Dá'maq 'negue ca lelaatec so Jesús
1'Nesa ma' ỹim quecá'maq sham shi'ntegue qaica quepaxat aỹim, chaqai yalau'a da no'ueenataxac ca lelaatec so Jesús, ma' ỹim ñauane'e' so'maxare só'maq qara'gaxala'. Chaqai qamiri ná'maq 'em re'oq da ỹo'ueenataxanaxac quiyim so'ueenataxantacot so qara'gaxala'. 2Qam no'm 'ue na saqa' huelec quiyim aỹim lelaatec so Jesús, qam qamiri se ishit quiyim sqai viilec, ma' aỹim ná'maq 'em viilec so qara'gaxala'. Ca' chaqaida dá'maq re'oq nqai'en quiyim ỹaatqajam aỹim lelaatec so Jesús.
3Ca' 'eda da ỹa'qaatec quena' sopilaxachiguit ná'maq retaqatau'a aỹim, 'neetasa': 4Aỹim ỹaatqajam 'chichiguiñi quiyim sacoñiguit canchi qayqui'ỹaxanegue chaqai canchi qayi'taxañigui, 5chaqai qai'neeta quiyim ñauequeta'pegue' aca ỹoua mashic icoñiguit da na'qaatec, shintam da 'neesari' saua liỹa' lelaatqa so qara'gaxala' Jesús, chaqai saua lalamqate' lqaỹa', chaqai so Pedro. 6Loqo'm ¿'neetapigui qavillii quiyim so Bernabé chaqai aỹim quiyim qoqometa se seshitaq quiyim saxanaxañi da re'qoochigui qaro'ueenataxanaxac, ca qaralamqajlec sa'xataq da na'qaatec? 7¿Negue' ca ishit quiyim taho nouaataxanaq quiyim ishiuetentac ná'ogue na louenec? Chaqai ¿negue' ca ishit ỹanñi aca uva, ca' se ỹa'ic aca la? Chaqai ¿negue' ca ishit reloqota'a aca qagreta, qam se ni'chiguilo caua lo'i' lelamecse'? 8'Neeto' lotqai 'neetapigui qavillii quedá'maq shinac chi la'deenataxanaxac ca qom, ma' da naqataxaquipi chicqo'ot nqohin so Moisés qai'neeta 'naac dajo. 9Ma' da naneretañi na'qaatec 'naac: “Se qainocqajando caua lemicse' ca no'ueenataxanaxaqui tooro quena' co'vigui nqohin na trigo quena' qanaqat ana la.” 'Nesa ma' ñi qota'a sqai 'naac dajo quiyim qainaata ỹa'deentapega na no'ueenataxanaxaqui tooro, 10qam da'maxare 'eco' chi naloqojnaxanaxaqui coqomi'. Ma' da'maxare qoỹiriñi qaỹahotaque chi qara'maxa; ma' cá'maq nasauec na 'laua chaqai ca naqat ana la ca trigo, ca ỹaatqajam 'ue ca naquitaxac quiyim 'ue ca ñigui da lo'ueenataxanaxac. 11Ma' quiyim qomi' sanqategueñi dá'maq se re'xogui caqamiri chicqo'ot so Espíritu Santo, ca' ¿peeta'a se leloxoỹaxaco' quiyim qomi' ñaqataq chaqai seconaxaguit ca re'qoochigui chicqauguilo qamiri? 12Ma' quiyim quená'maq liỹaripi 'neete'm qomi', ca' qamiri shivichiñii da lo'ueenataxanaxac, ca' ¿huose'queto' quiyim se ỹapacauec quiyim qarishivichiñii qomi'?
Qam qomi' se seshitaq quiyim souenaq dajo quiyim qomi' 'ue ca shinqac. Chaqaidaata qomi' ña'ñaxataxaguit ná'ogue nanchaqaina, qaiyi qaica ca ỹanaxat dá'maq na'qaataxanaxac dá'maq na'qaataxac queso Cristo. 13Qamiri 'yiiñita quená'maq ỹo'ueetetac nanchaqaina huaugui aca no'ueenaxanaxaqui quiyi Jerusalén, na'maxare chicqaugui aca laseuete da lo'ueenataxanaxac. Dá'maq ỹaatqajam shinac 'neetasa': Quená'maq idaanteguelec aca ncopatoxonaxalate quena' qaỹavigaxat na nachitaxanataxanaxat huaca la'at, na'maxare ỹa'queetac na qaỹoỹoota'oga la'at. 14Ca' qaican ỹapaguec da laqataxac so qara'gaxala' quiyim quecá'maq ỹodootac da na'qaatec chicqaugui da nca'laxa, ca'maxare ishit que'eetapigui da la'qaataxanaxac. 15Qam aỹim se ỹauanapega souen da ñañinlataxac, chaqai sqai shiriñi quiyim sahotaque quiyim 'ue ca qanañan. Ma' ¡paguec la'maxa quiyim yileu, qaiyi qaica ca ishit naqat da ñitoonaxac hueetaỹot!
