Dá'maq 'neeta ca nouaỹaxac
1Qamiri 'aallipi qai'neeta, caná'maq mashic 'ue na loua, ỹaatqajam 'maxachii'teguelo naua rouari, qaiyi no'm 'ue ca sqai huelec da na'qaatec ishit quiyim huelec quedá'maq chi ra'maqataxanaxaguii, se ipaquetaque quiyim 'ue ca qaỹa'xat, 2quiyim iuana dá'maq ra'maqataxanaxaguii quiyim viilec ñi qota'a. 3Chaqai queca no'ueetaxat mesqai quená'maq pa'aatauec. Mesqai maqachaqaic nqai'en da netagaxac, loqo'm quiyim ỹanñi ca 'ueetaxat 'oro, loqo'm paguec loyac nqai'en aca neloxoqui. 4Ta'ta'a quiyim ỹanñi cá'maq chalego loyac 'ueetaxac quená'maq se re'xogui, viichigui nqai'en añi le'taxanata. Cá'maq no'uen 'ueenataxac 'ue da loyac chaqai da la'maxa, ma' chaqaida dá'maq ỹapacauec nqai'en ñi qota'a. 5Ma' chaqaida dá'maq 'ne'teco' quen da na'maqataxac so 'auaxaic 'aallipi quiyim mashic nañaanot quiyim queetalec ñi qota'a. So'maxare pi'ỹa'a ñi qota'a, chaqai ỹaatqajam huelec so louaripi. 6Ca' chaqaida 'neeto' na'le aso Sara, ma' ỹaatqajam na'xaỹaxane'ta so Abraham. Ca co'quena' roỹaxana, ca 'naaco' quen “ỹa'gaxala'”. Qamiri qai'neeta viriỹau'a ma'le quiyim 'ñiita aso'maxare, no'm 'viichii ca ỹa'maqachiguiñi chaqai qaica ca ro'chiỹaque.
7Chaqai qamiri ỹalliripi quená'maq mashic 'ue ana loua, qai'neeta na'deenaxanqachin quiyim quelola ca louaỹaxac, chaqai se iualaxainari', ma' ỹa'den quiyim aca 'aalo sqailligueme' ra'ñi, qalaxam dá'ogue da nachaalataxaguii chicqochigui da lqouagaxa ñi qota'a quiyim ỹaanema qamiri. Ca' chaqaida dajo 'ñii'tegue, qaiyi qaica ca ỹa'paxat ca nqouagaxainaxaguii.
Ná'maq 'ue da le'xoric quiyim ỹo'ueetetac ca ỹa'maqachiguiñi
8Ca' chaqaida 'ñiitari' quiyim ne'xoriñiỹata', chaqai quiñi 'óna nqouaguegue ca liỹa. Chaqai ỹaatqajam qamiri 'xorenataxanaxaiqa quecanchaqaica qom, 'ñiita'gue ca rqaỹahi. Niñiiquishiñitecta', qaica ca napacqajan. 9Cá'maq se no'uen sqai pilaxachilec ca se no'uen, chaqai no'm qarishiviñii, qam sqai shiuenaxañii. Ta'ta'a quiyim 'ỹaañim ca no'uen ra'qaachiguii ca qom, ma' ñi qota'a roỹaxanalo qamiri quiyim coñiguit ca qouagaxa. 10Ma' naua naneresañi na'qaatqa 'neracsa':
Cá'maq nqo'ta da nachaalataxac chaqai quiyim
queetauguilo da loyaague' naua na'xata',
ca' no'uen quiyim netela'a ñi lo'legaxanaxat,
ca' se ỹa'xat ca se no'uen,
chaqai sqai nahougui nqai'en ñi lap ca na'maachic.
11Chaqai noỹootec quená'ogue na se no'uen.
Ta'ta'a quiyim ỹo'uet na ỹa'maqachiguiñi,
ca' idaanaque ca la'maxa, ca chaqaica queetalec.
12Ma' ñi qara'gaxala' ỹaatqajam cochiỹa
ná'maq ỹo'ueetetac ca ỹa'maqachiguiñi,
chaqai na'xaỹaxane'ta da nqouagaxainaxac,
qam se iuojon ná'maq ỹo'ueetetac na se no'uen.
13Ca ¿negue' quet cá'maq ishit ỹo'uet ca se ỹa'maxañi caqamiri, no'm 'viichitac ca ỹa'maqachiguiñi? 14Qam 'eno'm 'ue ca re'xoriguii, qam quiyim 'maxachii'tegue da nachaalataxaguii, ca' 'ue ca ra'maxahi. Qaica ca ro'chiỹaque, chaqai sqaica ca rqo'ỹoqochichii. 15Ta'ta'a quiyim maqachiñii so Cristo quiyim la'gaxala' añi re'taxanatahi. Chaqai quiyim na'maxachitañi quiyim 'ue ca renachii quecá'maq 'maxaraic llicyaxac dá'maq naquitaxaguii, qam niñiiquishiñita chaqai se napacqajñii. 16Na'maxachita quiyim qaica canchaqaica huapigui qavillii, qaiyi ná'maq se no'uen ná'maq ỹa'xatetac quiyim mashic coñiguit da na'qaatec queso Cristo, ca nayiloxonlgoto ma'le nauá'maq chi la'qaatqa. 17Ma' paguec la'maxa quiyim 'ue ca re'xoriguii, qam quiyim 'viichitac cá'maq ỹa'maqachiguiñi, no'm chaqaida dá'maq ỹahotaque ñi qota'a, qam mesqaida quet quiyim 'viichitaiquet ca se no'uen.
18Ma' so Cristo queda le'xoric, ca' ileualgoto naua qarasauaxasete'; 'oonoqui', ca' chaqa'ma' imaauec nqai'en. So'maxare ỹaatqajam huagaxaraic, qam ileualgoto na'le qomi' quiyim qomi' hualoxona', qaiyi ỹauega'alo qomi' ñi qota'a. Ỹaatqajam qaỹalauat quesó'maq loshicmaxa, qam liỹa nca'leuec nqohin quesó'maq se re'xogui. 19Ca quesó'maq se re'xogui nachaalataxac qai'neeta eec quepegue', ca' ra'qaataxana queda nca'laxa só'maq nqui'illipi qaicoñiretari'. 20Sojo chaqaiso' só'maq qomyipi se na'xaỹaxano' quen nallaaqo' na' ñaqa 'ue so Noé, co'na' ñi qota'a chalego da lauaanaxanaxac, co'na' qano'xontecshiguim aso qom lahi' huaxaỹaqse, co'na' ỹovire'ta 'oocholqai' saua qomi' qanca'laxaterec queso huaxaỹaq. 21Ca' sojo huaxaỹaq chaqaido' da chilaxac nagui dá'maq ỹa'xateta'guit, ca' chaqaida dá'maq chicqochigui quiyim qarca'leuec nagui. Dajo chilaxac mesqai chicqaugui quiyim chi qaico'taxat na noshicmaxa; ta'ta'a quiyim qaỹashiila ñi qota'a quiyim co'taxat yi qara'deenataxanaxac loma'. Ca' qarca'laxatec chicqochigui nqai'en na' liỹa nca'laxatec so Jesucristo, 22na' taashiguim queda piguim, ca' nqa'xantañi queda loic ñi qota'a. Ca' ila' ná'ogue na lelaatqaipi ñi'maxare, chaqai na relaataxanaquipi, chaqai ná'maq nquesaxanaxaipi ỹoiquentac.
