So llaalqaipi so Israel ỹahotaque ca lashi
1Ca co'na' mashic qo'xoỹom so Samuel, ca' ỹando quiyim lashil yi Israel saua llaalqa. 2Só'maq 'auaxaic llaalec leenaxato' Joel, chaqai so liỹa llaalec Abías, saua'maxare reloqosa'a yi Beerseba. 3Qam saua llaalqa sqai 'neete'm so leta'a'. Ta'ta'a quiyim saua'maxare qo'iitaxanqachaqaqa, ca ỹa'maxarente' quiyim chi qaishiuetene', ca' se ỹo'ueete' cá'maq ỹaatqajam ỹa'maqachiguiñi. 4Co'na'le, ca' lapoỹata' sá'ogue so qo'xoiquipi quiyi Israel, ỹahotaque retaxaỹa'pegue' so Samuel quiyi Ramá, 5ma' ỹahotaco' 'naapega:
—Mashic qami' qo'xoỹom, chaqai naua qachaalaxahi' sqai 'neete'm qami'. Vichiguiño' vite quet ca qarashi quiyim reloxoỹa'alo qomi', qaiyi shinqata dá'maq 'neetari' ná'ogue na liỹa qomyipi.
6So Samuel se nqo'ta quiyim qaỹashiilatac queca nashi quiyim reloqota'a so llaalqaipi so Israel. Ca' ỹaanot da nqouagaxainaxac ñi qara'gaxala' qota'olec. 7Qam ñi qara'gaxala' 'naaco':
—Na'xaỹaxañita quecá'maq roỹaxantaque na qomyipi, ma' ỹim ná'maq liỹoqa'piguit, mesqai qami', qaiyi se seloqota'a najo qomyipi. 8Ma' shi'gue na'le quecá'maq na'xa'a na' ñaqata'a quen quiyi Egipto, chi ỹovireta'a nagui, ỹaatqajam 'xoic 'ne'tegue caỹim, dá'maq 'ne'tegue nagui caqami'. Ca'e quen aỹim, ma' ỹahotaque quiyim nqouagaxainot na nqolaquipi. 9Ca 'maxaraic quiyim 'viichi' cá'maq ỹahotaque na'maxare. Qam ỹaatqajam 'xachitem ná'ogue ná'maq louenec ca nashi quiyim reloxoỹa'a na'maxare.
10Co'na'le, ca so Samuel ỹa'xat dá'maq 'naac ñi qara'gaxala' quesó'maq qomyipi ỹahotaque ca lashi. 11Ca 'naaco' queso qomyipi:
—'Eda dá'maq 'ne'teque qamiri ma'le cá'maq rashii viitaque quiyim reloxoỹa'alo qamiri. Ca'maxare lapoonta' ma'le na qachaalaxahipi, ca 'ue ma'le ca ilarelec quiyim lo'o ana nahoglena lauataxaqui, chaqai 'ue ca ilarelec nalauataxala' na shipgaq, chaqai ỹa'ue cá'maq chi neloxoỹaq queca'maxare. 12Chaqai 'ue na nashi nqai'en queca mil nalliripi chaqai queca cincuenta nalliripi, chaqai caqamiri 'ue ma'le ca nasaugaxanaq queca la'a' chaqai quiyim naqat ca la ca lanecsec, loqo'm 'viichii ca lo'goxonaxat chaqai na louenec ana nahoglena lauataxaqui. 13Chaqai lo'ueenataxanqajna ma'le na qachaallipi quiyim ỹo'ueetac na na'meenaxat chaqai leuoshaxanqajna chaqai ana ỹo'ueetac na pan. 14Pa'aalec ma'le ná'maq no'uen na'lauahi, chaqai ná'maq no'uen nanqaipi cana qadañicshii 'uva chaqai ana oliva, ca' ỹaanem ma'le na lotauaripi nashillipi. 15Chaqai rouootaxana'gue añi 'óna queca diez hueeto'oto qamiri quena trigo chaqai cana 'uva, ca ỹaanem ma'le na lotauaripi nashillipi. 16Chaqai rouootaxana'gue qai'neeta ma'le caqamiri ca relaachiguii chaqai aca relaatahi, chaqai ná'maq no'uen qalohi ñii'lola chaqai na 'ashinyipi, ca ro'ueenataxañigui. 17Chaqai ỹacona'a ma'le aca 'óna quecaua diez quena qalohipi, chaqai ỹovire'ta qamiri 'ueenataxañiỹot ma'le ca'maxare. 18Ca ma' ỹovi' ca na'xa'a quiyim 'ue ca sqa 'maxariñii quecajo nashi rca'acshiguii, ca' ñi qara'gaxala' se na'xaỹaxanalo qamiri.
19Qam so qomyipi 'ec sqa 'xaỹa dá'maq 'naac so Samuel. Ca 'naaco':
—'Eno'chaqai, qam qomi' sahoqotaque ca qarashi, 20qaiyi shinqata na liỹa qomyipi, qaiyi reloqota'alo qomi' quiyim ỹoiquenta'pe qomi' chaqai quiyim sa'gaqatalec meca lauataq.
21Ca' so Samuel co'na' ime na'xaỹaxantapegalo naua la'qaatqa so qomyipi, ca lotqai ipacqajanchiguilo ỹa'xatema ñi qara'gaxala'. 22Ca' ñi qara'gaxala' 'naaco' queso'maxare:
—Na'xaỹaxañita quecá'maq ỹahotaque, ca vite cá'maq lashi.
Co'na'le, ca' so Samuel 'naapego' so Israel llaalqaipi quiyim pila cá'maq na'a' chicqochi'ñi.
