Rom 8

₁Häp wichi tä hap'akej Cristo Jesús, kalelhäj letes ihichet'a. ₂Tsi Espíritu tä Dios T'amajchet lechumyaj tä iwo lhaw'atshancheyajayej Cristo Jesús, häp tä ifwayhat n'amejen n'osukyaj chumyaj lhäy'e n'ot'ilek. ₃Tsi tä n'ahin'ol t'at, häp tä tamenej tä Ley p'ante tälhe Moisés, lakhajyhayaj ihihit'a yämthilek ikalhi lhasukyaj tä in'amhiche. Matkat Dios ikalhi t'at, wet pajche iwoye, häp tä ichen honhatena häp Lhäs tä lhayen häpeya hin'o, mälhyet iwoye n'amel, wet lham lhayachajeje'pe n'osukyaj häp t'ilek. Tä iwoye, wet ikalhi n'osukyaj yämthilek nemhit lakhajyhayaj ihi. ₄Dios iwoynejetso m'ak tä iwoye, yämthilek n'amel y'akalhi wet y'awoye t'at häp m'ak tä Leytso ne'tek y'awoye. Tsi nemhit y'alhäjlhahlä lhanech'ethayaj, mat y'alhäjlhahlä Espíritu tä Dios T'amajchet.

₅Häp wichi tä ilhäjlhahlä lhamel lenech'ethayaj, ts'ilak t'at lhamel t'akänyajay tä yenpej tichunhayaja. Mat häp iyhäj tä ilhäjlhahlä Espíritu tä Dios T'amajchet, ts'ilak t'at m'ayhay tä tälhe lham Espíritu tä yenpej tichunhayaja. ₆Wet chik ts'ilak m'ak tä olham ohuminche tä oyenpej tichunhayaja, ot'ilek t'at. Mat chik häpe m'ayhay tä tälhe Espíritu tä Dios T'amajchet tä oyenpej tichunhayaja, ow'atshancheyaj ihi lhäy'e otamsek. ₇Lhamel tä hits'ilkat m'ak tä lhamel ihuminche tä yen tichunhayaja, häpehen iyhäj tä tatayhlä Dios, wet ihanhiyejt'a iwoyneje yämthilek iwoye Dios laka Ley. ₈Tä mälhyejtso, lhamel tä iwoye m'ak tä t'akänyajay, ihanhiyejt'a iwoyneje chik ikänitlhi häp Dios.

₉Mat amel nemhit lelhäjlhahlä akänyajaytso, mat nech'e lelhäjlhahlä Espíritu tä Dios T'amajchet, chik matche tä Dios laka Espíritu i'amhihen. Häp elh tä Cristo laka Espíritu newahi, häpkhit'a elh tä Lewuk Cristo. ₁₀Mat chik Cristo i'amhihen, wet matche tä y'il t'at asan tä asukyaj tamenej, mat Espíritu tä Dios T'amajchet ailäythen t'at, tsi Dios pajche ahi'isyenhen. ₁₁Wet chik i'amhihen Espíritu tä tälhe Dios tä inuhatphä Jesús, häte lham iläythihena asanis tä nit'una, häp tä isej Espíritutso tä i'amhihen.

₁₂Tä mälhyejtso, ipuhfwas, iche m'ak tä iwohiyet'ak kay'awoyaye, mat häpkhit'a chik y'alhäjlhahlä lhakeyes tä ni'isachehen. ₁₃Tsi chik kamaj lelhäjlhahlä akeyestso, let'inhihena. Mat chik lelänejen Espíritu tä Dios T'amajchet tä i'amhihen, häpkhilek haw'atshancheyaj i'amejen. ₁₄Nilhokej wichi tä Dios laka Espíritu t'at tä ipäyne m'ak tä lhamel iwoye, häpehen Dios leles. ₁₅Tsi Espíritu tä Dios hiw'ente amhohen häpkhit'a chik ayen kwenkaya yämthilek yachajo tä lechätho anowayhyaj. Mat häpe t'at häp Espíritu tä ayen häpeya Dios leles, wet häp tä n'aisej chik y'ämhoplhi Dios tä y'ok, “Ijcha, Ijcha.”

₁₆Tsi Espíritutso lhaip'ajtej n'amel lhahusey, wet häp tä ifwenho elh weihalhapej n'amel wet yok, “Matche, ahäpe t'at Dios leles elh.” ₁₇Tä mälhyejtso, häte n'amel lhäy'e Cristo tä n'alewuhuyla häp Dios lakäpfwayajay tä isen tä pajche lham t'amajejo leles. Tsi chik y'atn'isej Cristo tä y'awo lhateläythayaja, häpkhilek lewujyaj tä isi ihlat n'amejen.

₁₈Oyok, häp n'owujyaj tä isi tä lhain'älthila n'amejen chik paj, lhäy'ehila lhip chik inuhla'pe häp lhateläythayajay tä in'amejen fwalasna. ₁₉Wet nilhokej m'ayhay tä Dios lhenhay lhäy'e lhip tä nakelej chik nichäte lewhäy chik Dios itäfwnhatej lhamel wichi tä häpehen lham leles. ₂₀Tsi Dios itiyej p'ante letes häp lhenhay wet najit lahaya. Mat häpkhit'a m'ak tä lhamel lenech'ethayaj, mat häpe t'at lham letichunhayaj yämthilek iwoyeje. Wet tej tä lhenhay mälhyej'attso thayej lewit'äyhyaj, mat leniwhayaj iche t'at, ₂₁yämthilek Dios ilanche t'akay wet ifwayhtej letäyhyaj, häpkhilek lhamtej nichätho lewujyaj tä isi tä ihiyeja Dios leles.

