So Elías ỹa'xateta'guit quiyim qaica ma'le ca ỹaxat
1So letaxaỹaxaqui ñi qota'olec leenaxat Elías, na'ñi yi na'a' Tisbe, huaugui yi 'laua Galaad, 'naaco' queso nashi Acab:
—¡Ñallitalta' quiñi qara'gaxala', ñí'maq qota'olec queso Israel, ñí'maq so'ueenataxantacot, quiyim quenauajo ñaxari sqaica ca ỹaxat chaqai aca 'ỹa', toco' ma' ỹovita quiyim 'ue ca sa'xat!
2Vichiguiño' ñi qara'gaxala' 'naaco' queso Elías:
3—Oquire'e najo, 'itegue da lqodoigue. Ca nañoxochiriñi quiyi ñaachi leenaxat Querit, pa'a'gue da lqodoigue caso lachiugue Jordán. 4Ca' ni'chi'sapigui ma'le na huaxaỹaq le'ec so ñaachi. Chaqai mashic shi'gue shinapega na ratecsanyipi quiyim ỹodootegueri' ma'le ca qonoqe'.
5Ca' so Elías ỹo'uet dá'maq qohinapega quiñi qara'gaxala', ca' eec, quepegue' ca na'ñi yi ñaachi Querit, pa'a'gue da lqodoigue caso lachiugue Jordán. 6Ca na ratecsanyipi ỹodootapega so Elías na pan chaqai na la'at quiyi nete'eta chaqai yi avit, chaqai ne'teetapigui so ñaachi. 7Qam co'na' 'xoic so na'xataripi, ca' so ñaachi 'im, ma' qaica ca ỹaxat quiyi 'laua.
So Elías chaqai aso pa'ỹe na'ñi yi Sarepta
8Ca co'na'le, ca' ñi qara'gaxala' 'naaco' queso Elías:
9—Ne'laxachirishiguim, ca' quirepegue' yi na'a' Sarepta, huaugui yi 'laua Sidón. Ca chaqa'ma' ñira'ñi yi'maxare, ma' ỹim shi'gue saqatqajantari' añi pa'ỹe quiyim ỹaanem qami' ma'le ca qanoqe'.
10Ca' so Elías ne'laxashiguim, ca' quepegue' yi Sarepta. Ca co'na' ỹovira'a yi ñigo quiyi na'a', ca iuane'to' aso pa'ỹe ñipetac. Ca roỹaxano', ca 'naaco' caso'maxare:
—Qouaquiric, vito' ca ỹaquip huaxaiqoqui'.
11Ca co'na' aso'maxare mashic eec queu'a. Ca' so Elías lotqai roỹaxana'pegue', 'naaco':
—Qouaquiric nodo'ireco' qai'neeta ca pan laỹooqui'.
12Ca aso'maxare 'naaco':
—Da ỹa'qaatec 'qaachigui ñi qara'gaxala' qota'olec quiyim qaica ca pan ratooxoic. Chaqai ỹaatqajam cocho'qui' yi ñi'aríña lichooqui' hueetagui añi lahi', chaqai da cocho'qui' 'aceitoqui'. Ca' nagui llapoonta'pe naua qo'parolqai'. Ca' so'uet aca ỹaqaulata, qaiyi que'e ñi ỹaalec chaqai aỹim. Ca ma' ime, ca' qareleu ma'le quena qarqopaaxa.
13Ca' so Elías 'naaco':
—Qaica ro'chi'raque. Ta'ta'a quiyim 'viichi' dá'maq 'ñirac. Qam 'auaxañi' ratoxochi' aca cocho'lli' raqaulata'e', ca' nodo'irec. Ca ma' ime, ca 'viichi' aca liỹa, ca nouañise'e' ca qachaalqui'. 14Ma' ñi qara'gaxala' ñí'maq qota'olec queso Israel 'naac quiyim se imeuo ca 'ariñoqui' hueetagui aca lahi' chaqai ca 'aceitoqui', chi ỹovireta'a ca na'xa'a quiyim ñi'maxare ỹo'uet ca ỹaxat quena 'laua.
15Ca' aso pa'ỹe eec, ca' ỹo'uet dá'maq 'naac so Elías. Ca aso'maxare chaqai so llaalec chaqai so Elías se ỹouene' ca loxe' queso 'xoic na'xataripi. 16Ỹaatqajam se imeuo ca ne'ariñoqui' caso lahi' chaqai so 'aceitoqui' caso lahi', ca ipaquichigui dá'maq 'naaco' na'le ñi qara'gaxala' queso Elías.
17Ca co'na' 'viom saua na'xata', ca taaño' ralola so llaalec aso pa'ỹe. Chalego lecaic so ralolaxa, ca vire'to' na' tot qaica ca lacat. 18Ca co'na'le, ca' aso pa'ỹe 'naaco' queso Elías:
—¿Negue' cá'maq shinto' caqami', qami' nale ñi qota'olec? ¿Qa' novichi'o' quiyim yo'leentaxanaxañi' quena ỹasauaxaset, chaqai quiyim 'viichi' ileu yi ỹaalec?
19Ca' so Elías 'naaco':
—Nañaañitquena ca qachaalqui'.
Ca' ỹacona so noctoqui' qa'aalto'ot aso pa'ỹe, ca' ỹodoshi'ma ca 'imec neetaugui, ca' inaxalec ca lomala'. 20Ime, ca' ỹaatqajam netenegue da la'qaatec quiyim roỹaxanot ñi qara'gaxala', 'naaco':
—Qami' ỹa'gaxala' qota'olec, ¿qai'neeta 'viichi'o' da nqui'ic cada pa'ỹe dá'maq senta'ñi na la'a' ma' ileu nqai'ñi' yi llaalec?
21Ca' so'maxare chaqa'ma' tres nqa'paxanegue so noctoqui', ca' ỹaatqajam netenegue da laualaxac quiyim ỹaualqot ñi qara'gaxala':
—Qami' ỹa'gaxala' qota'olec, ¡ñi'xoresene'tot qami', sashiila'e' quiyim rapilaxachi' ca nachaalataxac najo noctoqui'!
22Ca' ñi qara'gaxala' na'xaỹaxana da ne'xoresenaxac so Elías, ca chaqaida 'neeta, ca chicqochigui quiyim liỹa nca'leuec so noctoqui'. 23Ca' so Elías chaqa'ma' iconot so noctoqui', ỹodo'ña so 'imec pa'ỹaañi, ỹopilaxatot aso late'e. Ca 'naaco':
—¡'Ajñi', na qachaalqui' liỹa nca'leuec!
24Ca' aso 'aalo 'naaco':
—Nagui, ca' ỹaatqajam sa'den quiyim qami' nale ñi qota'olec, chaqai dá'maq 'ñirac ỹaatqajam lliqueta chicqo'ot ñi qara'gaxala'.
