Ezequiel 33

₁Ñim Nataxala', aỹem 'enapega, nache 'eeta': ₂«'Am shiỹaxaua, ña 'autaxaỹot qome na 'arhuo' le'ecpi, qoneta': Da ñamaxa ca 'alhua ca 'alaataxac, nache ca shiỹaxauapi maye hueta'a que'eca 'alhua, ỹaconeua'a ca 'oonolec da ỹauo'o lauanaxanaxanec. ₃Qaq que'eca nauanaxanaxanec, da ila'aguet ca alleppi maye pa'aguenaxauapi da nayeetaua'a que'eca 'alhua, nache camaye ỹashiiyigui aca lasheere da yaqto' icoyeguen na shiỹaxauapi. ₄Qaq da huo'o ca hua'axaỹa da qaỹashiiyigui aca nasheere nache da saishet da qochetega, qaq da nvireuo ca pa'aguenaxauapi nache da ỹalauat camaye, nache camaye maiche lasouaxashet da l-leuaxa, ₅cha'aye hua'aqchigui aca nasheere, qalaxaye saishet da qocha'a, qaq camaye maiche lasouaxashet da l-leuaxa, cha'aye taxa da qocha'a, nache ishet taxa da nca'alec. ₆Qalaxaye ca nauanaxanaxanec da ila'aguet ca alleppi maye pa'aguenaxauapi, qaq camaye da saishet da ỹashiiyigui aca lasheere da yaqto' icoyeguen na shiỹaxauapi, qaq da nvireuo ca pa'aguenaxauapi, nache da huo'o ca ỹalauat, qaq cam qaỹalauat, ileu qome souaxat ca lasouaxashet, qalaxaye Aỹem ñemaxalec qome ca nauanaxanaxanec, da l-leuaxa camaye. ₇Qaq 'am shiỹaxaua, Aỹem 'am sanagui co'ollaxa da 'am lauanaxanaxanec na nhuo' Israel le'ecpi. Qaq 'am iuen da 'auaconegueta naua ỹa'aqtaxanaxaco, ime nache 'aua'axa't naua ivitaqtaxanaxaco. ₈Qaq da huo'otaq ñasaxauec ca ỹa'aqtac da sauo'o ca nhuaxanaguec ca qauemaic, qaq 'am da saishet da qonapega camaye da naralaxat da lataxac, nache camaye ileu qome souaxat ca lasouaxashet, qalaxaye Aỹem 'am ñemaxalec qome da l-leuaxa camaye. ₉Qalaxaye 'am, da qonapega cam qauemaic da naralaxat da lataxac, qaq camaye da saishet da ỹalaq, nache camaye ileu qome souaxat ca lasouaxashet, qaq 'am qalaq 'anca'alec qome.

₁₀'Am shiỹaxaua, qonapega na nhuo' Israel le'ecpi, qoneta': Qami' qoñiỹapec, naxa: Qomi' nlaqchiguilo da qarsomaxac qataq na qarasouaxashetpi. Qaq ỹoqo'oye qomi' nquictañi da qarca'alaxa. ¿Qaq cam shenaqteco' da ishet da ñeca'alaxauec? ₁₁Qalaxaye Aỹem Nataxala', maiche ñañan da san da ỹa'aqtac, da saishet da saỹamaxaren da ileu cam qauemaic, nacherata da naralaxat da lataxac yaqto' nca'alec. 