1 Corintios 8

₁Ca' nagui sa'xatema qamiri ca leloxoỹaxac ca na'ic mashic qanqouagaxainlec quiyim qoỹaanot ca nashiilec nqolac. 'Nesa ma' llic quiyim qomá'ogue sa'deenqachigui dajo, qam da qara'deenaxanaxa tai'a nqai'ne' qomi' da nque'guenataxanaxac. Qaidaata da ne'xorenataxanaxa ỹo'uet da qarañaqtaxac. ₂No'm 'ue ca pe'taxantaque quiyim 'ue ca ỹa'den, ca' saqa'leca ca ỹa'den quecá'maq 'neeta quet cá'maq ỹaatqajam la'deenaxanaxa. ₃Qam cá'maq nqo'ta ñi qota'a, ca' ñi qota'a ỹa'deenta ca'maxare.

₄Vichiguiño' quecá'maq na'ic quiyim mashic qanqouagaxainlec quiyim qoỹaanot ca nashiilec nqolac, llic ma' ca nqolac ỹaatqajam qaica ca 'negue quena 'laua, ma' 'oonoqui' ñi qota'olec, qaica ca liỹa. ₅'Eno'm 'ue quena piguim chaqai quena 'laua quená'maq qohinac quiyim qota'allipi, ca quedá'maq 'neeta dajo, ca 'xoic na qota'allipi chaqai 'xoic na na'gaxalateripi. ₆Qam qomi' sa'deenqata quiyim 'oonoqui' ñi qareta'a, leenaxat qota'olec. Ñi'maxare ỹo'uet ná'ogue nanchaqaina chaqai ỹa'vii qomi', ca' qomi' lalamaxarete'. Chaqai 'oonoqui' so qara'gaxala', leenaxat Jesucristo, só'maq ñi qota'a ỹachigoxochichigui ná'ogue ná'maq hueetalecna, chaqai vire'talo qomi'.

₇Qalaxam sqai ná'ogue ỹa'den dajo. Ma' ñaqa 'ue na naỹa'gue quiyim nqouagaxaintacot na nashiilec nqolac, ca' ñaqai queetalec nagui quena' 'ue na ỹa'ic najo na'ic, 'ec 'nejem nqai'en ca mashic qoỹaanot ca nqolac. Ca quedá'maq la'deenataxanaxac quiyim saqa' ra'ñi, ca se no'ueenaxat. ₈'Nesa ma' llic quiyim cá'maq na'ic se sachigoxotqagui quiyim qomi' ỹa'maxarente' ñi qota'a. Ma' cá'maq na'ic, no'm sa'guinaq, se ishit quiyim noquigaqchiguita qomi' quiyim no'uen ca qano'ueenataxac; loqo'm quiyim se sa'guinaq, qaiyiita se noquigaqchiguita qomi', ca se no'uen qano'ueenataxac. ₉Qalaxam telqataxañiỹo' quedá'maq 'ñiitari', quiyim qamiri a'guii canchaqaica na'ic, 'neeto' lotqai chicqochigui ca lasauaxaset nqai'ñii cá'maq saqa' ra'ñi da lpi'ỹaxac. ₁₀Saloqojnaxana qami' quiyim ỹaatqajam 'yiiñite' dajo, ca no'm nqa'xañiriñi qui'i' quecá'maq hua'ñi ñaqai qaimaqachintac ca nashiilec nqolac, ca no'm 'ue ca qarqaỹa iuaneta'a qami' quená'maq saqa' ra'ñi da lpi'ỹaxac, ca' nahi ỹa'ñaxachigui lauel qui'ỹapogo queca na'ic mashic qoỹaanot ca nqolac. ₁₁Ca' chaqaica quiyim mashic 'ue ca ra'yiinqui' chicqochigui quiyim na'laañi nqai'ñi' ca rqaỹa'e' saqa' ra'ñi ca lpi'ỹaxac quená'maq mashic ileualec qai'neeta so Cristo. ₁₂Ca no'm qamiri sauaxachii ca rqaỹahi saqa' ra'ñi ca lpi'ỹaxac, ca pa'aiuo 'ue ca rasauaxashichii queso Cristo. ₁₃Vichiguiño' no'm aỹim chicqochigui quiyim ca ỹaqaỹa 'ue ca lasauaxaset sauaxat ca na'ic quiyim sa'ic, 'maxaraic quiyim tot sa'ic ca la'at, qaiyi qaica ca 'ue ca lasauaxaset.