Ñi qara'gaxala' tot nqo'ta so Saúl quiyim nashi
1Ca 'uo' so na'xa'a, ca so Samuel 'naaco' queso Saúl:
—Ñi qara'gaxala' yila' na'le quiyim saanot qami' ñi'maxare quiyim qami' nashi quena llaalqaipi so Israel ná'maq lalamaxareteripi. Vichiguiño' nagui na'xaỹaxañita dá'maq la'qaatec 'naapega qami' ñi qara'gaxala'. 2Ca' da la'qaatec ñi qara'gaxala', ñí'maq qaica lqalanec, 'neetasa': Ỹim sa'ue da nouaxanaxaset na Amalec llaalqaipi, ma' 'ue da 'ne'tegue na'le na Israel ma' ỹanaqta'guit na'le queso llic na' chicqa'gue da Egipto. 3Ca vichiguiño' nagui quirepegue', nalauachire'e'; qam ỹaatqajam nomachichiriñi, liỹa'ñi' nqai'ñi' ná'ogue na lalamaxareteripi; lauachi' na ỹalliripi, 'aallipi, ñaaqaipioqui', vire'ta na chita'gue ne'qaañi, chaqai na toorollipi, qagretaipi, nauaanaxanaxa late'ellipi chaqai na 'ashinyipi.
4Ca' so Saúl roỹaxanougui sá'ogue so qomyipi, ca' naloqojñi nqai'en quiyi Telaim. Ca ỹovi' doscientos mil so qomyipi co'ỹaaxaiquipi, chaqai diez mil so ỹalliripi na'ñi yi Judá. 5Ca co'na' ime, ca' so Saúl quepegue' yi na'ñi so Amalec llaalqaipi, ca renojñi, lauaanaxanqa' na lahi so ñaachi. 6Ca 'naaco' queso quenitaipi:
—¡'Uo' ca 'iigue, totaxan ñiitañigui na Amalec llaalqaipi, qaiyi sqai quiita'ñi' na'maxare ma' ñalauataxañi! Ma' qamiri 'maxachii'tegue na'le na llaalqaipi so Israel na' chicqota'gue da Egipto.
Ca' so quenitaipi ca'e so neetañigui Amalec llaalqaipi. 7Ca' so Saúl nalauate'e' so Amalec llaalqaipi, chicqochi'ñi nqai'en yi Havila, ca' chi ỹovireta'a yi ñigo quiyi Shur, pa'aata'guit yi 'laua Egipto, ỹaatqajam nomachichiguiñi. 8Chaqai loxonec so Agag só'maq lashi, ca' ỹahote'e na lecat na' ỹalauat so nalliripi. 9Qam so Saúl chaqai so nalliripi se ỹalauat so Agag, chaqai nca'laxatetauec aná'maq no'uen qagretaipi, chaqai na toorollipi, chaqai na 'uegaxasaq huaqui llaalqaipi, chaqai na qagreta louaaripi chaqai se iuagaxatac na no'uen nouenqaipi. 'Nesa, ma' iuagaxatac ná'maq qaica ca 'negue chaqai qaica ca lemaqachic.
10Ca co'na' ime, ca' ñi qara'gaxala' 'naaco' queso Samuel:
11—Ỹaatqajam chalego da ñitogotaxa quiyim nashi nqaishin ñi Saúl, ma' ñi'maxare ca'e aỹim chaqai se na'xaỹaxana da ilaataxanaxac.
Ca' so Samuel ỹaatqajam qaica ca la'maqa', ca' sá'ogue so pe nqouagaxaintacot ñi qara'gaxala'. 12Ca na' nete'etam queso liỹa na'xa'a no'teetashiguim, ỹahotaque quiyim natena'guit so Saúl. Qam qaỹa'ue da la'xaỹaxac quiyim so'maxare taigue da Carmel, ca' quiyi, ca' no'xonshiguim so nadenqatec no'leentaxat. Ime, ca' lotqai pil, quepegue' yi Gilgal. 13Ca co'na'le, ca' so Samuel quepegue' so Saúl. Ca so Saúl 'naaco' queso'maxare:
—Ñi qara'gaxala' no'ueenaxat ca qayicyaxaqui'. Somachigui dá'maq lelaataxanaxac caỹim ñi qara'gaxala'.
14Ca' so Samuel 'naaco':
—¿Negue' cá'maq 'neeta ca leloxoỹaxac ná'maq sa'qaataque qagretaipi noỹentagui chaqai na toorollipi ronoqotagui?
15Ca' so Saúl 'naaco':
—Qaỹachigoxota'ñi yi Amalec na'maxare. Ma' na qomyipi no'ueenaqtauec aná'maq no'uen qagretaipi chaqai na toorollipi, ma' ỹahotaque quiyim ỹavigaxat, ca' lachitaxanataxanqate quiyim ỹaanot ñi qara'gaxala'. Qam na liỹaripi, ca seuagaxatqac.
16Ca' so Samuel 'naaco' queso Saúl:
—Ñaq re'maqaite', na'xaỹaxañita dá'maq la'qaatec ñi qara'gaxala' queso pe, ỹahotaque quiyim sa'xatem qami'.
Ca' so Saúl 'naaco':
—Hua', 'xachi'.
17Ca' so Samuel 'naaco' queso'maxare:
—¿Mese na'yiiñiralta'o' quen quiyim qaica ca 'ñitegue na'le? Qam vichira'a quiyim qami' la'gaxala' na doce llaalqaipi so Israel, chaqai ñi qara'gaxala' ỹano qami' quiyim qami' nashi. 18Ca' nagui ñi qara'gaxala', no'm ỹahotaque quiyim se napaquiralec ca la'qaatec quiyim nomachichiriñi yi sauaqhuaiquipi Amalec llaalqaipi, chaqai quiyim yá'ogue nalauachiriñi, 19ca' ¿chi'neco' ma' sqai pacqajñirigui dá'maq qohinac caqami'? Ta'ta'a quiyim nquipichirelec ná'maq qarouootaxana'gue queso npa'guenaxaua, ca' iuanchigui qami' ñi qara'gaxala' quiyim se no'uen da 'viichi'sac.
