Da lasauaxasete' saua Ananías chaqai aso Safira
1Qam so liỹa ỹale leenaxat Anaías chaqai aso loua Safira, saua'maxare imeene' ca na'laua'. 2Sojo ỹale na'deene'e' aso loua quiyim ỹoxojñi so lahi aso laseuete so na'laua'. Ca' ỹodouo so lahi quesaua nelaatqa 'ec sá'ogue nalo'ojta'. 3Qam so Pedro 'naaco':
—Ananías, ¿chi'neco' ma' inoxono' so na'ỹaapec cañi re'taxanata'e' quiyim ỹo'uet quiyim na'majñitot so Espíritu Santo, ca sectaqchirigui aca laseuete so na'lauahi? 4¿Mashic 'ec se qatooỹaqui'o' ca 'laua? Chaqai mashic ime miiñi', ca ¿mese qadami'o' acá'maq laseuete? Qam ¿chi'neco' quiyim taachiquio' qavilli' quiyim 'viichi' dajo? Se na'majñitot ca chaqai qom, qam qami' na'majñitot ñi qota'olec.
5Ca co'na' 'xaỹa dajo so Ananías, ca huaañi, ca' chaqa'ma' ileu. Ca sá'ogue só'maq mashic ỹa'den dajo, ỹaatqajam 'xoic da lqolonaxa. 6Ca novirero' saua ne'naqa, ca' qalepategue so'maxare, ca qaỹodouec, ca qaishinñi.
7Ca co'na' ncopa, 'uo' ca tres horas, ca noviro' aso loua so Ananías. Aso'maxare se ỹa'den da 'neeta so loua. 8Ca' so Pedro inato' aso'maxare:
—Aỹim 'qaataxañitem. ¿Chaqaso' aso laseuete ca na'lauahi na' miiñii?
Ca' so'maxare 'naaco':
—Ajá'a, chaqaso.
9Ca' so Pedro 'naapego' aso'maxare:
—¿Chi'neco' na'yiiñigui quiyim viitaque 'guiñii so Espíritu chicqo'ot ñi qara'gaxala'? Queda pa'aauec chita'gue novirero dauá'maq ỹodoorec ishiñiñi ca roua'e'. Ca' naquita qai'neeta qarodo'irec.
10Ca' quiyi, ca chaqa'ma' huaañi aso'maxare, ca ileu quiyi reloqota'ñi so Pedro. Ca' novirero saua ne'naqa, ca' iuaneterelec ileu, ca lotqai qaỹodouec, qaishinñi, qaỹauaxaỹaxante'e' yi loua. 11Ca sá'ogue só'maq mashic ỹacoñiguit da na'qaatec chaqai so liỹaripi co'na' ỹa'den dajo, ca ỹaatqajam 'xoic da lqolonaxa.
'Xoic na se ỹauana qaiuanchigui chaqai na netanqaipi
12Quesaua Jesús lelaatqa 'xoic na qaỹo'uet quena netanec chaqai na se qaiuanapega quena qomyipi, ca sá'ogue lapoỹata', hueeta'ñi yi nasoxoc yí'maq leenaxat Nasoxoc so Salomón. 13Qam sqaica ca lapoouo quená'maq saqa' icoñiguit yi na'qaatec, qam na'maxare ỹaatqajam imaqachin ná'maq lapootecta'. 14Ca' 'xoic na dalaxaic huelec so qara'gaxala', ỹale chaqai ana 'aalo. 15Ca vire'ta quiyim qanaueguec na ralolaxaic quenaua nayico, ca' qaillaalgoto naua lomalate' chaqai naua lacanqa. Ca' quiyim que'tegueyi so Pedro, ca ỹovira'ogalo ca la'al saua'maxare. 16Chaqai quena na'aateripi sqoỹoxe'oga 'xoic na qom novira'a yi Jerusalén, nodou'a na ralolaxaiquipi chaqai na 'ue na le'ec lecmaxaic. Qam ná'ogue imeuec.