'Am Israel, 'aỹa'axanec de'era qauem 'arataxac maye 'auachetac. Cha'aye ¿ta'ainco' taxa da 'aleu? ₁₂'Am shiỹaxaua, qonapega na 'arhuo' le'ecpi, qoneta': Ca shiỹaxaua maye no'on da lataxac da huo'o ca lasouaxashet, nache camaye saishet da nca'alaxatec cam no'on maye ỹo'ot co'ollaxa. Qaq cam qauemaic da ỹaxaañi da ỹo'ottac cam qauem, nache cam qauem maye hua'auñi da ỹo'ot co'ollaxa, saishet da nacheca ca ỹo'ot da l-leuaxa camaye. Qaq cam shiỹaxaua maye no'on da lataxac, da huo'o ca lasouaxashet, qaq ca no'on maye hua'auñi da ỹo'ot co'ollaxa, saishet da nca'alaxatec. ₁₃Qaq da sachaxanapecot ca lca'alaxa ca no'on da lataxac, nache camaye da pe'etalec da no'on lataxac nache ỹo'ot ca qauem, nache Aỹem saishet da selogui cam no'on maye ỹo'ottac co'ollaxa, nacherata da ileu qome souaxat cam qauem maye ỹo'ot co'ollaxa. ₁₄Qaq da saneguet ca l-leuaxa cam qauemaic, qaq camaye da ỹaxaañi cam qauem, nache ỹo'ot cam ỹaỹamaqchiguiñi qataq cam nalochiguiñi lataxac, ₁₅nache ỹe'eguelaxat cam qaipatano'ot co'ollaxa nogoxoshet, huo'otaq ca decachiỹa co'ollaxa, qataq ipaqueelec nam nqataxacpi maye ỹan da nca'alaxa, qataq ỹaxaañi da ỹo'ottac cam qauem, nache camaye saishet qome da ileu, nacherata da nca'altauec. ₁₆Qaq cha'aye nagui da ỹo'ottac da ỹaỹamaqchiguiñi qataq da nalochiguiñi lataxac, nache camaye nca'alec, qaq nache saishet da seuennatega nam lasouaxashetpi maye ỹo'ot co'ollaxa. ₁₇Na 'arhuo' le'ecpi 'enapec qome: Ñim Nataxala' saishet da do'onataxaatega da nalochiguiñi lataxac, qalaxaye namayepi nachena nam saishet da ỹo'ot da nalochiguiñi lataxac. ₁₈Ca shiỹaxaua maye no'on da lataxac, da ỹaxaañi da ỹo'ottac ca no'on, nache ỹo'ot ca qauem, nache camaye ileu qome, souaxat cam qauem maye ỹo'ot. ₁₉Qaq ca qauemaic da ỹaxaañi da ỹo'ottac ca qauem, nache ỹo'ot cam ỹaỹamaqchiguiñi qataq nalochiguiñi lataxac, nache chegoqchigui qome damaye da nca'alec. ₂₀Qaq qami' qañe'eguelaxacheetauec naxa de'era maye, 'eeta': Ñim Nataxala' saishet da do'onataxana da nalochiguiñi lataxac. Qalaxaye Aỹem ñimit qome ñi 'oonolec da qoñeeta qami' Israel le'ecpi, nache ipacchigui ñaqa'en dam naigui cam qauo'oche.»

₂₁Qaq co'ollaq mashe ivi' soua doce vi'iye da qomi' qaicoñettai'salo, nache so na'a'q cinco so ca'agoxoic diez, nache huo'o so ỹale maye datauec co'ollaxa chegaqa'a ye Jerusalén, anac nache aỹem da'aqtaxanem da ye huaqta'a't nỹecpi ye Jerusalén da loxonec so pa'aguenaxauapi. ₂₂Qaq so pe lỹa co'ollaq saxanaxa da nvi' se'eso ỹale maye 'eltaxaic, nache Ñim Nataxala' aỹem ỹashel-lec nache qaicaua naua ỹa'aqtaqa, qaq so nte'eta so lỹa na'a'q co'ollaq nvi' se'eso ỹale, nache Ñim Nataxala' aỹem ỹe'eguelaxatema naua ỹa'aqtaqa, nache seshet da setaqa.

