Da loviraxac so Espíritu Santo
1Co'na' noviro so na'xa'a leenaxat Pentecostés, ca sá'ogue só'maq huelec so Jesús lapoỹata' cá'ogue ca neeta'ñi. 2Ca' chi re'laqataxanta quiyim 'uo' so qara'xaỹaque, 'maqot na piguim. Da lelamaxa 'nejem na nonot lodegaxat, ilamigui nqai'en so 'imec neetaugui so qomyipi nqa'xantañi. 3Ca' re'oq so no'legaxanqateripi 'ec norec lauaq, neuagaxachichigui ỹaatqata ca taalec queca 'óna. 4Ca sá'ogue qano'xataxachichigui queso Espíritu Santo. Ca' quiyi, ca retaqa, ỹa'xate' naua ỹoqa'alo na'qaatqa, quecá'maq qoỹaanem ỹa'xat queso Espíritu.
5Ca' quesauajo na'xata' 'uo' quiyi Jerusalén na judío laseripi chicqote'ogalo quenaua lahil yi 'laua. So qomyipi queetalec quen ñi qota'olec. 6Ca' so qomyipi co'na' 'xaỹaque so lelamaxa, ca chaqa'ma' eec, lapoouo. Ca co'na' 'xaỹalo naua chi lalamqate' la'qaatqa quiyim qaỹa'xate', ca' se ỹa'den ca 'ne'tegue ca la'deenataxanaxac. 7Ca' sá'ogue i'laq chaqai 'ec no'daxatetec. Ca' chi retaxaỹata':
—¿Mesqai Galilea laseripi ná'ogue nataq retaqatac? 8Qam ¿chi'neco' ma' sa'xaỹaxalo nauá'maq chi qara'qaatqa ỹa'xateta'pe? 9Ỹaleque'ejta' na qom, 'ue na chicqa'gue da Partia, chaqai Media, chaqai Elam, chaqai Mesopotamia, chaqai Judea, chaqai Capadocia, chaqai Ponto, chaqai Asia, 10chaqai Frigia, chaqai Panfilia, chaqai Egipto, chaqai quedaua lahil yi Africa ná'maq paguec pa'aauec quiyi Cirene. Chaqai qai'neeta 'ue na romanollipi chi la'a' najo. Na'maxare 'ue ná'maq ỹaatqajam judío le'ec, chaqai 'ue na mesqai judío le'ec, qam ỹaatqajam huelec dá'maq huelec na judioipi. 11Chaqai 'ue qai'neeta na chicqa'gue da Creta, chaqai da Arabia. Qam qomá'ogue sa'xaiqachigui quiyim qaỹa'xatetac da 'neeta ñi qota'olec queda lecaic da lo'ueenataxanaxac, ma' qaỹa'xate' nauá'maq chi qara'qaatqa.
12Ca' sá'ogue so qomyipi chalego na le'laxa, ca se ỹa'den ca 'neeta ca la'deenataxanaxac, ca chi nenatetecta':
—¿Negue' ca 'neeto' dá'ogue dajo?
13Qam 'uo' so qomyipi chi i'neetac so'maxare, ca 'naaco':
—Na'maxare chi quiñiuguetaxaiquipi.
Da 'neeta da letaxaỹaxac so Pedro queso qomyipi
14Ca' so Pedro nachajñi, chaqai saua liỹa' once lelaatqa so Jesús. Ca' retaqa so Pedro, nelamaxaren, 'naaco':
—Qamiri ỹalliripi ñiỹa'ñi na Judea, chaqai ná'ogue na na'ñi na Jerusalén, sahotaque 'yiiñita dajo, chaqai na'xaỹaxañii'ta dá'maq sham sa'xat. 15Najo qomyipi mesqai quiñiuguetaxaiquipi. Sqaida dá'maq ra'deenataxanaxaguii, ma' chaqainaquita noỹoqoshi'megue añi ra'aasa. 16Najo huañichigui nagui chaqaina na ỹa'xateta'guit so la'qaataxanqajnec ñi qota'a, leenaxat Joel, co'na' 'naac:
17Cauajo pa'aaterec na'xata',
'naac ñi qota'olec,
saanec na ñi'Espíritu Santo, socorelec ná'ogue na qomyipi;
ca ra'qaataxan na ñaalqaipi, ỹale chaqai ana 'aalo ỹa'xat da ỹa'qaatec,
chaqai na ne'naqaipi 'ue na leuanaxanaxac,
chaqai na qo'xoiquipi 'ue na le'guemataxac.