16Caỹim mesqai 'ec ñimaqajan quiyim sa'xatetac da na'qaatec chicqaugui da nca'laxa, ma' chaqai qaỹamaxailec quiyim so'uet. Ma' ¡'xoraicolec aỹim no'm se sa'xat da'maxare! 17Ca' vichiguiño' quiyim chaqaỹim chicqochigui da ỹa'deenataxanaxac quiyim so'uet da'maxare, ca' ma'le ishit 'ue ca ñishiue'. Qam quiyim yipacalec so'uet, qaiyiita ma' chi qaỹamaxailec quiñi qota'a quiyim so'uet da'maxare. 18Ca' chaqaida da ñishiue' dá'maq ñitoonaxac quiyim sa'xatetac da na'qaatec chicqaugui da nca'laxa, se sahotaque aca ñishiuete. Dá'maq 'neeta quiyim mesqai shiqueteguelec da ñilaataxac quiyim sque'eetapigui da quiyim aỹim na'qaataxanqajnec.
19Ma' ỹim qaica quet cá'maq aỹim lelaatec, qalaxam chi so'uet quiyim ná'ogue lelaatec aỹim, ma' sahotaque quiyim 'xoic ca qom huelec so Cristo. 20Quena' salequetaugui na judío laseripi, ca' sadenaxat da llicyaxac na'maxare, qaiyi ishit ñauec. Ma' na'maxare queeta'pegue' so llicyaxac so naqataxaquipi chicqo'ot so Moisés, ca 'eco' shinta malam so'maxare, qam aỹim ỹaatqajam sqai shiqueta'pegue' na naqataxaquipi. 21Chaqai da liỹa ma' sahotaque quiyim ñauec ná'maq sqai queeta'pegue' da naqataxaquipi chicqo'ot so Moisés, ca' ỹim 'ec shinta malam na'maxare. Llic ma' ỹim shiqueta'pegue' da llicyaxac na laqataxaquipi ñi qota'a, ma' ỹim mashic shiqueta'pegue' na laqataxaquipi so Cristo. 22Chaqai quena' salequetaugui na saqa' ra'ñi da lpi'ỹaxac, lotqai sadenaxat quiyim 'eco' ra'lliitam da ipi'ỹaxac, ma' sahotaque quiyim ñauec qai'neeta na'maxare. Dá'maq 'neeta quiyim canchaqaica, qam sadenaxat, sha'apiguito' quecá'maq canchaqaica 'neeta, qam 'ue ca ỹigo quiyim 'ue ca nca'leuec. 23Ca' quená'ogue sadenaxat, ma' sahotaque quiyim ñouanau'a na chicqaugui dajo na'qaatec chicqaugui da nca'laxa.
24Qamiri mashic 'yiiñita quena' 'ue ca lliquinaq ná'ogue nalliquin, qam 'oonoqui' ca ỹacoñiguit ca laueguec. Ca' qamiri ỹaatqajam nalliquiñii, qaiyi coñiguit ma'le ca raviguiguii. 25Ná'ogue ná'maq na'maxatetegueñi quiyim tau'a ca comitaxac ỹaatqajam noyinguit ná'ogue ná'maq ỹa'den quiyim na'axat. Na'maxare 'ne'tegue dajo, ma' ỹahotaque quiyim rauegaxan, ca' nado'inñi nqohin aca qo'paq laue, qam aca'maxare sqaỹaloq rashivi. Qam qomi' sahoqotaque quiyim ñauegaq acá'maq sqaica ca lqodoc. 26Ma' caỹim queda ñalliquinaxac, mese ñalliquinte'era, chaqai quiyim ñouaxan, se souaxante'era. 27Chaqaidaata quiyim souaxan na chi ỹoshicmaxa, ma' sahotaque sashaxantac, qaiyi se ishit quiyim se qayalecqajno ma' ime quiyim sapaxaguin na liỹaripi.
