Zac 4

₁Wet ángelnaj yämlhi n'oho yachajo tä iho n'oye, wet otet iwoye elh tä nech'e n'om tä imä. ₂Ángel yok:

–¿Atsi m'ak tä lew'en?

Oyok:

–Ow'en n'ochäkwhi tä oro, wet aceite tä ihi lehi tä i'pe. Wet iche siete n'ochäkwis tä i'pe, wet aceite nitsächehen len'äyhäy tä tiyäje n'ochäkwis. ₃Äp iche nitäkwfwas hal'ä tä olivo lhiley tä iwhäye n'ochäkwhi, elh tumej lefwomkat, elh tumej lets'amkat.

₄Wet oty'ätsheneje ángelnaj yämlhi n'oho, oyok:

–Iwuk, ¿atsi m'ak tä letetnek tähestso?

₅Ángel nichulh n'oho, yok:

–¿Hä kahanayej m'ak tä häpe?

Wet oyok:

–Kha, iwuk, ohanhiyejt'a.

₆Wet ángel yok:

–Häp täja Lhawuk lhämet tä ichene Zorobabel, yok, “Aisiyejt'a nifwotaj wok n'okhajyhayaj, tajlhamat oka Espíritu”, iwoyetso Lhawuk tä laj letumfwaya. ₇“M'ak at che ithahyen han'äyij nofwila t'at. Tej tä tet iwoye tachenaj tä atojphä, mat oyämla w'awulhchä. Wet che wichi hiw'en amej tä letihi lew'et häp tunte tä lepes, lhamel t'änhihena wet yohlak, ¡Nech'e matche tä isilataj Lhawuk Lewukwe!”

₈Lhawuk äp y'isej elh lhämet tä ifwel n'oho, yok:

₉–Zorobabel yenlhi lefwetes Owukwena, wet lhamlak ihämit. Häpkhilek wichi ihanej tä olham tä ohäpe Lewuk Dios tä laj letumfwaya tä ochen ame lhamel. ₁₀Lhamel tä nitetshana m'ak tä õ'wo tesa, akäslawethä che hiw'en Zorobabel che yäm wak'alh Owukwe.

Wet ángel y'isej elh lesilätyaj, yok:

–Siete n'ochäkwis häpe Lhawuk telhoy tä iyahinpe nilhokej honhat.

₁₁Wet oty'ätshene, oyok:

–Iwuk, ¿atsi tä häpe hal'ä tä olivo lhiley täkwfwas tä iwhäye n'ochäkwhi, elh tumej lefwomkat, elh tumej lets'amkat?

₁₂Te oty'ätshenej, oyok:

–¿Atsi m'ak tä häpe olivo lhachal täkwfwas tä itiyäjayenchehen aceite häp len'äyhäy tä oro tä tiyäje n'ochäkwis?

₁₃Wet ángel yok:

–¿Hä kahanayej m'ak tä häpe?

Wet oyok:

–Kha, iwuk, ohanhiyejt'a.

₁₄Wet lham yok:

–Häp tähestso häpe hin'ol tä Lhawuk tä nilhokej honhat laka Niyat itshupyeneje lechumtes.