Sof 3

₁¡Lewit'äy ihi Jerusalén!

Häpe wichi tä nemhit tach'ahuye Lhawuk,

kok'aye ihi wet y'akhonej iyhäj.

₂Nemhit tach'ahuye Lhawuk lefwonkanyaj, iwohiyet'a.

Nemhit t'ekhaye Lhawuk tä laka Dios,

lhamel lhaitontehlä.

₃Laka niyatey tet iwoye t'owalhas, tanhätinwethä,

wet lakalelhthayajwos tet iwoye m'awotas

tä inukwephä tä honatsi

tä t'ukwe itshätäy iyhäj chik tufwen.

Chik nilhoke, yäm at nofw,

tek imälhthi lhip.

₄Laka profetas awit'äyhtses wet akantses,

wet laka sacerdotes hich'oyhtej lakeyis tä ni'isa

häp Lhawuk Lew'et tä T'amajchet,

wet itilhkat Lhawuk lechufwenyaj.

₅Mat Lhawuk kamaj ihi t'at Jerusalén

wet lham tä yenlhi m'ak tä is,

tek yenlhi m'ak tä ni'isa.

Wet nilhokej ifwalas tä iwoyeje

lakalelhthayaj tä is alhoho häp laka wichi.

Mat hin'ol tä ni'isahen lajit len'äfwlhiyayej

lakeyis tä ni'isa tä lhamel iwoye.

“Olham pajchehte otäyhthen

wichi tä ihiche honhatil,

owasthiche laka hupuy

wet othatche katsi lelafwey tä tuntey

lhäy'e lhipey tä atoschephä tä sip'älis ihiche.

Nemhit iche wichi chik inukwehen hup kawayhil,

tsi niwohit elh chik imälhehi, nofwej.

₇Otichunhayaj yohtek,

Tä Jerusalén lheley ihanej

m'ak tä owoyeje wichi iyhäj,

lhamel nowayhla n'oye wet iwohiyela ofwonkanyaj,

häpkhilek n'am täyhat lhamel lew'et.

Mat tä ninowaya n'oye,

lhamel ikelit t'at tä iwoye

nilhokej häp lakeyis tä hich'atej tä ni'isa.

₈Häp tä tamenej tä oyok,

Is chik iniwhit n'ohlä,

tsi onämla tä otiyej okalelhthayaj lhamel.

Wet otichunhayaj tä ohutlawek niyatey

lhäy'e iyhäj wichi tä ihiche honhatil,

häpkhilek yikchufwi owäkw

tä äytajche tä otsäche'pe lhamel,

tehlat iwoye itäj,

ihämthila imälhewek honhat.

₉“Chik nichäte ifwalastso,

ow'enhihola lhämtes tä isen

häp wichi tä i'pe honhat,

häpkhilek lhamel t'än n'och'oye wet yen Lewukwan'o.

₁₀Häp honhat tä atofwey

tä iw'echehi tewok lhayis tä ihi Etiopía,

oles tä ifwtsatpehentso tä ihi

nämhihena tä iwo t'alhyaja

wet ihänla n'oye otw'ayhtes.

₁₁Chik nichäte ifwalastso,

lhenhit'ala han'äfwlhiya

akeyisnaj ni'isa tä letatayej n'ohlä.

Tsi osohla amejen aiyhäj tä lhaichäjwethä,

wet nemla yachajo chik leläkwlhin'o

chik lheyaype okatchenaj

tä ot'amajchet tä häpe Ow'et.

₁₂Omälhthila amhi häp wichi tä p'elitses

lhäy'e tä lhaknichäjawethä,

wet häpkhilek lhamel yenn'o leletnhaweta.

₁₃Häp Israel lhayis iyhäjfwastso tä imälhehiche

äp iwohiyet'ala m'ak tä ni'isa,

nemla w'et yämwethä

wet nemla iche lhämtes tä kamatachehen.

Tehlat iwoye tson'atas tä lewo hit'ekyenwethä,

wet chik imähen letamsekis ihihila t'at,

wohit'ala m'ak chik istun.”

₁₄¡Choywethä, amel tä ahäpehen Israel lhayis!

¡Woyaye achoslis tä akäjyajay,

amel tä haw'et Jerusalén!

¡Mälhetwek ahusey tä a'akäswethä!

₁₅Lhawuk nech'e iso amejen

awit'äy tä lham itinaj amejen,

wet yokoschephä atayhfwas,

yäm atojche ahilähen.

Nech'e i'amejen häp Lhawuk tä Israel laka Rey,

häpkhilek nemhit lenowayhlä m'ak chik häpe.

₁₆Nichäthiyela ifwala tä

õyämhiyela Jerusalén wet õyohlak,

“Sión, yej noway,

yej alek'efwyenchä, akhajyen.”

₁₇Nech'e Awuk Dios tä takhajay i'amhi,

lham aifwayhthila.

Wujla lakäjyaj tä ihla ameji,

wet lehumnhayaj ainech'aynhihila.

Iwohla leteneka amej,

₁₈tehlat iwoye ifwalas tä n'okäjyaj iche.

“Ofwayhthila amej awit'äyhyaj tä i'amej,

osohla amej m'ak tä matche tä choyhat

tä ain'äfwlhatlhi t'at.

₁₉Chik nichäte ifwalastso,

oyämla nofwej atayhfwas.

Ofwayhthila aka wichi tä laj n'och'otyajayej,

wet ohutlawek iyhäj tä wetahen.

Wet nilhokhiyeja wichi tä i'pe honhat

nemla itiyej leläkwyhanyaj,

nech'e iwujyenla wet itihiyeja len'ohyaj.

₂₀Chik nichäte ifwalastso,

ohutlawek aka wichi tä ifwtsatpehentso,

onachajila lhame häp lhamel.

Wet nilhokhiyeja wichi tä i'pe honhat

tä itoynhila ame tä yachajo tä han'ohyaj ihi,

wet itihla amej awujyaj.

Am lew'enla t'at m'ak tä owo elha tä owoyej ame.

Olham tä Awukn'o olhämet täjtso.”