1“Ifwalatso ihichela inät lhayis tä häpkhilek ilejen David lepes lheley lech'isukyaj, lhäy'e Jerusalén lheley, wet nofwila lakokhayaj. 2Nilhokhiyeja honhat che otäyhthen n'ocheyälis häpkhilek nemla õyen lhämeta. Wet te osohiyeja profetas tä kamatachehen lhäy'e ahät lhayis tä iyejwethä. Olham tä ohäpe Dios tä laj letumfwaya tä owoyetso. 3Wet che iche elh tä kamaj fwetaj iwo profeta lhämeta, wet lhokwey yohlak, Let'inla, tsi letech'aynej Lhawuk lhämet m'ak tä kamatache tä lhäme. Wet lhokwey ilänla'pe tä iten profeta, itshänhihola.
4“Ifwalatso profetas n'äfwelhla'pe che fwetaj yäme m'akpej tä lew'enek. Ihichet'ala elh che fwetaj taw'uyhi profeta lew'uy tä n'oyik tä itshäwet w'ole che fwetaj ikanej wichi. 5Mat elhpej yohlak, Ohäpkhit'a profeta, ochumaj t'at. Tälhe tä n'am hin'o tä otchumlhi'pe alho. 6Wet che elh tay'ätsheneje wet yok, ¿Chi tälhi alätshay tä i'pe äj?, yohlak, Okalay'is t'at tä iwo olätshaya.”
