So Naamán imeuec nqohin so le'ne' na loshicmaxa
1Ca 'uo' so ỹale leenaxat Naamán, so'maxare lashi so nalliripi so nashi na'ñi yi Siria. So'maxare ỹaatqajam nqo'itaxat queso nashi ma' ñi qara'gaxala' ỹa'ue quiyim 'xoic da la'ñaxac na' nalauat ro'ootaxanlec yi Siria. Qam sojo ỹale rishiita na loshicmaxa.
2Ca 'uo' so na'xa'a ỹouootac so ỹalliripi na'ñi yi Siria, npa'guenta'pegue' so llaalqaipi so Amalec, ca 'uo' aso na'a nequetegaxai, ca' neeto'ot quiyim na'cooro aso loua so Naamán. 3Sojo nequetegaxai 'naaco' caso na'cooro:
—Queta' so ña'co' quepegue' ñi qota'olec letaxaỹaxaqui na'ñi yi Samaria, ca' imeuec queta'le queda le'ne'.
4Ca' so Naamán eec quepegue' so lashi, ca' ra'qaataxanem quedá'maq 'naaco' aso nequetegaxai. 5Ca só'maq nashi quiyi Siria 'naaco' queso'maxare:
—Ỹa'maqachiguiñi, mo'e', qui', ca' ỹim so'ueeto' aca ilaata queca nashi quiyi Israel.
Ca co'na'le, ca' so Naamán eec, ca ỹo'uet aso i'xat treinta mil aso lecat chicqaugui ana plata, chaqai seis mil aso lecat chicqaugui na 'oro, chaqai diez so nooỹac naloochiguiñi. 6Ca' ỹoda'a so nashi quiyi Israel aso nelaata lere 'naacsa':
—Ma' coñichiguit najo ilaata, ca 'yiiñi' ma'le quiyim ỹim sela' na Naamán ná'maq lashi na ñalliripi, ma' sahotaque quiyim machirec na le'ne' na loshicmaxa.
7Ca co'na' so nashi quiyi Israel retaqalec aso nelaata, ca nasectaqta'ahi saua loho queda nqui'ic. Ca 'naaco':
—Ca ¿ỹimo' ná'maq ỹim qota'olec quiyim ỹaanec da nca'laxa chaqai quiyim ỹacona da chaalataxac quiyim cajo nelata ỹim na ỹale quiyim ñataren na le'ne' na loshicmaxa? ¡Ỹaatqajam 'ajñita, ca' 'yiiñii ma'le quiyim ỹahotaque ca lligo queca ño'ueenataxac quiyim yiloquin!
8Ca co'na' ỹa'den dajo so letaxaỹaxaqui ñi qota'olec leenaxat Eliseo quiyim so nashi nasectaqta'ahi saua loho na' ỹa'ajan aso nelaata, ca so'maxare roỹaxana so'maxare, 'naaco':
—¿Chi'neco' ma' nasectaxachira'ahi naua qatoohi'? 'Ñirapega naiquena cajo ỹale, qaiyi ỹa'den quiyim 'ue na qota'olec letaxaỹaxaqui quena Israel.
9Ca' so Naamán eec ỹahote'e nahoglena chaqai shipiguiripi, ca' hua'e quiyi naloote'oga ñi lasom ñi lauo' so Eliseo. 10Qam so Eliseo ỹa'uo' so lelaatec quiyim 'naapega:
—Mo'e', siete homiriñi caso lachiugue Jordán, ca' imeuec ma'le na roshicmaxa'e' quena ri'ñichi'.
11Ca' so Naamán ro'o', ca' eec. Qam 'naaco':
—Ỹim shintapega quiyim ca'guit aỹim, ca' quelolliua', ca' quiyim sovichiguit ñachaatetañi, ca' nqouagaxain, ỹashiila ñi qota'olec queda'maxare. Ime, ca' ỹahote'e ana napoquena quiyim ipootau'a ná'maq hua'ñi na i'ne', ca' imeuec nqai'en aỹim. 12Ca' na lachiuguellipi quiyi Damasco, yi leenaxat Abana chaqai yi Farfar, ¿mesqai pagueco' loyaague' yaua lachiuque quena Israel? Ca' ¿mesqai seshito' quiyim ñachilliguilo yaua'maxare, ca' sco'it?
Ca' eec, ca'e yi'maxare, qam ỹaatqajam ro'o. 13Qam só'maq lelaatqaipi noquiiga'a so'maxare, ca 'naaco':
—Qami' qara'gaxala', quiyim ñí'maq qota'olec letaxaỹaxaqui 'xoic lqalaic cá'maq 'naac, ca' ¿qami' sqo 'viichi'? Qam ñi'maxare chaqai 'naac quiyim nachilli', ca' remi'rec ma'le.
