Lhawuk ikalhihila wichi tä laka honhatil iwhäye Israel
1Häp täja Lhawuk lhämet tä itayhte honhat tä Hadrak lhäy'e hupuy tä Damasco. Tsi Aram laka hupuy tä lhamya lewuk t'at Lhawuk, tet iwoye wichi tä Israel lhayis tä Lewuk t'at. 2Te Hamat tä atott'aho Damasco, lhäy'e Tiro wet Sidón tä lhaichäjejwethä lechumyajay. 3Tiro lheley yenwethä lhamhohen hup tä takhajay yämthilek letayhfwas nisakanaye lhamel, wet iskon oro lhäy'e plata tet iwoye iyhät tä õ'iskon. 4Mat Lhawuk ilhokonhila tä isoyej m'ak tä hiw'en wet iskonla inätey, wet äp iwunhihola hupuy, yämlat nofw.
5Che wichi tä lew'et Askalón hiw'en täjtso, wujlak nowaye. Gaza lheley te leteläythayaj wujla, wet Ekrón lheley leniwhayaj lhahilatpe honhat. Gaza laka rey nemla iche, wet Askalón laka wichi nofwila. 6Lhahila lhamhiche wichi tä ihi Asdod, wet häp tä oy'ayhthichelahchä Filisteo lhayis. 7Olehthiyeja lhamel che tufw itshäwet tä kamaj lew'oyis ihi, lhäy'e n'olhäk tä kok'aye tä on'äyejo oka wichi che tufw. Lhamel tä imälhehihichela lhayenla oka wichi lhipa, tehlat iwoye Judá lhayis. Wet otchumlahlä Ekrón lheley, tehlat iwoye tä otchumtehlä Jebús lhayis, wet häpkhila oka wichi. 8Ot'uhiyela oka honhat häpkhilek nifwotas nemhit inukwe. Nemla letayhfwas ikalhi oka wichi, tsi olham t'at tä oyahin lhamel.
Nämla Niyat tä Dios Lechenek
9¡Ti amejen akäjyaj, amel tä haw'et Sión!
¡Jerusalén lheley, änhen tä akäjyaj ihi!
Aka niyat nämla amehen,
is alhoho wet ikalhi m'ak tä ni'isa,
mat tek lhaichäjlhi tä i'pe asno lhäs.
10Lham ikänchihla Israel laka kaletas tä n'oka'tshayajchal
wet Jerusalén lew'utey yel'atas,
lhäy'e n'olutses hal'äy.
Ifwenhiphäla honhatil letamsek,
wet leniyatyaj ihla'pe lewomekitas
lhäy'e nilhokej honhates,
tälhe tewokitaj Éufrates
pajla'tha nichäte honhat lhip tä lepes.
Lhawuk inech'aynhihila laka wichi Israel
11Lhawuk yok:
“Ifwalas tä pajche oayen häpeya oka wichi.
Wet tä owoynejetso, õ'tsäyhchä itshäwet w'oyis
tä yäm kalelhäj olhämet tä owoyej amehen.
Ifwalasna iyhäj amel kamaj ihi
honhat tä atofwe tä kahaw'etaya,
tet iwoyek ahäpehen n'op'ohoy
tä ihi chowej tä inät newahi.
Mat olham oaitonhichephäla,
12häpkhilek yachajo tä aniwhayaj ihi.
¡Tapilaye hup tä takhajayna!
¡Otkäpfwayhla amehen,
ofwayhthila'pe ateläythayajay!
13Tsi in'oyej olutsej hal'ä tä häpe Judá,
wet och'ähe häpe Israel.
Wet am, Sión, oayenla fwajnhata
wet otayyenlä aka wichi
häp wichi tä lew'et Grecia.”
14Lhawuk lhain'älthiyeja'pe laka wichi,
tafwomhiyeja lech'ähel tet iwoye lep.
Lhawuk Dios yafwthichela lefwol tä tson'ataj ch'u,
wet nekhichela pelhay tä tälh tapinhiye tä yafwteji.
15Lhawuk tä laj letumfwaya t'uhiyela laka wichi,
wet lhamel t'äsichela'pe n'ofwonthi lheley
tä tuntey tä lewos tafwomej,
wet ihämthiyeja letayhfwas,
wet äp iyähiyeja lew'oysilis pajla'tha tapoyej,
tet iwoye itshäwet w'oyis tä õ'tsäype altar.
16Ifwalatso Lhawuk Dios ifwayhthila laka wichi,
tehlat iwoye tson'ataswo
tä ifwayhtej leläy m'ak tä ni'isa.
Wet lhamel isihichela tä ihi laka honhat,
tehlat iwoye tuntey tä isiche tä iche'pe lhethey.
17Nech'e mathichela tä isilataj honhat,
tsi nayahila yachuyaj lhäy'e hat'es,
häpkhilek mamses lhäy'e lhutshay
isis alhoho tä lhaichiyhelthen.
