Qomi' no'ueenataxanaxauaripi queda lelaataxanaxac ñi qota'a
1Ca' quedá'ogue dajo, ỹaqaỹarolqa, aỹim se seshit quiyim setaqauguilo qamiri shintari' meca qom mashic neetagui so Espíritu Santo. Chaqaidaata quiyim shintari' ca qom ñaqai queetaugui da la'aachicyaxac, ma' qamiri 'eco' ñaqai noctoqui' da rpi'ỹaxaguii queso Cristo. 2Saanema qamiri da napaxaguinataxanaxac isoteta, 'neetam nqaishin ca noctoqui' ñaqai llipetac qoỹaante'ema caua no'i', se qoỹaanem ca na'ic quesaxan. Ma' se ishit qoỹaanem ca na'ic quesaxan. Chaqai nagui qaiyiita saqa' shichii a'guii ca na'ic quesaxan, 3ma' nagui ñaq quiitalec da ra'aachicyaxaguii. Ma' ñaqai 'ohita'ta' chaqai nco'uaita'ta' chaqai se neuojñiỹata', ca' re'qoota quiyim qamiri ñaq quiitalec da ra'aachicyaxaguii, ca ñaqai 'ñiitari' da no'ueenataxac ná'ogue na liỹa qom. 4Ma' ñaqa 'ue na 'naac: “Aỹim ỹa'gaxala' so Pablo”, chaqai na liỹa 'naac: “Aỹim ỹa'gaxala' so Apolos”, ca re'qoota quiyim qamiri 'ñiitari' ca qom ñaqai queetalec da chi la'aachicyaxac.
5Ma' ¿nega'ỹo' ca Pablo? chaqai ¿nega'ỹo' ca Apolos? Qomi' chaqaidaata qomi' lelaatqa ñi qota'a, qomi' chigoqchiỹauguilo quiyim viilec qamiri ñi qara'gaxala' Jesús. Qam quiñi 'óna coqomi' ỹo'uet cá'maq qaỹamaxalec quiñi qara'gaxala'. 6Aỹim na'le sanñi da no'ueenataxanaxac, ca' na'le lotqai anac so Apolos, ca ỹocorelec, qam ñí'maq qota'a maq ỹo'uet da lañaqtaxac. 7Ca quecá'maq danaxan chaqai ca rocoraxantac qaica ca 'netegue. Qaiñiita ñí'maq qota'a maq 'ue ca 'negue, ma' ñi'maxare maq ỹo'uet da lañaqtaxac da no'ueenataxanaxac. 8Qam ca danaxan chaqai ca rocoraxantac caua'que qaica ỹapaguec, qam quiñi 'óna ỹacoñiguit da nishiuetenaxac da lo'ueenataxanaxac, ma' qaishiueten quiñi qota'a. 9Ma' qomi' no'ueenataxanaxauaripi queda lo'ueenataxanaxac ñi qota'a. Ca' qamiri 'ec qamiri lanaxanqa' ñi'maxare.
Loqo'm 'nejem qamiri ca 'imec no'xontegueshiguim ñi qota'a. 10Ca aỹim shintam ca nashi queca 'imec lo'ollipi, ma' ñi qota'a ỹamaxailec quiyim sa'auaxanñi so no'xonaxala' ca 'imec, ca' na liỹaripi no'xonshiguim so'maxare. Qalaxam quiñi 'óna ỹouen quiyim ra'ijlec ca leloxoỹaxac quiyim no'xonshiguim. 11Ca' vichiguiño' qaica ca ishit liỹa ỹo'viijñi ca mashic qaỹo'viijñi no'xonaxanaxala' queca 'imec, quecá'maq mashic shi'gue qaỹo'viijñi. So'maxare chaqaiso so Jesucristo. 12Qam queca 'óna ishit ro'xonaxanlec so no'xonaxanaxala' queso 'imec, ro'xonaxana ca oro loqo'm ca plata chaqai ca qa' lo'yaxanec, loqo'm ro'xonaxana ca qo'paq loqo'm ca 'uaqapi chaqai aca noqola late'e. 13Qam ca lo'ueenataxanaxac quiñi 'óna ma'le re'oq ma' ỹovita ca pa'aatec na'xa'a. Ma' queca na'xa'a novi' ma'le ca norec, ca' cajo norec ỹavigaxat ná'maq ỹoreta'oguit no'ueenataxanaxat. Ca' quiyi, ca hua'ñi, ca re'oq cá'maq lo'ueenatec quiñi 'óna. 14Ca qom no'm no'xonshiguim ca 'imec, ca no'm qaiqalanac queca norec, ca' ca'maxare icoñiguit aca nishiuete. 15Qam no'm ỹavic cá'maq lo'xonaxanaxat, ca quiyi, ca na'laañi cá'ogue ca lo'ueenataxanaxac. Qam ca'maxare nca'leuec 'ec ca qohit queca norec.
16¿Sqa 'yiiñio' quiyim qamiri lauo' ñi qota'a, chaqai so Espíritu Santo chicqo'ot ñi'maxare neetanguilo qamiri? 17No'm 'ue ca ỹosogui ca lauo' ñi qota'a, ca' ñi'maxare ỹosogoñi cajo qom. Ma' ca lauo' ñi qota'a ỹaatqajam lalamaxat, ca' cajo 'imec chaqainaua nauá'maq qamiri.
18Qam qaica ca nayinteguelta'. Quiyim 'ue ca ipeeta'a quiyim ỹa'den da llicyaxac da na'deenec huelecna, ca'maxare no'uen quiyim naconaque quiyim 'ec qaica ca ỹa'den, qaiyi ỹaatqajam llic 'ue ca ỹa'den. 19Ma' na na'deenec huelec najo 'nejem ca 'ec mogollishic nqai'en ñi qota'a. Ma' naua nerecse' na'qaatqa 'nerac: “Ñi qota'a ỹo'uet quiyim chi noqoinalta' nqai'en na 'deenaxanqachaqaiquipi queda chi lco'ỹaxaric.” 20Qai'neeta 'naac: “Ñi qara'gaxala' ỹa'deene' naua la'deenataxanaxaco ná'maq 'ue na ỹa'den quiyim qaica ca 'netegue.” 21Vichiguiño' qaica ca nemaqajan caqamiri quiyim ỹa'queetalec ca chaqai qom, ma' ná'ogue nanchaqaina huelecna chi ralamaxachii: 22quiyim ca Pablo, loqo'm ca Apolos, loqo'm Pedro, loqo'm na 'laua, loqo'm da nca'laxa, loqo'm da nelauaxa, loqo'm naua ñachaatqatauguilo na'xata', loqo'm ca ñaqa naataho, ma' naua'maxare naua'que chi ralamqachiri. 23Chaqai qamiri lalamaxarete' so Cristo, chaqai so Cristo lalamaxat ñi qota'a.
