Rom 6

₁¿Chi y'awoye tä mälhyejtso? ¿Hä is p'iya chik y'atujlhache t'at lhasukyajay, häpkhilek lhäy'e lhip Dios lep'altsenyaj? ₂¡Kha! ¡Isit'a! Tsi n'ahäpehen t'at lep'itseyhay tä y'ehi tä n'osukyaj tatache. Tä mälhyejtso, ¿chip iwoye chik y'akalhi chik y'atujlhache lhasukyajay? ₃Wok ¿hä amel lep'ethatayhlä tä nilhokej n'amel tä y'alhaibautisaynej Cristo Jesús, y'alhaibautisaynej t'at häp lham t'ilek? ₄Tsi tä y'akatej bautismo, häte iwoye chik y'at'inhen t'at wet õtjän lhach'oyehen, häpkhilek y'anukwephä tä y'atälho lhap'itseyhay wet y'anukwe lhan'äyij tä nech'ayek. Mälhyej iwoye tä Cristo inuphä p'ante tä tälho n'op'itseyhay, häp tä isej Lajcha lakhajyhayaj tä wuj.

₅Tsi chik pajche y'alhaitan'istej Cristo tä y'at'inhen, mälhyej iwoye lham tä y'il, häte y'ap'akhiyeja t'at chik y'anuhikwephäla chik y'atälho lhap'itseyhay, mälhyej iwoye lham tä inuphä. ₆Y'ahanej tä lhaw'atshancheyaj wumek pajche hap'akej Cristo tä õhp'ajtej laka cruz, yämthilek lhanech'ethayajay tä ni'isachehen noj t'at lakhajyhayaj tä iyejen, wet nemhit n'ahäpehen n'osukyaj kwenkay. ₇Tsi elh tä pajche y'il, tafwayej t'at n'osukyaj lakhajyhayaj.

₈Wet chik y'ap'akej Cristo tä y'il, y'achaye tä häte y'ap'akhiyeja tä iläy. ₉Y'ahanej t'at tä Cristo pajche inuphä tä tälho n'op'itseyhay, wet nemla yachajo chik y'il. Häp n'ot'ilek nemhit ihanej iwoyneje chik ikalhi. ₁₀Tsi tä Cristo y'il, weihalhache t'at tä y'il tä ihi tä n'osukyaj tatache, wet tajlhama. Mat tä iläy, iläy yämthilek tach'ote t'at Dios. ₁₁Wet is chik mälhyejtso häp amel. Enay atichunhayaja tä ahäpehen lep'itseyhay tä lheyayhi tä n'osukyaj tatache, mat haw'atshancheyaj iyeji t'at Cristo Jesús yämthilek letach'ote Dios.

₁₂Tä mälhyejtso, yej tach'anlhaye chik n'osukyaj kamaj lhayen lewuka asanis tä nit'una wet inityen amehen anech'ethayajay tä ni'isahen yämthilek lewoye. ₁₃Yej lhachaje asanis häp n'osukyaj yämthilek ichumyene m'ak tä ni'isa, matkat a'achajaye häp Dios tä ahäpehen iyhäj tä pajche y'inhen tä ihi tä n'osukyaj tatache. Wet tä nech'e leläyhen athana, achajaye Dios asanis yämthilek ichumyene m'ak tä is. ₁₄Häpkhilek n'osukyaj nemhit lhayen niyata amejen, tsi nemhit lheyaychufwi lakhajyhayaj tä iyej Ley p'ante tälhe Moisés, matkat lheyaychufwi Dios lep'altsenyaj.

₁₅¿Chiwoye tä mälhyejtso? Tä n'amel nem y'echufwi lakhajyhayaj tä iyej Ley p'ante, ¿hä y'afwetaj is t'at chik y'awoye lhasukyajay, tsi y'ahanej tä y'echufwi Dios lep'altsenyaj? ¡Kha, isit'a! ₁₆Amel lehanej, chik lhen awuka elh chik häpe yämthilek ayen lakawosa, ahäpe t'at lakwenek awuktso tsi lewoye t'at lenech'ethayaj. Wet häp tä hätet iwoye täjtso, chik alhenay häpeya n'osukyaj kwenkay, ihän amehen häp ilek. Mat chik lewoyaye Dios lenech'ethayaj, wet aisichela alhoho.

₁₇Mat owo graciasayej Dios, tsi amel ifwalas tä pajche ahäpehen t'at n'osukyaj kwenkay, mat athana matche tä lewoyaye Dios lechufwenyaj tä letachumtehlä. ₁₈Letafwayej asukyajay wet alhenay m'ak tä is kwenkaya. ₁₉(M'ayhay tä oyäme otech'aynej t'at m'ak tä y'ahanej tä n'ahin'ol, tsi wujit'ak lehanayej m'ayhay tä oyämetso.) Wet oyämej amehen ifwalas tä pajche tä lhachajaye asanis häp anech'ethayajay tä kok'aye lhäy'e m'ak tä ni'isa, yämthilek lewoyaye t'at m'ak tä ni'isachehen. Mat athana oyok, achajayeje häp m'ak tä is, yämthilek matche tä ahäpehen t'at iyhäj tä Dios t'amajchetes.

₂₀Tsi tä ahäpehen p'ante n'osukyaj kwenkay, ahäpkhihent'a m'ak tä is lechumyenhay. ₂₁Mat ¿atsi p'ante m'ak tä lekalhihlä häp akeyes tä len'äfwelhpe athana wet äp ihän ame ilek? ₂₂Mat athana nemhit ahäpehen iyhäj tä n'osukyaj inayhitwethä, mat alhenay Dios lechumyenhaya. Häp täja m'ak tä aisej, tsi tälhe täjtso nech'e ahäpehen iyhäj tä isen wet äp Dios t'amajchetes, wet chik lepese lekatayej haw'atshancheyaj tä t'un. ₂₃Tsi m'ak tä y'akalhihlä lhasukyaj häpe t'at lhat'ilek. Mat m'ak tä Dios yen lhatw'ayhata häpe lhaw'atshancheyaj tä t'un, tä y'alhaip'ajtej häp Cristo Jesús Lhawuk.