2 Reyes 24

₁Qaq huetoigui co'ollaxa da lo'onataxanaxac so nta'a Joacín, da so Nabucodonosor maye nta'a ye Babilonia, inoxotaua'a se'eso 'alhua nache loxonec so Joacín, nache choche namaxashec somaye soua tres vi'iye. Qalaxaye co'ollaq qaỹoqtegue de'era, nache so Joacín qaltaq dataỹa'aguet somaye. ₂Qalaxaye Ñim Nataxala', ỹamaxa co'ollaxa so Joacín som shiỹaxauapi maye na'attagui so lo'ogoxonaxatpi, somayepi nacheso so caldeopi, siiriopi, moabiitapi, qataq so amoniitapi. Nache ỹamaxa somayepi ye Judá, da yaqto' nlaxaañi, nache ipacchigui da la'aqtac Ñim Nataxala', maye ỹachegoxotchigui co'ollaxa som lamaxashecpi maye la'aqtaxanaxanecpi. ₃Qaq de'era talec co'ollaxa ye Judá, cha'aye maiche la'aqtac co'ollaxa Ñim Nataxala', da yaqto' ca'ai naqa'en somayepi, souaxat nam lasouaxashetpi so Manasés, ₄qataq souaxat da icoraxatrec naua ltago'q som shiỹaxauapi maye qaica ca ỹasouaxat, nache nlaxalec naqa'en ye Jerusalén na ntago'q. Qaq ỹoqo'oye Ñim Nataxala', saishet da ỹapalaxat na lasouaxashet somayepi.

₅Qaq nam laỹepi na'aqtaguecpi so Joacín, qataq 'enauac nam ỹo'otpi, nache nanettalec aso nere maye huetalec da na'aqtaguec so nta'alpi ye Judá. ₆Qaq co'ollaq ileu so Joacín, nache da lo'onataxanaxac talec so llalec Joaquín. ₇Huaña, nache so nta'a ye Egipto, saishet da qaltaq ỹe'eguelaxa da huenoxonec da ca'ai ye na'alhua, cha'aye so nta'a ye Babilonia, loxonec 'enauac som lalamaxatpi co'ollaxa somaye, chegoqchiguiña som la'auaxac ye Egipto, nache ivitta'a so tala Éufrates.

₈Qaq so Joaquín mashe ivi' soua dieciocho vi'iye da nachaalataxac co'ollaq ỹacoolec da lo'onataxanaxac, nache ivi' tres ca'agoxoiqa da nta'a, huaña ye Jerusalén. Qaq aso late'e somaye, Jerusalén lashe le'enaxat Nejustá, asom llale so Elnatán. ₉Qalaxaye somaye ỹo'ot nam ỹataqta saỹaỹamaxaren Ñim Nataxala', cha'aye icaachigui nam ỹo'otpi co'ollaxa so lta'a. ₁₀Qaq se'esoua na'axa'te, nache so nalleppi so Nabucodonosor, maye nta'a ye Babilonia, taỹa ye Jerusalén da coleesop da yaqto' iloquiaxan. ₁₁Qaq co'ollaq mashe qaicoleesop so huaqta'a't nỹecpi, nache nvi' so Nabucodonosor maye nta'a ye Babilonia. ₁₂Nache so Joaquín, maye nta'a ye Judá, nataqa'en aso late'e, qataq so ltauapi, lamaxashecpi, qataq so lpe'etpi, nañan co'ollaxa, cha'aye ila'a da mashe loxonecpi so nta'a ye Babilonia. Qaq de'era huetoigui co'ollaq mashe ivi' soua ocho vi'iye da nta'a so Nabucodonosor. ₁₃Qaq ime co'ollaxa, nache so Nabucodonosor ỹacona 'enauac so nogoxoshetpi maye huetaigui aso atamnaxaqui maye lalamaqte Ñim Nataxala', qataq so netaiguipi so nma' lta'araic maye lo'onataxanaqa' so nta'a. Qaq nache ipacchigui da la'aqtac co'ollaxa Ñim Nataxala', da somaye ilaxachigui 'enauac som nogoxoshetpi oro, maye lo'onatacpi co'ollaxa so Salomón, maye nta'a ye Israel, da yaqto' ỹanaigui aso atamnaxaqui maye lalamaqte Ñim Nataxala'. ₁₄Ime nache imatta da ỹauec so shiỹaxauapi maye lma' ye Jerusalén, 'enauac so 'amaqtaqaicpi, qataq so ỹataqta 'añaxaicpi alleppi, qataq som sa nqalaate' da huo'o na ỹo'otpi, qataq so lcat lo'opi, nache ivi' diez mil so noxonecpi. Nache nda'a't som choxoraqpi da no'onalec se'eso 'alhua. ₁₅Nache so Nabucodonosor, ỹachegoxotchiguiña ye Jerusalén da ỹauega ye Babilonia so nta'a Joaquín, qataq aso late'e, qataq aso lhuapi, qataq so ltauapi, qataq som 'amaqtaqaicpi yi'iye 'alhua. ₁₆Nache ye lcata da ima'a't so loxonecpi maye alaataxaicpi, ivi' siete mil, qataq mil som ỹalleppi maye sa nqalaate' da huo'o na ỹo'ot, qataq so lcat lo'opi, qataq som 'añaxaicpi maye lhuotta da ỹaỹaten da nalaataxac, qaq nache ỹauec co'ollaxa se'eso nta'a ye Babilonia. ₁₇Qaq ime co'ollaxa, nache so nta'a ye Babilonia, talec naqa'en da lo'onataxanaxac da nta'a so Matanías, som ntesoqo' so Joaquín, qaq nataqa'en naralaxat da le'enaxat somaye, nache ỹanagui da Sedequías.

₁₈Qaq so Sedequías mashe ivi' soua veintiún vi'iye da nachaalataxac, co'ollaq ỹacoolec da lo'onataxanaxac, nache ivi' once vi'iye da nta'a, huaña ye Jerusalén. Qaq aso late'e somaye, Libna lashe, le'enaxat Jamutal, asom llale so Jeremías. ₁₉Qalaxaye somaye ỹo'ot co'ollaxa nam ỹataqta saỹaỹamaxaren Ñim Nataxala', cha'aye icaachigui nam ỹo'otpi co'ollaxa so Joacín. ₂₀Ỹoqo'oye Ñim Nataxala', ỹataqta dalemataỹa co'ollaxa ye Jerusalén, qataq ye Judá, nache ỹo'orauec somayepi. Qaq co'ollaq mashe qaỹoqtegue de'era, nache so Sedequías dataỹa'aguet co'ollaxa so nta'a ye Babilonia.