So David qoỹano quiyim nashi
1Ca' ñi qara'gaxala' 'naaco' queso Samuel:
—¿Chi laquio' tauec da rachicoxo'e' sauaxat so Saúl? Ma' ỹim tot sa'maxaren quiyim queeta nashi quena Israel. Mo'e', no'xataxachirigui quena aceite aca rocoraxanqachi'i' lasote, ma' sahotaque quirepegue' yi la'a' ñi Isaí quiyi Belén, ma' mashic 'ue ñi ica'acsec quiyim nashi quiyaua llaalqa ñi'maxare.
2Ca' so Samuel 'naaco':
—¿Negue' cá'maq shinta'co' quiyim shic? ¡Ma' no'm ỹa'den ñi Saúl, ca yalauat!
Ca' ñi qara'gaxala' 'naaco':
—Coñira'a aca huaqui llaale, ca' 'ñirapega quiyim qami' qui' 'ỹaañitot aỹim aca rachitaxanataxanqachi'i'. 3Ca' ma' ime, ca' vite la'xaỹaxac ñi Isaí, qaiyi ỹalequetau'a aca rachitaxanataxanqachi'i'. Ca ma'le, ca' ỹim sa'xat cá'maq 'ñi'sa'gue cá'maq ro'ueenataxanaxaqui', ca' qami' cochirelec quiyim nashi cá'maq ỹim ñca'au'a.
4Ca' so Samuel ỹo'uet dá'maq qohinapega quiñi qara'gaxala'. Ca co'na' ỹovita yi Belén, ca' so qo'xoiquipi quiyi na'a' nachaata'guit so'maxare, qam ỹaatqajam 'ue da lqolonaxa. Ca' qainatetaco':
—¿Peeta'a qaica nqaida queda roviraxaqui'?
5Ca' so Samuel 'naaco':
—Ajá'a, chaqaida. Ỹim ñanac, qam saanot aca ỹachitaxanataxanqate ñi qara'gaxala'. Nco'taxachiỹalta', ca' ñauecqatecta', qaiyi lliguitau'a ma' savigaxat ca ỹachitaxanataxanaxat.
Ime, ca' nco'taxat nqai'en so Isaí chaqai so llaalqaipi, ca' 'naapega quiyim ỹalequetaho ma' ỹo'uet ca lachitaxanataxanaxat. 6Ca co'na' ỹovirero saua llaalqa so Isaí, ca' so Samuel iuane'to' so Eliab, ca 'ñiichiquio' lauel: Caalata'm chaqaida dajo dá'maq lca'acsec ñi qara'gaxala' quiyim nashi.
7Qam ñi qara'gaxala' 'naaco' queso'maxare:
—Mese ra'irigui cá'maq qom chaqai cá'maq ladoqueta, ma' ỹim se secoñiguit. Ma' sqaida dá'maq ra'iitagui ca qom. Ma' na qom ra'iitagui da chi no'ueenataxac ca qom, qam ỹim ya'iitagui añi le'taxanata.
8Ca' so Isaí roỹaxane'oga so Abinadab, ca' ỹachaxano queso Samuel. Qam so Samuel 'naaco':
—Najo qai'neeta se lca'acsec ñi qara'gaxala'.
9Ime, ca' so Isaí lotqai ỹachaxano so Sama, qam so Samuel 'naaco':
—Najo qai'neeta se lca'acsec ñi qara'gaxala'.
10Ca' so Isaí ỹachaxando' saua siete llaalqa queso Samuel, qam so'maxare 'naaco':
—Qaica cá'maq lca'acsec ñi qara'gaxala' quesaua'maxare.
11Ca co'na'le, ca' lotqai renataxan:
—¿Sqaico' ca liỹa qachaalqui'?
—Saqa'leca cá'maq paguec na'aasoqui' cá'maq neloxoỹaq cana qagreta —'naaco' so Isaí.