18Quecauajo na'xata', ca seuagaxatec na ñi'Espíritu, socorelec na ilaatqaipi chaqai ana ilaataipi,
ca' ra'qaataxan, ỹa'xat da ỹa'qaatec.
19Na pa'aashiguim quena piguim sachaxane' naua ỹo'ueete' ca ne'laxa,
chaqai quena pa'aañi quena 'laua 'ue na netanqaipi,
neuo', norec, chaqai nesalaxaripi lodegaxat.
20Añi ra'aasa ñigui napalaxa,
chaqai ñi shiraigo 'ec leuoripi,
ma' saqa' novi' ca chalego lecaic na'xa'a ma' ro'ueenataxan ñi qara'gaxala'.
Cajo na'xa'a lodegaxat, qaica 'nejem loyac.
21Ca ná'ogue ná'maq nqouagaxainot ñi qara'gaxala', ca' chaqaica cá'maq qanca'laxatec.
22Qamiri ỹalliripi Israel laseripi, ñaq na'xaỹaxañiỹa dá'maq sa'xat nagui: So Jesús, Nazaret le'ec, ỹaatqajam re'qoota quiyim lelaatec ñi qota'a. Chaqai huañichigui quena' 'ue da ỹo'uet chalego da ne'laxa quená'maq se qaiuanapega, chaqai na netanqaipi. Naua'maxare ỹaatqajam qota'a lo'ueenataxanaxaco, qam qaiyiita ỹo'ueete' so'maxare na' qamiri ỹalequetauguilo. Chaqai mashic qamiri 'yiiñita. 23Qam na' qoỹaanouguilo qamiri quiyim ipaquichigui nqohin dá'maq la'deenataxanaxac ñi qota'olec nallaaqo', ca' qamiri coñirii chaqai lauachii, qaipatentaho nqai'ñii queso qomyipi hualoxonyipi. 24Qam ñi qota'olec lotqai liỹa nca'laxatec, naqata'a no'uenaqte'tegue queda lquesaxanaxa so nelauaxa, ma' so nelauaxa se ishit ỹoiquentac so'maxare. 25Ma' so nashi David, co'na' ỹa'xat so Jesús, 'naaco':
Aỹim ỹaatqajam seuantapega ñi qara'gaxala';
ñi'maxare neeta'gue da ỹoic, qaiyi qaica ca yi'loxolqachit.
26Vichiguiño' no'qaachigui añi i'taxanata queda ñitoonaxac, ca' quedaua ỹa'qaatqa, ca re'oq quiyim saỹaacotac.
Chaqai qai'neeta na ỹoshicmaxa queca nco'mataxac, qaica ca no'chitaque.
27Ma' qami' qota'olec, se no'ueenaqchira'ñi ca ỹa'al ca hua'ñi na leuaxaiquipi,
chaqai sqa 'maxariñi' quiyim ỹovirau'a quiyim tot no'uen na loshicmaxa na relaachiqui' rauochaxachi'.
28Chaqai yapaxaguiñiteque naua nayico tairau'a yi nca'laxa,
chaqai 'xoic ca ỹaỹaac ma' seuañiraxaua'.
29Qamiri ỹaqaỹa', ỹaatqajam re'qoota dajo ma' so 'auaxaic qarashi David ileu chaqai qaishinñi cañi lahi', qam añi'maxare ñaqa 'ue coqomi'. 30Qam so David ỹaatqajam qota'a la'qaataxanqajnec, chaqai ỹa'den ca 'neetapega ñi qota'a co'na' 'naac i'taxajñi quiyim 'uo' ca 'óna ma'le queso llaalqaipi, ca' chaqaica cá'maq nashi nca'laxaqui, ca' chaqaiso só'maq nqa'xanaxañi'ñigui aca nqa'xanaxaqui quiyim nashi. 31Ca' so David 'eco' shi'gue ra'iita'guit quesom na' ỹa'xat quiyim so qara'gaxala' liỹa nca'leuec, chaqai 'naac quiyim so la'al no'ueena'ñi na lapooqo' na leuaxaiquipi, chaqai vire'ta so loshicmaxa se ỹovira'a quiyim tot no'uen. 32Ma' ñi qota'olec chaqaiso' so Jesús liỹa nca'laxatec, ca' qomi' sauanqachigui, ca' sa'xataq. 33Ma' ỹahote'e da loic ñi qota'olec ỹaconsop so Jesús, ca qaỹaueguegue da piguim, chaqai icoñiguit quiñi leta'a na Espíritu Santo ná'maq mashic shi'gue ỹachaxantac; ca ná'ogue ná'maq qamiri huañichigui chaqai ná'maq 'xaichigui chicqo'ot ñi'maxare. 34Ma' mesqaiso so David taigue da piguim; ma' chaqaiso só'maq David 'naaco':
Ñi qara'gaxala' qota'olec 'naapego' ñi ỹa'gaxala':
“Nqa'xañiriñi pa'a'isa'gue da ỹoic,
35toco' ma' co'virelec nqaishin ná'ogue ná'maq pa'guentac qami'.”