₂₂Y'ahanej tä nilhokej Dios lhenhay äytaj tä ihi yäk athana, wet wuj tä iteläytej, hätet iwoye atsinha tä iwo lhäsa. ₂₃Mat ts'ilakhit'a Dios lhenhay tä äytaj tä ihi, mat häte n'amel tä pajche y'akatej Espíritu tä Dios T'amajchet, tä häpe lhip tä Dios ichunkat n'amehen tä tälhe m'ak tä hiw'enla n'amhohen chik nichäte lewhäy. Wet äytaj tä y'ehi athana tä y'aniwhihlä chik Dios imälhewek tä n'ayen lelesa wet ifwayhthen lhat'isanis. ₂₄Pajche y'atfwayhen t'at, tajlhama tä y'aniwhihlä chik nichäte lewhäy. Tsi oyok, chik ottey hiw'en t'at häp m'ak tä oniwhich'oye, tä mälhyejtso häpkhit'a oniwhayaj, tsi m'ak tä ottey hiw'en t'uhawethiyejt'a chik oniwhich'oye. ₂₅Mat chik y'aniwhich'oye m'ak tä lhattey niw'ena, iwatläk kay'aleyayej tä y'aniwhich'oye.

₂₆Wet Espíritu tä Dios T'amajchet tach'ot n'amehen tä lhahusey nitkhajayahen. Y'ahanhiyejt'a lhat'alhyaj tä is alhoho chik y'awoye, mat Espíritu lham t'at tä lhaip'altsene Dios lhatapehen, häp tä isej lhämtes tä nehit katsik ihanej chik iten. ₂₇Wet Dios tä hiw'en m'ak tä ilech'oye elhpej lehusek, nitäfwelej wet ihanej t'at Espíritu letichunhayaj, tsi Espíritu iwo t'alhyaja'pe Dios leles mälhyej Dios lenech'ethayaj.

₂₈Häte y'ahanej tä wichi tä ihumin Dios, häp n'amel tä Dios t'än n'amehen mälhyej lham lenech'ethayaj, nilhokej m'ak at chik häpe chik in'amejen tach'ot n'amehen yämthilek n'aisej. ₂₉Wet n'amel tä pajche Dios t'ä n'amhihen, wet iwaklhat n'amhohen tälhe tä nech'enyaya yämthilek n'ahäpehen Lhäs lepeyak, wet lham häpkhila elh tä thaläkw tä iyej wujpey lepuhfwas. ₃₀Wet tä iwaklhat p'ante n'amhohen täjtso, tä paj wet t'än n'amehen, wet tä t'än n'amehen, wet äp n'ahi'isyenhen, wet tä n'ahi'isyenhen, wet äp hiw'en n'amhohen lewujyaj tä isi.

₃₁Tä mälhyej tä oyämetso, ¿atsi ilhämet chik y'awoye? Tä Dios it n'amejen, ¿atsi tä ikalh n'amhiche? ¡Ihichet'a! ₃₂Tsi tä lham nin'äyayej n'amhohen häp Lhäs, mat yachaje t'ilek yämthilek y'alhokej n'amel n'aisej, tä mälhyejtso, kalelhäj tä häte hiw'enlat n'amhohen nilhokej m'ayhay. ₃₃Wet ¿atsi tä ikalhi chik yok, “Isihent'a iyhäj tä Dios t'ähina”? ¡Ihichet'a! Tsi Dios lham t'at tä n'ahi'isyenhen. ₃₄Wet ¿atsi tä ikalhi chik yok, “Letes ihi t'at lhamel”? ¡Ihichet'a! Tsi Cristo Jesús itäyhthen lhates tä lham y'il p'ante, wet inuphä tä tälho n'op'itseyhay, wet tä ihi t'at Dios lefwomkat, y'alhyenpej n'amehen Dios.

₃₅Tä mälhyejtso, ¿atsi tä ikalhi chik n'aitiyej kanhihlä häp Cristo lehumnhayaj? ¡Ihichet'a! Tej chik lhateläythayaj, wok atha lhan'äyij, wok wichi iti n'amejen laka'tshayaj, wok häp tä y'achuyuhen, wok häp tä newache lhaw'uy, wok lhawit'äyhyaj ihi, wok chik y'aleyej honhat. ₃₆Mälhyej tä Dios lhämet tä ihi Lehi yok:

₃₇Mat tej tä ichepej m'ayhay tä mälhyejentso, ¡y'akalhi t'at, wet nem koyhyaj tä y'akalhi!, tsi n'aisej häp lham tä n'aihumnhen. ₃₈Okachuhit'a tä kalelhäj tä ihichet'a m'ak chik ikalhi chik n'aitiyej kanhihlä häp Dios lehumnhayaj, tej chik n'ot'ilek, wok n'ow'atshancheyaj, wok ángeles, wok ahät lhayis, wok n'okhajyhayajay tä iche puleye, wok häp m'ak tä iche athana, wok m'ak tä ihichela, ₃₉wok m'ayhay tä ikaphä, wok m'ayhay tä ichufwi honhat, wok Dios lhenek at chik häpe. ¡Ihichet'ala m'ak elh at chik häpe chik ikalhi chik isohla n'amejen häp Dios lehumnhayaj tä iti n'amejen, häp tä isej Cristo Jesús Lhawuk!