Rut 1

_1-2Häp fwalas tä pajche p'ante, kamaj newache Israel lhayis laka rey, tajlhame lhamel laka niyatey tä iche. Wet fwalastso iche lewhäy tä nehlä ihi ilhokej honhat, wet häp hin'o tä lhey Elimelec tä tälhe hupuy tä Belén, häp Judá lhip, lham yikch'oya lew'et, lhäy'e lech'efwa tä lhey Noemí, lhäy'e leles tä lheyes Mahlón lhäy'e Quilión, wet ihoye honhat tä Moab yämlek yen lew'eta ayej. Lhamel häpehen Efrata lheley tä tälhe t'at Belén tä Judá lhip.

₃Mat tä lhamel ihi p'ante Moab, Elimelec ileyej honhat, wet Noemí imälheyej leles. ₄Wet lhamel iwo ch'efwasa, iyejen atsinhay tä lew'et t'at honhattso, elh tä lhey Orfa wet elh tä lhey Rut. Wet lhamel yen lew'eta Moab diez nekchämes, ₅wet tä tajyäme lewhäytso, Mahlón lhäy'e Quilión ileyejen honhat. Tä mälhyejtso, Noemí tek häp lech'efwa ihi, tek häp leles ihi.

₆Tä paj Noemí iläte tä Lhawuk hip'altsene laka wichi Israel lhayis, noj nehlä tä iche, nech'e lhäk ihi lhamel. Tä mälhyejtso, lhaiwaklhat ₇wet yikch'oya lew'et tä ihi, lhäy'e letichey, wet lhamel tiyäjche n'äyij tä yikhen, yäple honhat tä Judá. ₈Mat Noemí nech'e tahuyej lhamel tä yok:

–Mäyay, äpilay, aelh weihalha äple ako lew'et. Is chik Owuk Dios ahip'altsenehen, mälhyej tä amel lewoye tä lep'altsenhente oles tä ileyejen honhat, lhäy'e olham. ₉Is chik yachajo tä hiw'en amhohen hach'efwas wet atamsekis ihi.

Noemí nech'e iwo tsilhekayej, hits'u Orfa lhäy'e Rut lech'alo wet lhamel ifwitsenejen tä tafwchehchä. ₁₀Wet lhamel yämeje Noemí, yok:

–¡Kha! Olhamel oyikhila amche tä lehoye aka wichi.

₁₁Mat Noemí inityen tä yok:

–Iles tsinhay, is chik lhäpilay. ¿Atsi m'ak tä tumenej tä let'uhläk lenek n'okwe? Nemla owo olesa yämlek amel lhenayhla hach'efwasa. ₁₂Mäyay, äple haw'et, tsi olham ohäpe elh tä thaläkw yämlek owo ch'efwaya. Wet tej chik ofwitaj okalhi tä owo ch'efwaya honatsina wet oles ihi, ₁₃¿hät amel letayayhiyela yäk thänhäy yämlek lhenay hach'efwasa, wet tumenla amejen tä naj hach'efwasa? Kha, iles tsinhay, tek is. Tsi wuj tä pay ohusek, inu'pe amel ateläythayaj, häp tä Owuk Dios matche tä itay n'ohlä.

₁₄Tä Noemí ileyej lhämet tä iwoye, nech'e lhamel yachajo tä ifwitsenejen tä tafwchehchä. Wet nech'e Orfa hits'u lakatela lech'alo wet yik, mat Rut imälheyej Noemí.

₁₅Wet Noemí tahuyej Rut wet yok:

–Lhek yahinya, Orfa nech'e yäple laka wichi lhäy'e laka dios lhayis. Is chik am lhekche.

₁₆Mat Rut ichulho, yok:

–Yej lenityen n'oyej yäk oaiwom wet oyik hach'oya. Tsi honhat chik häpe tä am tä lehoye, wet olham oyikhila amche. Wet lhip chik häpe tä am tä lhehi, olham oihihila. Häp aka wichi häpehila oka wichi, wet aka Dios häpehila oka Dios. ₁₇Honhat chik häpe tä am tä lhehi tä leleyej honhat, olham oihihila tä oleyej honhat, wet otseyek ihihila. Chik oaiwom, is chik Lhawuk Dios iwit'äyenn'o wet y'isej lhip owit'äyhyaj. Tsi ts'ilakhila ot'ilek tä n'ahiw'enhathen.

₁₈Tä Noemí hiw'en tä kalelhäj tä Rut iwatläk yikche, wet lham nemhit inityen, tek häp lhämet ihi.

₁₉Wet lhamel tujlhache len'äyij yäk ichäte Belén. Tä tiyäjo, wet wichi iseltejen wet wuj lhämtes tä iwoye, wet atsinhay yok:

–¿Et häpe Noemí p'iya?

₂₀Mat Noemí yok:

–Yej lhen olheya Noemí. En olheya Mara, tsi Dios tä najit letumfwaya yäm äytaj ohusek. ₂₁Tä oyikte, iche m'ak tä ow'en, mat tä Lhawuk inachajn'o, nech'e ohäpe elh tä p'elitsaj. ¿Chipte tä lhen olheya Noemí? Tsi Lhawuk tä najit letumfwaya häp tä iso n'oyej okäjyaj wet hiw'en n'oho olhakli.

₂₂Mälhyej p'antetso tä Noemí yäpil tä tälhe Moab, lhäy'e Rut, häp letiche tä Moab lhayis elh. Tä lhamel ichäte Belén, häpe lewhäy tä iwo tesa õlanyaj tä cebada.