36Ca ná'ogue na Israel laseripi ỹaatqajam ỹa'deenta quiyim so Jesús só'maq qamiri pachiñiho, ca' chaqaiso só'maq ñi qota'olec ỹanagui quiyim qara'gaxala' chaqai nashi nca'laxaqui.
37Ca co'na' qara'xaỹa dajo queso qomyipi, ca' rachitata añi le'taxanata, ca' qainat so Pedro chaqai so liỹa lelaatqaipi so Jesús:
—Qamiri qarqaỹa', qam nagui ¿negue' ca shinqata?
38Ca' so Pedro saat, ca 'naaco':
—Qamiá'ogue 'xañiñi naua se no'ueene' no'ueenataxagohi, chaqai qanachilaxane' qamiri, qaỹouen da leenaxat so qara'gaxala' Jesucristo, qaiyi ñi qota'olec ỹapalaxate' naua rasauaxashichiri, ca' ỹaañiỹaxarom ca Espíritu Santo. 39Ma' dajo qaỹachaxantac quiñi qota'olec ỹaatqajam taỹauguilo qamiri chaqai naua qachaalaxahi chaqai qai'neeta ná'ogue ná'maq qoỹoqo'ta, chaqai quená'ogue ná'maq ñi qara'gaxala' qota'olec roỹaxane'oga.
40Ca' quedauajo la'qaatqa so Pedro chaqai 'vii saua liỹa' ỹa'xate', ca' qata so qomyipi, 'naaco':
—'Iichiguit ca nouaxanaxaset na qomyipi sqaica huelec, qaiyi rca'lliuec.
41Ca sá'ogue só'maq huelec da la'qaatec so Pedro, ca' qanachilaxan. Ca' quesojo na'xa'a, ca' noquiiguec so inoxona'a da na'qaatec 'uo' ca tres mil qomyipi. 42Ca sá'ogue so qomyipi ỹaatqajam quejlec chaqai ỹa'maxate'tegue da lapaxaguinataxanaxague' saua lelaatqa so Jesús, chaqai ỹaatqajam na'deene'ejta', chaqai quena' nqouagaxain chaqai quena' que'e, ca lotqai lapoỹata'.
Da no'ueenataxac só'maq 'auaxaic ỹacoñiguit da na'qaatec
43Ca sá'ogue so qomyipi 'xoic na le'laxa, ma' 'xoic na netanqaipi chaqai ná'maq qaỹauanchigui se qaỹauanapega queda lo'ueenataxanaxague' saua lelaatqa so Jesús. 44Sá'ogue só'maq ỹacoñiguit da na'qaatec ỹaatqajam sqo ỹora'chi chaqai notaanta'ta' quena louenqaipi. 45'Uo' na imen na la'a' chaqai na louenqaipi, ca nasectaqchigui aca laseuete quecá'maq taachi'ñi ca louenaxanaxa ca 'óna. 46Chaqai naua'que naua na'xata' lapootecta' cañi no'ueenaxanaxaqui quiyi Jerusalén, chaqai quenaua la'aate' nouanta'ta' quena' que'e 'xoic laỹaac chaqai ỹaatqajam hueetagui añi le'taxanata da neneequesenaxac. 47Ỹa'xatetac qaica 'nejem ñi qota'olec, ca ná'ogue na qom nqo'ta. Ca' quesaua na'xata' ñi qara'gaxala' ỹoqotqajno ná'maq ỹacoñiguit yi na'qaatec ná'maq dalaxaic nca'leuec nqohin.
