1 Tesalonicenses 3

₁Ca' na' tot qaralo'guit da shinqata, ca' taachigui qouel quiyim qoqometa senqa'ñi yi Atenas. ₂Ca' selaraq so qarqaỹa Timoteo quiyim ra'ỹa'alo qamiri. Ma' so'maxare lelaatec ñi qota'a chaqai qaro'ueenataxanaxaua na' sa'xataq da na'qaataxac so Cristo, ma' so'maxare ishit quiyim ra'ñaxachii chaqai quiyim i'taxajñi ca rpi'ỹaxaguii, ₃qaiyi qaica ca neualñi da lpi'ỹaxac quena qane'guenaxaquipi. Ma' qamiri ỹaatqajam 'yiiñita quiyim sovirqau'a da qare'xoric quena qane'guenaxac. ₄Ma' na' ñaqai senqatauguilo qamiri, chaqa'ma' sa'xatqatac quiyim 'xoic ma'le ca qane'guenaxac. Ca' chaqaida ipaquichigui, dá'maq mashic shi'gue 'yiiñii. ₅Vichiguiño' ỹim, ma' mashic tot yalo'guit dajo, ca' sela' so Timoteo quiyim renataxanalo qamiri negue' ca 'neetari' ca rpi'ỹaxaguii, ma' mashic 'ue da itelaxa quiyim so na'ỹaapec ỹayine' qamiri queca se no'uen chaqai quiyim qaica ca ñigui nqai'en da qaro'ueenataxanaxac.

₆Qam nagui mashic novi' ñi Timoteo chicqa'gue na Tesalónica, ca' noviraxatalo qomi' da lo'yaxanec qara'xaỹaxac queda rpi'ỹaxaguii chaqai da ne'xorenataxanaxa hueeto'oto qamiri. Chaqai ra'qaataxanalo qomi' quiyim 'xoico' quen da ro'leentaxahi coqomi', chaqai 'xoic da rishoxohi quiyim liỹa ñauanaqto qamiri. Chaqai qomi' qai'neeta 'ue da qarishoxo quiyim ñauanaqto qamiri. ₇Ca' quedajo qamiri ỹaqaỹa', 'eno'm quiyim seuqataugui da qarouenaxanaxa chaqai da qane'guenaxac, qam qara'maqachiguiñi na' sa'deenaq dá'maq 'ñiitari' quiyim ñaqai na'ñaxachii'tegue da rpi'ỹaxaguii quiitalec. ₈Ca' dajo 'ec dalaxaic nca'lerec nqai'ne' qomi' na' sa'deenaq quiyim saqa' 'xañiuec so qara'gaxala' Jesús. ₉Ca' ¿negue' queto' ca shinqata'gue quiyim saanqatacot ca qana'aachicyaxac ñí'maq qota'olec caqamiri, ma' mashic paguelec dá'maq qanetoonaxac? ₁₀Ca' vichiguiño' naua'que naua na'xatari chaqai naua piri ñqouagaxainqatacot ñi qota'a quiyim ỹasene'tema qomi' quiyim ñauanaqto qamiri, qaiyi sotauanaxe' qamiri quiyim ỹaatqajam naloochiguiñi da rpi'ỹaxaguii.

₁₁Sahoqotaque quiyim chaqaiñi ñi qota'olec chaqai so qara'gaxala' Jesucristo qarotauan, qaiyi seshitaq sovitaxalo qamiri. ₁₂Ca' ñi qara'gaxala' Jesús ñaxat nqai'en chaqai nqo'naxatec da re'xorenataxanaxahi quiyim ne'xoriñiỹata' chaqai ỹovira'oga nqai'ñii ná'ogue na qomyipi, 'nejme' qomi' quiyim ỹaatqajam qarauochaqate' qamiri. ₁₃Ñi'maxare ỹotauanque qamiri quiyim ỹa'ñaxat ca ra'deenataxanaxaguii, qaiyi shichii quiyim nañaañiỹot chaqai sqaica ca rasauaxashichii hueeto'ot ñi qota'olec, ma' novi' so qara'gaxala' Jesús, liỹaatac ná'ogue na lalamqateripi.