20Ca' so Saúl 'naaco':
—Ỹim ña'xaỹaxane'ta ñi qara'gaxala', chaqai somachichigui dá'maq yilarelec, chaqai ỹoxonec ñi Agag ñí'maq lashi na llaalqaipi so Amalec, chaqai ỹaatqajam ñomachichiguiñi sá'ogue so'maxare. 21Qam na ñalliripi no'ueenaqtañi na qagretaipi chaqai na toorollipi quená'maq 'ñirac quiyim qanomachichiguiñi, ma' ỹahotaque quiyim ỹavigaxat ma' imaqachin da leenaxat ñi ra'gaxalachi' qota'olec quiyi Gilgal.
22Ca' so Samuel 'naaco' queso'maxare:
Ñi qara'gaxala' paguec nqo'ta quiyim qana'xaỹaxane'ta ñi'maxare,
ca' sqai 'nejem quiyim qoỹaanot aca nachitaxanataxanaxat chaqai qaỹavigaxat;
paguec la'maxa quiyim qana'xaỹaxane'ta quecá'maq 'naac,
ca' chaqaida sqai 'nejem quiyim qoỹaanot ñi'maxare ca nachitaxanataxanaxat qaỹavigaxat chaqai aca lo'ỹo ca qagreta loua'.
23Ma' ỹaatqajam 'ue ca lasauaxaset cá'maq sqai huelec ñi'maxare,
ca 'nejem cá'maq napaxaguintapega cá'maq idaanau'a cá'maq se re'xogui;
ca nqouagaxaintacot na nqolaquipi,
ca 'nejem ca se na'xaỹaxana ñi'maxare.
Ca' qami' ma' se na'xaỹaxañi' quedá'maq qohinac caqami',
ca' nagui ñi'maxare ro'yirauec quiyi romachi' quiyim qami' nashi.
24Co'na'le, ca' so Saúl 'naaco' queso Samuel:
—Ajá'a, llic quiyim 'ue da ỹasauaxaset, ma' ỹim se ipaguigui nqaishin da la'qaatec ñi qara'gaxala' chaqai da rapaxaguinataxanaxaqui', ma' yo'cha'a na qomyipi, ca' ña'xaỹaxana quedá'maq ỹahotaque. 25Qam nagui qouaquiric quiyim sqai quirapeguem dajo ỹasauaxaset, ca' qami' iỹaatac quiyim ñqouagaxainot ñi qara'gaxala'.
26—'E', sqai qami' iỹaatac —'naaco' so Samuel—, ma' qami' sqai pacqajñirigui da la'qaatec ñi qara'gaxala'. Ca' nagui ñi'maxare sqai qami' nashi nqai'en quena Israel.
27Ca' so Samuel naqalgoxoñi quiyim eec, qam so Saúl ỹacona'gue na lahi so napoxoqui, ca' ỹasectaqta'gue. 28Ca' so Samuel 'naaco' queso Saúl:
—Dajo 'ñitetegue nagui, ca chaqaida 'ne'tegue qami' nagui ñi qara'gaxala' rouootaxana'gue nagui da ro'ueenataxanaxaqui' quiyim qami' lashi na Israel llaalqaipi. Ca' dajo ro'ueenataxanaxaqui' ỹahotaque ỹaanem ca qauochi' le'ec cá'maq ỹaatqajam qamaxaraic ma'le, sqai 'nejem qami'. 29Ma' ñi qota'olec, ñí'maq lauaq na Israel llaalqaipi, se na'majan chaqai se netogot, ma' sqai 'nejem canchaqaica qom quiyim netogot.
30Ca' so Saúl 'naaco':
—Ỹim 'ue da ỹasauaxaset. Qam nagui qouaquiric iuanchigui nqai'ñi' ná'ogue na qo'xoiquipi chaqai quená'ogue na qomyipi quiyim qaiyiita se napaquirailec quiyim ỹim nashi. Ca' vichiguiño' rapilli' quiyim ñauequeta'pegue' qami', qaiyi ñqouagaxainot ñi ra'gaxalachi' qota'olec.
31Ca' so Samuel pila so Saúl, ca' liỹaatac, ca so'maxare nqouagaxainot ñi qara'gaxala'. 32Ime, ca' so Samuel 'naaco':
—Naviguiri' quenajo ca Agag, lashi na Amalec llaalqaipi.
Ca' so Agag i'maqatapeuc na' ỹovira'a so Samuel, 'neetapigui lauel quiyim mashic ime'uegue quiyim qaỹadentalec qaỹalauat. 33Qam so Samuel 'naaco' queso'maxare:
—Viise'e so lecachi' na' 'ue quiyim 'xoic na 'aallipi na'laañi na llaalqaipi. Ca 'nejem na'maxare ma'le aca qachii'i'.
Ca' qaica ca liỹa ỹa'xat so Samuel chaqa'ma' sectetajlec nqai'en quiyi Gilgal quiyi na'ñi ñi qara'gaxala'. 34Ime, ca' taigue da Ramá, ca' so Saúl pila ca la'a' quiyi Gabaa yí'maq lalamaxaret. 35Ca' so Samuel tot qaica ma' liỹa quet quiyim neuañiguit so Saúl, ca 'eno'm 'xoic da lachicoxo quiyim ñi qara'gaxala' 'ue da netogotaxa quiyim nashi nqai'en so Saúl quiyi Israel.