₂₃Ñim Nataxala' aỹem 'enapega, nache 'eeta': ₂₄«Na shiỹaxauapi maye hueta'a ye huaqta'a't nỹecpi maye ỹotta'a't naua nañalo ye Israel maye nlachiguiñi, namayepi naxa, 'eeta': So Abraham 'oonolec co'ollaxa, qalaxaye somaye ivira'a co'ollaxa da lalamaxat ne'ena 'alhua, qaq qomi' ye qomi' qalote', qalaq taloxochiyo' da saishet da seviraqa'a da qaralamaxat ne'ena 'alhua. ₂₅Qaq ỹoqo'oye qonapega qome namayepi, qoneta': Da la'aqtac Ñim Nataxala', 'eeta': Qami' qollequiitac na lapat maye ñaqauo'o na ltago'q, qataq qavio'oxoyiñiitac na nqolacpi, qataq qaualaataxañi, qalaq ¿qaupicheetega peta'a da ishet da qaralamaxache ne'ena 'alhua? ₂₆Qataq qaupi'iitega na qa'aiñiqui, qataq qauo'ocheetac nam ỹataqta seqaiga, qataq 'enauac da qoñeeta' ncachetague' ana sa lhua, qalaq ¿qaupicheetega peta'a da ishet da qaralamaxache ne'ena 'alhua? ₂₇Qataq nataqa'en qonapega namayepi, qoneta': Da la'aqtac Ñim Nataxala', 'eeta': Aỹem maiche ñañan da san da ỹa'aqtac, da nam hueta'a na huaqta'a't nỹecpi maye ỹotta'a't naua nañalo maye nlachiguiñi, namayepi nataqa'en qaỹalauat qome, qaq nam huetauga na no'onaxa qalaq saneguet qome da chec nam huauec shiguiỹacpi, qaq na netaigui na coma'pi, qataq na auacpi qalaq ilem qome ca nalolaxa. ₂₈Nache so'ot qome da toolec qataq nlachiguiñi ne'ena 'alhua, qataq selaxachigui dam la'añaxac maye ỹo'ottac da ño'oxonnaxac. Qaq aye qasoxonaxapi ye Israel qalaq toolec qome, nache qaica qome ca ỹa'axasoxoolec ayemayepi. ₂₉Qaq qom toolec ñaqa'en qataq nlachiguiñi ne'ena 'alhua, souaxat nam qaiqaiga lasouaxashetpi maye ỹo'ot co'ollaxa namayepi, huaña nache namayepi ỹaỹaten da Aỹem nachaỹem Nataxala'. ₃₀'Am Ezequiel, na 'arhuo' le'ecpi, 'am na'aqtaxaatapigui naxa da hueta'a na mpaqtaxanaxatpi, qataq na ñegueuopi na nma'pi, nache ñi 'oonolec 'enapega naxa ñi lỹa, 'eeta': Ñaq qauanaqui, ña'axaỹaxanaxa cam na'aqtaxanaxac maye chegoqo'ot Ñim Nataxala'. ₃₁Qaq 'era da 'eetec naxa na ỹalamaxat nhuo' le'ecpi, da anac nache nso'ooñi 'am datato'ot da na'axaỹaxanalo naua 'ara'aqtaqa, qalaxaye saishet da ỹo'o't. Nacherata da ỹe'eguelaxattaleguete 'eeta'am naqa'en ca no'onec maye huetaigui da nauotaxanaqtaic, qalaxaye da lquiyaqteỹaxac quetague' da lauotaxanaqtaic ana anom plata. ₃₂Namayepi 'am ỹamata'ac da qoneta'am ca 'onaxanaxaic maye ỹo'ootac na no'onecpi maye huetaigui da nauotaxanaqtaic, qataq 'onaxaic da lavilỹaxac, qataq ỹaỹaten da ivicñigui ana arpa. Namayepi hua'aqtegalo naua 'ara'aqtaqa, qalaxaye saishet da ỹo'o't. ₃₃Qalaxaye 'enauac ne'enapi da ipacchigui qome, qaq qom ipacchigui namayepi, nache namayepi ỹaỹaten qome da 'eesa da huo'o co'ollaxa so na'aqtaxanaxanec da huetaigui namayepi.»