14Ca' so Naamán eec, ca' siete homñi caso lachiugue Jordán, 'ne'tegue dá'maq 'naaco' so qota'olec letaxaỹaxaqui. Ca' na loshicmaxa pilchigui quiyim 'ec ne'necoqui' loshicmaxa, ca' ỹaatqajam imeuec. 15Ca co'na'le, ca' so Naamán chaqai sá'ogue so nauegaxauaripi quepegue' so Eliseo. Ca co'na' qaỹovira'a, ca' so Naamán 'naaco':
—¡Nagui, ca' ỹaatqajam seuanchigui quiyim quená'ogue na 'laua qaica ca qota'olec, qainaata quena Israel! Ca' ỹim nagui qouaquiric coñichiguit na ỹame saañiraxarom.
16Qam so Eliseo 'naaco' queso'maxare:
—Saanot da ỹa'qaatec ñi qara'gaxala' ñí'maq ya'ajantac, quiyim se secoñiguit.
Ca 'eno'm so Naamán 'ue da lepagaxallic, qam so Eliseo se icoñiguit so lame. 17Ca co'na'le, ca' so Naamán 'naaco':
—Hua', qam qouaquiric quiyim sa'ue ca i'ỹaac 'laua quena Israel, sellaalgoto naua dos que'lahi, ma' ỹim tot liỹa savigaxat ca ỹachitaxanataxanaxat queca nqolac, qaiñiita ñi qara'gaxala'. 18Qaidaata quiyim ñi'xoresene'tot ñi qara'gaxala', quiyim sqai caapeguem dajo caỹim, quiyim ma' ñi ỹashi eec quepegue' ñi qouagaxainaxaqui quiyim nqouagaxainot ñi nqolac Rimón, ca' sauaqate'e' quiyim sa'chi'iñi naua i'cootal quiñi qouagaxainaxaqui, ca sqai caapeguem dajo caỹim ñi qara'gaxala'.
19Ca' so Eliseo 'naaco' queso'maxare:
—Mo'e', qaica huapigui qavilli'.
Ca' so Naamán ca'e yi'maxare. Ca co'na' mashic qoỹoqo'tegue, 20ca' so Giezi só'maq lelaatec só'maq qota'olec letaxaỹaxaqui 'ñiichiquio' lauel:
—Ñi ña'co' ỹaxanetec quiyim pil so Naamán só'maq na'ñi yi Siria, qaica ca icoñiguit quesá'ogue só'maq nodoota so'maxare. Saanot ñi qara'gaxala' da ỹa'qaatec quiyim ỹim sco'uaategue so'maxare, ca nega'ỹo' cá'maq ñaqat queso'maxare quiyim nañaañim.
21Ca' so Giezi eec, co'uaategue so Naamán. Ca co'na' iuañi'chiguit co'uaataxanta queso'maxare, ca' renotec caso lahoglena, ca ca'guit. Ca inato':
—¿'Ue peeta'a ca qoyiuetaugui se no'uen?
22—'E', qaica —'naaco' so Giezi—. Qam ñi ña'co' nela' da la'qaatec quiyim chita'gue novite' yaua qota'olec letaxaỹaxaqui' ne'naqa chicqora'a yi quemaralec qa' ladocaipi quiyi Efraín, chaqai ỹahotaque quiyim 'ỹaañitem caua tres mil chiróla chicqaugui na lecat plata chaqai caua dos noho naloochiriñi.
23Ca' so Naamán 'naaco' queso'maxare:
—Qouaquiric coñichiguit ana seis mil chiróla chicqaugui ana plata.
Ca' so Naamán 'ue da lepagaxallic quiyim icoñiguit. Ca ishichiguilo saua dos soguel chaqai saua dos noho naloochiriñi. Ca ỹaanoto saua dos lelaatqa quiyim ỹauegue' so Giezi. 24Ca co'na' ỹovijta so qoỹoqoshi'megue 'laua, ca' so Giezi ỹacona aso plata i'xatete' saua nelaatqa, ca illaugui so lauo', ca' niquinto saua'maxare quiyim pile'. 25Ime, ca' eec quepegue' so na'co', ca' so Eliseo inato' so'maxare, 'naaco':
—Giezi, ¿negue' ca chicqoisa'gue?
—'Taque', ỹim qaica ca saigue —'naaco' so Giezi.
26Qam so Eliseo ipaca'a so'maxare 'naaco':
—Ca na' 'ue so ỹale ca'guit qami' chicqochiguiñigui aso lahoglena, ỹim seueta'anyi na'le queda ra'deenataxanaxaqui'. Qam quiyim nagui sqa taiguit quiyim qaicoñiguit aca plata chaqai ca nooỹac, loqo'm quiyim 'ue ca qarishiujnaxana nanaxanqa' 'uva loma' chaqai aca qagreta, ñii'lola, nelaatec chaqai aca nelaata. 27Ca' vichiguiño' da le'ne' so Naamán nategue qami' chaqai quena qachaalaxai'ipi, ca se neme, qaica lqodoc.
Ca co'na' so Giezi ca'e so Eliseo, ca' rishiita na loshicmaxa chaqai ỹalagaq, 'ec ana loñi.
