Zac 10

₁Tä inawop wet alhayeje pelhay häp Lhawuk.

Wet Lhawuk tä lep lhayis tälhe

ichenla amehen, yämla naya,

lhäy'e hon'al tä i'pe honhat.

₂N'ocheyä wohit'a m'ak che matchek tälhe,

wet han'ältshantses mathichet'a

tä fwetaj lew'enhay ihi.

Iyhäj yäme lefwilhey tä kamatachehen,

wet m'ak tälhiyet'a che fwetaj lech'otyaj.

Häp tä tamenej tä wichi wetahen,

tet iwoye tson'atas tä laj lewoya.

₃Lhawuk yok, “Häp tä tamenej

tä owäk iyej oka wichi lewos.

Otasnhila t'at lhamel.

Wet olham tä ohäpe Dios tä laj letumfwaya

Olewuk t'at wichi tä Judá lheley,

wet ot'uhiyela lhamel,

otehlat iwoye tson'ataswo tä t'uye leläy,

wet otech'aynhiyeja yel'atas tä n'oka'tshayajchal.

₄Niyatey tä lakhajyhayaj ihi tälhihola lhamel,

tehlat iwoye tuntey tä lhamenya tä iyej hupuy,

wet tehlat iwoye chinhas tä itselhäs

tä carpa t'akay letsutes,

lhäy'e lutses hal'äy tä n'oka'tshayajchal.

Nilhokej wichi tä le'nohyajay ihiche tälhihola Judá.

₅Wet Judá lhayis tehlat iwoye

sip'äl tä tanuhanhen

wet len'äyhäy ihihila iyhät

tä ichehen hupuy kawayhil.

Olham tä Olewuk oihiyejena,

wet häp tä iwohla laka'tshayaja

wet ikalhihila yel'ataswos tä letayhfwas.”

₆Lhawuk äp yok:

“Ow'enhihola lakhajyhayaj Judá lheley,

wet ofwayhthila Israel lhayis.

Onachajihola lew'etes tsi op'altsen lhamel.

Tehlat iwoye che n'am takawoyhlä,

tsi ohäpe Lewuk Dios tä otch'ahuye t'alhyajay.

₇Israel lhayis tehlat iwoye

sip'äl tä takhajayhen,

wet akäslawethä tehlat iwoye

iyhäj tä iyäyej hat'es.

Te leles hiw'enla wet akäslawethä,

lehusey akäjilhila n'oyej tä Lewukn'o.

₈“Ot'änhiyela wet ohutlawekhen, tsi ofwayhthen.

Yachajiholak wujpey, tehlat iwoye ifwalas tä pajche.

₉Ofwtsatkatte'pe honhatil iyhäj

wet lhamel lhayej wichi tä w'enha lhamejen.

Wet tej tä atoschehen,

mat tek hip'ethat n'ohlä,

wet ifwalahilat che häpe tapinla, lhäy'ehila leles.

₁₀Oyikhatlach'oye honhat tä Egipto,

wet osohiyeja Asiria.

Ohänhiyela Galaad wet Líbano,

pajla'tha nemhit w'awulho honhat tä ihi.

₁₁Tefwayhiyeja leteläythayaj,

tet iwoye elh tä yistho tewok wet tefway w'echehi.

Olehthiyeja inät tä iwo lhetheya,

wet oy'imhatla tewokitaj tä Nilo,

ts'ilakhilat lech'o che n'äley.

Asiria nemla lhaichäjlhi,

wet Egipto nofwila lakhajyhayaj.

₁₂Mat oka wichi lakhajyhayaj tälhila n'oye,

häpkhilek hap'ak n'oyej wet ihänlhin'o.

Olham tä Lewukn'o olhämet täja.”