Can 4

₁¡Matche tä aisilataj tä ahäpe ohumnek!

Aisilataj, atelhoy tet iwoye hokwinhas

tä iw'echehi wile tä lep'oyejpe hak'aj.

Wet haw'oley tä pites

mälhyej iwoye kayla tä akäswethä

tä tiyäjchephä tä inukwehchä

tä tälhpe tachenhas tä ihi Galaad.

₂Wet atsotey isis,

tet iwoye tson'atas tä õ'nayyenhen

tä õyisthichehena lew'ole.

Ipelaj, matche tä tijej iyhäj tä tumchä,

wet newache elh chik tatäy.

₃Häp apästey ichät tsi matche tä isis,

wet chik lhämlhi akäschehen ämtes.

Wet hach'alos mälhyej iwoye hat'anek lhawo

tä iw'echehi wile tä lep'oyejpe hak'aj.

₄Wet haw'o häp tä lesilatyenej

amsilis tä letiche letape,

tet iwoye rey David laka hup tä atojphä

tä õ'fwuhthilhi sip'älis tä takhajayhen

laka'tshayajchal tä wujpey.

₅Wet hat'aatey mälhyej iwoye ch'iwase les

tä õ'chunhanwethä tä ihi hal'äy tä lhawol isis.

₆Tä kamaj ninäma leyalh tä techäj

tä yafwutpe honhat tä honaj,

tä hal'ä hupelis piteschetshi tsi yikhen,

wet onkenla'pe tachenhas tä isis

tä olätche lenij tä akäjche.

₇¡Imälhewek tä ahäpe atsinha tä isilataj

wet niwohit ip chik ni'isa!

₈Ihumnek, ho n'oye tä lhehi häp Líbano.

Nuhchä tä lhe'pe tachenhas tä atoschephä

tä häpe Amana lhäy'e Senir lhäy'e Hermón.

Nuhchä tä lhe'pe tachenhas

tä t'owalhas lhokwey ihi,

lhäy'e tä hay'äj lhayis yen lew'eta.

₉Inhä tä oalehumnek, ohusek i'amej,

matche tä leso n'oyej.

Tefwaj'atni tä leyahinn'o,

lhäy'e amis tä iyej haw'o tä ow'en,

matche tä lekalh n'ohi.

₁₀Inhä tä oalehumnek,

matche tä is ahumnhayaj tä leti n'oyej,

inu'pe hat'es tä ikäjyenlhi hin'o tä iyäyej.

Wet m'ak tä lenij akäjche tä letsäy amche

inu'pe nilhokej häp hal'ä lhawo t'i.

₁₁Ihumnek, apästey tet iwoye akäyek,

hak'ajlhich'u häpe akäyek t'i lhäy'e t'os,

wet akhäy lenij tet iwoye tayhi

tä ihi Líbano lenij tä akäjche.

₁₂Inhä tä oalehumnek,

ahäpe t'at häp n'okäsw'et

tä nitsajaho tä isilataj tä õ'lafwlhi.

Atet iwoye hits'ifwik tä õn'äyejlhi

tä õkniwahna amej hin'ol.

₁₃Amälhyej iwoye n'okäsw'et

tä hal'äy tä lhawo isis tä ihi,

wet tä iwo lhaya,

matche tä akäj häp lhaytso.

₁₄Wet äpte atet iwoye

hal'äy iyhäj tä w'enhahiche

tä lenij matche tä akäjche.

₁₅Wet inät tä ipumyen häp n'okäsw'et

häpe inät tä iläfwelche

tä tälhe honhat tä Líbano.

₁₆¡Lhuyay, tafwojnhi lhäy'e tapinhi,

leyej tä lemä!

¡Afwutpe okäsw'et häpkhilek

lhawo lenij tä akäjche y'ajpe honhat!

¡Ihumnek, is chik lehoye akäsw'et

wet tufw akäs lhay tä wuj tä akäj!