Ezeq 11

₁Lhawuk laka Espíritu ineyhatphän'opa wet ihän n'oye häp Lhawuk Lewukwe pe tä tumejlä tä ifwala tälhche. Wet ow'en tä iche veinticinco hin'ol tä ihi lepe, wet hin'o tä iyej lhamel häpe häp Jaazanías, Azur lhäs, wet lhäy'e häp Pelatías, Benaías lhäs. Lhamel häpehen iyhäj laka niyatey. ₂Wet Lhawuk yäm n'oye tä yok:

–Hin'o, häp tähesna hin'ol tä ifwalapej lhaiwaklhathen tä iwoye m'ak tä ni'isa wet iwetahatejen lechufwenyaj häp wichi tä ihi hupuyna. ₃Lhamel yok, “Kamaj nichäthiyet'a lewhäy tä õ'nech'aynhi hupuyna. Jerusalén hätet iwoye towej tä i'pe itäj, wet y'atfwayej lhatayhfwas tä n'ahätet iwoye itshäwet tä ihi towejna.”

₄“Hin'o, en ämeta olhämet wet tayhlä lhamel.”

₅Tä Lhawuk laka Espíritu nichät n'o'pepa, wet Lhawuk tahuy n'oyej wet yok:

–Wo silätayej olhämet Israel lhayis tä oyok, “Olham ohanej amel atichunhayajay. ₆Wujpey lep'itseyhay tä ichehen hup kawayhil tä amel lelänhen. ₇Häp tä tamenej tä olham tä ohäpe Awuk Dios oyok, Jerusalén hätehlat iwoye häp towej, wet itshäwet tä ihi khit'ala amel, mat häpkhila häp wichi tä amel lelänhen tä lep'itseyhay tapoyej hupuyna. Wet amel häp tä oaitonhichephäla tä lhehi hupuyna, otfwomla amejen. ₈Tä amel lenowaye n'oka'tshayaj, wet ochenla amehen häp nifwotaj. Tä ohäpe Awuk Dios, olham tä owo asiläta. ₉Tä otihla amejen ates, oaitonhichephäla tä lhehi häp hupuyna wet oyachajila amehen wichi tä w'enha lhamej tä tälhe honhatil iyhäj. ₁₀Õ'ailänhihena tä lhehi n'oka'tshayaj tsi okalelhthila amejen owäkw tä lhehiche Israel kahonhat pesey. Wet amel lehanhiyeja tä olham tä ohäpe Awuk Dios. ₁₁Nemla amel aisej hupuyna tä hätet iwoye towej chik lhe lech'oye, wet nemla ahätet iwoye itshäwet tä lehi. Tsi okalelhthila amejen owäkw tä lhehiche Israel kahonhat pesey, ₁₂wet häp tä nech'e amel lehanhiyeja tä olham tä ohäpe Awuk Dios. Tsi lewohiyet'a olhämtes wet tek lehänlhi ochufwenyajay, mat leten häp wichi iyhäj lakeyis tä laka honhates i'awhäyehen.”

₁₃Wet tä kamaj oyämlhi t'atpa tä oyämejlhi Lhawuk lhämtes, wet Pelatías nichät katsi wet y'il. Wet olham ot'upeyhchä pajtha otacho taji honhat, wet ofwitsenej ochos tä ot'än wet oyok:

–¡Ay Iwuk Dios! ¡Letifwej häp Israel lhayis iyhäjfwas tä imälhhiche!

₁₄Wet Lhawuk tahuy n'oyej wet yok:

₁₅–Hin'o, häp wichi tä ihi Jerusalén yämejlhi häp Israel lhayis tä apuhfwas t'at tä ihi honhat tä kalew'eta. Wet yok, “Lhamel nemhit ihi honhatna tä Lhawuk ihi, mat n'amel wet n'alewuhuy honhatna, õhw'en n'amhohen.”

₁₆“Häp tä tamenej tä is chik lefwenho olhämet lhamel tä oyok, Tej tä oyokwestech'oye lhamel laka honhat, wet lhamel w'et lhatpe wichi iyhäj tä w'enha lhamej laka honhates, mat wujit'a'pe ifwalas. Wet athana nech'e olhamla t'at chik olhayen lhamel len'okhayajw'eta häp honhatil tä lhamel ihiche.

₁₇“Olham tä ohäpe Lewuk Dios fwenho lhamel olhämet tä oyok, Onachajihomchela lew'etes häp lhamel tä ihiche honhatil iyhäj, häp honhatil tä w'et lhamel lhahomche t'at häp wichi tä ihiche honhatiltso. Ohutlawek lhamel wet onachajiyela häp honhat tä Israel. ₁₈Lhamel tapinhiyela laka honhat wet iwomla lecheyälis tä hich'atej tä ni'isahen tä ihi, wet ilehiyeja len'okhayaj lhäy'e lakeyis tä on'äyiho. ₁₉Wet osohiyeja lehusey tä t'unhen tä hätet iwoye tuntey, wet ow'enhihola lehusey tä nech'ayhis lhäy'e häp letichunhayaj tä nech'ayek, ₂₀häpkhilek lhamel ihänlhi olhämtes lhäy'e ochufwenyajay wet iwoye, wet häpkhihena oka wichi wet olham ohäpkhila lhamel laka Dios. ₂₁Mat iyhäj wichi tä nileyayej lecheyälis tä hich'atej tä ni'isahen, wet äp nileyayej lakeyis tä on'äyiho, lhamel ikathiyeja laha häp m'ak tä ni'isa tä iwoye. Olham tä ohäpe Lewuk Dios olhämet täja.”

₂₂Wet m'ayhay tä lhafwis ihiche wey'äkwephäpa, wet kaletaj käläy yikche t'at häp lhamel. Wet Israel lhayis laka Dios lewujyaj tä isi tä hip'o'pe lhamel ₂₃nech'e yikch'oye hupuy, iho'pe tachenaj tä tumej hupuy lhip tä ifwala tälhche. ₂₄Wet Lhawuk laka Espíritu ineyhatphän'o wet inachaj n'oyepa häp Babilonia tä wichi iyhäj tä õyen kwenkaya ihi honhattso. Häpe Lhawuk Dios tä iwo ow'eneka. Wet tä tajyäme täja, nofw häp ow'enek. ₂₅Wet ofwenho wichi tä n'okwenkay nilhokej häp m'ak tä Lhawuk ipäyen n'oye.