Wet hin'o mamse äp yok:
1Inhä tä oalehumnek,
ohoyene okäsw'et.
Otchuma häp mirra
lhäy'e nilhokej hal'äy tä lenij akäjche.
Otufw akäyek
wet oyäyejne olhät hat'es lhäy'e t'os.
Wet wichi iyhäj nech'e tahuyej hin'o mamse lhäy'e atsinha lhutsha tä lehumnek, wet yok:
Amel tä ahäpehen okalay'is tä ohumnhay,
is chik let'ekhen wet leyä.
Äm at nofwi leyi ahumnhayaj tä leti amejen.
Wet atsinha lhutsha yok:
2Omä, mat mälhyej chik kamatachek omä.
Wet tä paj olätepa ohumnek
tä tume lepe tä t'än n'oye tä yok,
“¡Inhä tä oalehumnek, fwoyenche lepe!
¡Ahäpe hokwinaj tä kamaj hin'ol nisakanayej!
¡Olhetek takhalhi,
ayas tä nitsäyhchä tä honatsi
häp tä ipumyen ow'oley!”
Wet olham onchulhopa tä oyok,
3“Pajche olanhine okay'uche.
¿Chiwoyek yachajo chik oy'uche?
Pajche olejenne opach'ol.
¿Chiwoyek äp yachajo chik och'oyhthen?”
4Tä ohumnek hits'ulhkatlhipa lepecha,
tumho ochowej okäjyaj
tä ow'en takwey tä tachas lech'oye,
wet ot'otle iläfwel.
5-6Wet häp tä onephäpa
häpkhilek ofwoyenlä ohumnek,
wet mirra tä ichehen otkweyey
nitsächehchä tä tälhchehen ofwus
wet nitsäche'pe hup lepechal tä otsokej.
¡Wet tä oläte tä yämlhi,
oy'ilej ohumnhayaj!
Wet tä ofwoyenlä ohumnek,
ow'enhit'a, pajche yik.
Ot'ukwe, mat onlhokhiyet'a.
Ot'änch'oye, wet nichulhit'a n'oho.
7Wet tä sip'älis tä t'uye hupuy lelafwek lepe
hiw'enn'opa tä olunlhi,
lhamel ipäjlhin'o wet iwo olätshaya;
hich'ajyenchä ow'uy, iso n'oyej.
8Jerusalén ka'tsinhay,
is chik lewoye olhämetna.
Oyok, chik amel lew'en ohumnek
chik ihi lhip chik häpe,
fwenhola tä nech'e oy'ilejlhi t'at tä n'am w'en,
tsi matche tä ohumin häp lham.
Wet atsinhay tä lew'et Jerusalén lhamel nichulho wet yok:
9Ahäpe atsinha tä matche tä isilataj.
Ahumnektso etp'i inu'pe hin'ol iyhäj tä isis
tä let'uhläk olhamel ofwenho
tä let'ilejlhi t'at tä kaw'ena tsi lehumin.
Wet atsinha lhutsha nichulho iyhäj wet yok:
10Häp olham ohumnektso
häpe mamse tä matche tä isilataj,
inu'pe wichi tä isis tä i'pe honhat.
11Tate'pe tet iwoye oro tä ts'ilak,
lhetek tatsufwenhi,
ichalaj mälhyej iwoye tsetwo.
12Tatelhoy tet iwoye hokwinhas
tä iwo t'elakw'eta tä iche tewok les,
wet lhamel inayejen häp t'os.
13Lech'alos mälhyej iwoye
n'olafwey tä tsesomche
tä hal'ä lhawo tä lenij akäjche tapoyej.
Wet lepästey tet iwoye hal'ä lhawo
tä matche tä isilataj
tä õ'wo t'iya tä häpe mirra.
14Takweyey mälhyej iwoye
oro tä itolajchehen
tä tuntey tä isis iyejwethä.
Wet t'isan tet iwoye
m'ak tä isilataj tä õ'lejlhi
tä õhp'oyejpe tuntey tä wuj tä laha ihi.
15Lhechey mälhyej iwoye
hup ch'utey tä talesachehen, isis,
tä õyen lefwetesa häp oro tä ts'ilak.
Tä lham takasit, matche tä isilataj,
tet iwoye pino tä ihi Líbano.
16Lak'aj matche tä tet iwoyek hak'onek.
Nilhokej lhipey tä isis wuj tä ikäjyenlhin'o.
Häp tä mälhyejtso olham ohumnek tä oka'is,
ofwel amhohen tä ahäpehen Jerusalén ka'tsinhay.
