'en lhakäjyaja tä ihla n'amejen Dios lewujyaj tä isi tä y'anihihlä. ₃Mat tajlhamhiyet'a täjtso, mat häte n'akäsejwethä lhateläythayajay, tsi y'ahanej tä ichufwen n'amejen lhakhajyhayaj yämthilek y'akalhi. ₄Wet lhakhajyhayajna häp tä tamenej tä kalelhäj m'ak tä n'ahäpehen, wet tä n'akalelhäj, häp tä tamenej tä y'anihihlä m'ak tä lham hiw'enla n'amhohen. ₅Wet häpkhit'a che w'et lhanihayaj t'at, tsi Dios yäm tapokwe lehumnhayaj lhahusey, häp tä isej Espíritu tä T'amajchet tä lham yen lhatw'ayhata.

₆Tsi tä n'ahäpehen p'ante wichi tä kay'ahanayej y'awoyneje che y'alhaifwayhtejen lhach'isukyajay, häpe t'at lewhäytso tä Cristo y'ilpe wichi tä ni'isahen. ₇Oyok, atha che hin'o fwetaj lhaiwompe elh tä is alhoho - wok iche p'iya elh che lhaiwompe hin'o tä lehusek ihi. ₈Mat Dios hin'älit lehumnhayaj tä iti n'amejen, tsi tä kamaj n'ahäpehen iyhäj tä lhach'isukyajay in'amejen, Cristo y'il lhatapehen. ₉Wet athana tä nech'e Dios n'ahi'isyen häp tä isej Cristo tä y'il, wet matche tä y'atfwayhiyeja Dios lewäk. ₁₀Wet tä n'ahäpehen p'ante wichi tä tatayhlä Dios, mat n'aisej Lhäs Jesucristo tä y'il, wet n'ayen häpeya laka wichi tä letamsek iyeji häp lham. Wet athana tä nem y'en lhatayhfwaya, wet matche tä y'atfwayhihena häp tä n'aisej Lhäs Jesucristo tä iläy. ₁₁Mat tajlhamhiyet'a täjtso, mat häte lhakäjyaj iyej n'amhihen häp Dios, häp tä isej Lhawuk Jesucristo. Tsi häp lham Cristo tä tamenej tä lhatamsek iyeji Dios.

₁₂Iche hin'o tefwajni tamenej p'ante tä n'och'isukyaj ihi honhat, wet n'och'isukyajna iton alhoho n'ot'ilek, wet n'ot'ilek y'aje nilhokej wichi tsi nilhokej iwo lech'isukyaja. ₁₃Häp ifwalas p'antetso tä kamaj newache p'ante Ley tä tälhe Moisés, pajche n'och'isukyaj ihi t'at honhat, tej tä newache n'olhämet che yen tesayej elh tä iwoye lech'isukyaj. ₁₄Tsi tälhe lewhäy p'ante Adán ihi yäk nichäte lewhäy tä äp Moisés ihi p'ante, häp n'ot'ilek lhayen niyatayej nilhokej wichi, tej tä lech'isukyajay nihäteya iwoye Adán lech'isukyaj p'ante tä niwoyaye m'ak tä Dios ifwenho.

Adán mälhyet iwoye hin'o tä toyp'antehlä tä nämla tä häpe Cristo. ₁₅Mat Adán lemenyaj p'ante tek häte iwoye häp m'ak tä Dios hiw'en n'amhohen. Tsi lhek tetshan olhämet: hin'o tefwajni letes tamenej wujpey wichi tä y'inhen. Mat m'ak tä Dios hiw'en n'amhohen häp tä isej lep'altsenyaj tä iyej n'amhihen hin'o tefwajni Jesucristo, lhäy'e lhip tä inu'pe täjtso wet äp wujpey wichi tä isej.

₁₆Matche, hin'o tefwajnitso lech'isukyaj tek häte iwoye häp n'otw'ayhat tä tälhe Dios. Tsi n'och'isukyaj tefwajni p'ante tamenej tä Dios itiyej letes wichi. Mat n'otw'ayhat häpe t'at tä Dios itiyej kanhi wujpey n'och'isukyajay wet hi'isyenhen wichi.

₁₇Wet tä hin'o tefwajnitso letes tamenej tä n'ot'ilek niyatej mälhewek wichi tä ihonhatena, mat wichi tä Dios itiyej lep'altsenyaj tä yen t'awayhata wet äp hi'isyenhen, nemla koyhyaj tä lhamel niyatey tä ihi lew'atshancheyaj tä nech'ayek, häp tä isej hin'o tefwajni Jesucristo.

₁₈Mälhyejtso tä hin'o tefwajnitso Adán lech'isukyaj tä iwoye p'ante tamenej tä Dios itiyej letes nilhokej wichi. Häte häp m'ak tä is tä hin'o tefwajnitso Jesucristo iwoye p'ante tamenej tä Dios itäyhthen letes nilhokej wichi yämthilek lew'atshancheyaj ihi. ₁₉Wok oyok, tefwajni hin'o tä niwoyaye p'ante m'ak tä Dios ne'tek iwoye, wet tamenej tä wujpey wichi tä õyen n'och'isukyaj kwenkaya. Mat äp tefwajni hin'o tä iwoye p'ante m'ak tä Dios ne'tek iwoye, wet tamenej tä wujla'pey wichi che nem letes ihi.

₂₀Tä näm p'ante Ley tä tälhe Moisés, lhäy'e lhip n'och'isukyajay. Mat tä lhäy'e lhip n'och'isukyajay, Dios nem koyhyaj tä hin'älit lep'altsenyaj. ₂₁Wet häp tä mälhyejtso, tä n'och'isukyaj lhayen niyatayej wichi wet ichätyene n'ot'ilek, häte Dios lep'altsenyaj äp lhayen niyatayej lhamel wet ichätyene le'isyaj, häpkhilek nichätho lew'atshancheyaj tä t'un häp tä isej Jesucristo Lhawuk.