—Laataxañire'oga quiyim nago, ma' se seshitaq quiyim 'ue ca seconaxalec quiyim so'ueetaq quiyim saqa' noviro ca'maxare —'naaco' so Samuel.
12Ca' so Isaí relaataxane'oga so'maxare. Ca' só'maq noctoqui' chi netoquetec na lashic, lo'yaxanec, chaqai 'maxaraic da no'ueenataxac.
Co'na'le, ca' ñi qara'gaxala' 'naaco' queso Samuel:
—Chaqaina najo, ca' nagui ne'laxachirishiguim, ca' cochirelec quiyim nashi.
13Ca' so Samuel chaqa'ma' icona aso lahi' na locoraxanaxat aceite, ca' iuanchigui so lqaỹaripi quiyim ỹano nashi so ne'nec, leenaxat David. Ca chaqa'ma' so ne'espíritu ñi qara'gaxala' novita so'maxare, ca' ỹo'uet da lquesaxanaxa. Ca co'na' ime, ca' so Samuel niquine'e' so qomyipi, ca' eec taigue da Ramá.
So David ro'ueenataxanot so Saúl
14Co'na'le, ca' so ne'espíritu ñi qara'gaxala' noỹootec queso Saúl, ca' so ne'ec lecmaxaic chicqo'ot ñi qara'gaxala' taugui so'maxare, ca' ỹaatqajam qaica ca la'maqa' nqai'en so'maxare. 15Ca vichiguiño' só'maq lelaatqaipi 'naaco' queso'maxare:
—Qami' mashic na'yiiñiralta', qami' qara'gaxala', ma' so ne'ec lecmaxaic chicqo'ot ñi qara'gaxala' ỹahotaque da re'xoriqui'. 16Vichiguiño' qami' nagui vite caua lachi' quiyim qaidaanaque ca ỹa'den iviiguigui aca niviigue, qaiyi ma' ỹovita quiyim tot ỹa'ue ca redaaqachi' so ne'ec lecmaxaic, ca' ca'maxare iviiguigui aca liviigue, ca lotqai ra'maqairiñi.
17—Cha'regue daañiỹaque cá'maq ỹaatqajam ỹa'den liviigaxanaxac, ca' navigueho quenajo —'naaco' so Saúl.
18Ca 'uo' so 'óna quesaua'maxare 'naaco':
—'Ue ca seuana quecaua llaalqa ca Isaí na'ñi yi Belén ỹaatqajam ỹa'den ana liviigue, chaqai nalauataxai 'ñaaxaic lauel, chaqai ỹa'den da letaxaỹaxac, chaqai 'maxaraic da no'ueenataxac, chaqai qaỹotauantac quiñi qara'gaxala'.
19Co'na'le, ca' so Saúl ỹa'ue so lelaatec, ilata so Isaí quiyim 'naapega:
—Nelachi' ca qachaalqui' David, cá'maq neloxoỹaq cana qagreta.
20Ca' so Isaí ila' so llaalec David, ilata so Saúl, chaqai iỹoxolec aso 'ashina queso pan chaqai aso liỹoxoso loshicmaxa no'qaachigui queso lataxa, chaqai so quetaq llaalec ilata qai'neeta so Saúl. 21Ca' chaqaida da 'neeto' so David na' ỹovira'a so Saúl. Ca chaqa'ma' ro'ueenataxanot, chi ỹovireta'a quiyim so Saúl nqo'ta so'maxare, ca' ỹano quiyim lotaua. 22Ca' so Saúl ila' so la'qaatec queso Isaí, ne'xoresene'tot quiyim so David chaqa'ma' le'neetari' neeto'ot so'maxare, ma' mashic ỹaatqajam nqo'ta. 23Ca' chaqaida 'neeta, ca co'quena' so ne'ec lecmaxaic chicqo'ot ñi qota'olec tot ỹa'maxatac so Saúl, ca' so David lotqai icona aso liviigue, ca riviigaxan. Ca co'quena'le, ca' so Saúl lotqai nachinñi, ma' noỹooteco' quen so ne'ec lecmaxaic.
