Can 1

₂Ts'uhi ok'aj, tsi ahumnhayaj

tä leti n'oyej matche tä is,

inu'pe hat'es tä akäj.

₃Matche tä akäjche lenij

m'ak tä letsäy amche.

Chik oläte tä õ'wo eya,

tet iwoye hal'ä lhawo

lenij tä akäjche tä nekche leyalh.

Häp tä tamenej tä atsinha lhutshay

tä kamaj kan'och'efwasa

matche tä lhamel aihumin.

₄Tä oalehumnek, ahäpe t'at owuk.

¡Chäjn'o, mäh n'akelchetshi,

hänn'o awukwech'oya!

Olhamel wuj tä okäswethä amej,

wet ihichet'ala ifwala

chik olhamel op'ethatlä

ahumnhayaj tä inu'pe hat'es tä akäj.

Olhamel nech'e ohanej

m'ak tä tamenej tä atsinhay aihumin.

₅Jerusalén ka'tsinhay,

olham ohäpe atsinha tä ichalaj, mat oisilataj.

Ot'äj tet iwoye tsänt'ähes tä ichalas

tä wichi tä Kedar lhayis yen lewukweya.

Wet tet iwoye häp wesas tä isis

tä õhp'oyeji ventanas

tä ihi Salomón lewukwe tä leniyatyajw'et.

₆Yej tetshan n'oyej tä ochalaj

tä nahayofw hip'o ot'äj.

Oko leles tä w'enha lhamej lajcha

lhamel nichuwet n'oye

wet ne'tek ot'uye lelafwek

tä uvas lhiley ihi.

Häp tä tamenej tä nemhit ot'u lhame.

₇Wet am tä ahäpe ohumnek tä matche,

lhek fwel n'oho, ¿Chi tä lhehi

tä lechunhanwethä aläy tson'atas?

¿Wet chi tä lhehi

tä lewo t'elakw'eta lhamel

tä ifwala ihi lechowej?

Tsi isit'ak w'et otiyäjehen akalay'is

tä ichunhanwethä leläy chik ot'u amche.

₈¡Aisilataj, lenu'pe atsinhay iyhäj tä isis!

Chik matche chik kahanayej ihi,

hän t'at len'äyij

häp n'oläy tson'atas tä õyokos,

wet häp tä lechunnhilawethä aläy kayla les,

wet lhehiyeja tson'ataswos

lewukwey tä tsänt'ähes.

₉Am ahäpe t'at ohumnek tä matche,

wet wuj tä aisilataj tä leti amej

amsilis lhäy'e haw'uyis tä isis,

tet iwoye tä Egipto kaniyat

isilatyenej lew'utey tä atsinhay

tä iton laka kaletas tä laka'tshayajchal.

₁₀Tä hach'ote lheley ihi,

nem koyhyaj tä isis hach'alos,

wet lhäy'e häp haw'o

tä amsilis tä isis iyej.

₁₁Olhamel oyenhilhila amho

hach'ote lheley tä oro

tä õ'lesayneji plata.

₁₂Ihumnek, tä alemäyentshi

tä lhehi aka silla tä pitaj,

wet m'ak tä olänej ot'äj

lenij tä akäjche tapoyej

häp hup lech'o tä y'echufwi.

₁₃Atet iwoye hal'ä lhits'i

tä lenij akäjche tä lhey mirra,

tä õ'wo lemokwa tä ihi lehi tä niwuja

tä imälhewek honatsi

tä ihi t'at ot'aatey chowej.

₁₄Atet iwoye hal'ä lhawo

tä lenij tä akäjche y'ajpe wichi

tä ilanhi uvas tä ihi honhat lhip

tä lhey Kayla Kahits'ifwik.

₁₅¡Ika'is, matche tä aisilataj!

¡Aisilataj, wet atelhoy tet iwoye hokwinhas!

₁₆¡Ihumnek, matche tä aisilataj!

¡Aisilataj!

¡Hal'ä tälhes tä w'atshan häpe lhamäwet!

₁₇¡Pino häpe lhawukwe sij lhiley,

wet ciprés häpe lhawukwe lhetekch'o lep'ot!