Qaỹocana'pe so Pedro chaqai so Juan
17Ca' so lashi na netaxaỹaxanqajanqaipi chaqai so lotauaripi naneretaugui na leenaxat saduceo, saua'maxare 'uo' da lpa'guenaxanqa'. 18Ca' qaiconlgoto saua lelaatqa so Jesús, ca qaicoñite', qoỹandaugui añi ncoñiitaxanaxaqui late'ogue'. 19Qam queca pe so chicqashiguim qota'a lelaatec ỹauachiguilo naua lasomi' aca ncoñiitaxanaxaqui, ca naqata'alo saua'maxare. Ca 'naapegalo:
20—Mohi, nachaachiñi cañi no'ueenaxanaxaqui quena Jerusalén, ca' 'qaataxañii quiyi qomyipi queda nca'laxa dalaxaic.
21Ca co'na' 'xaita dajo, ca co'na' nete'etam queca liỹa na'xa'a, ca inoxondougui añi no'ueenaxanaxaqui, ca rapaxaguinataxanta'pe.
Qam só'maq lashi na netaxaỹaxanqajanqaipi chaqai so lotauaripi lapoonta' na nashillipi ỹo'ueetegueñi na leloxoỹaxaquipi, ná'maq paguec qo'xoiquipi quena llaalqaipi so Israel. Ca qarelaataxane'ogalo saua lelaatqa so Jesús cañi neesaugui ncoñiitaxanaxaqui. 22Qam co'na' ỹovirere'oga aca ncoñiitaxanaxaqui saua nouaataxanaq lase', ca' caua'maxare sqaicaua. Ca pile' quiyim ỹahote da na'xaỹaxac. 23Ca 'neraco':
—Sa'ajanqatac añi ncoñiitaxanaxaqui napoochigui chaqai daua nouaataxanaq lase' 'vii, reloqosa'alo naua lasomi'. Qam cana' sauataxagui, qaica ca sanataxa quena lauel.
24Qam so lashi na netaxaỹaxanqajanqaipi chaqai so lashi na reloqota'a añi no'ueenaxanaxaqui chaqai so lashillipi na netaxaỹaxanqajanqaipi, ca saua'maxare co'na' ỹa'deene' dajo, ca nenatetecta' tegue' canchaqa taỹa'gue dá'ogue dajo. 25Ca' quiyi, ca 'uo' so ỹale ỹoviro, ca 'naapegalo':
—Dauá'maq ỹale' ỹañiỹaugui añi ncoñiitaxanaxaqui, hueese'e añi no'ueenaxanaxaqui, rapaxaguinataxanta'pe quena qom.
26Ca' eec so lashi ná'maq reloqota'a añi no'ueenaxanaxaqui, liỹa' saua nouaataxanaq lase', naueguero saua'maxare. Qam ỹa'maxate'teguelo, ma' no'chiisa'a na qom quiyim qainaxai' quena qa'. 27Ca co'na' qanoviraxate', ca qaỹaueguereu'a so lapoota'ta' nashillipi quiyim qaỹo'uet ca leloxoỹaxac. Ca' so lashi na netaxaỹaxanqajanqaipi 'naapegalo' saua'maxare:
28—Qomi' sqaica ma' sa'maxarenaq quet quiyim paxaguinataxañita'pegue da leenaxat so Jesús. Qam ¿negue' dá'maq 'viichitac? Mashic no'xataxachiigui ná'ogue na Jerusalén quedá'maq rapaxaguinataxanaxaguii qamiri, chaqai viitaque pataxailgoto qomi' quiyim qarasauaxaset da lelauaxa so ỹale.
29Ca' so Pedro chaqai saua liỹa' nelaatqa 'nera'po':
—Qam qomi' ỹaatqajam paguec ña'xaỹaxanaxa ñi qota'olec quecanchaqaica qom. 30Ñí'maq qota'olec queso 'auaxaic qareta'allipi, ñí'maq liỹa nca'leuec nqai'en so Jesús, só'maq qamiri lauachii chaqai togoxoiuo queso npatenaxala'. 31Qam ñi qota'olec ỹaueguegue da piguim, ca ỹana'gue da loic, chaqai ỹanagui quiyim nashi chaqai nca'laxaqui. Ma' ñi'maxare ỹahotaque ledaaqa' quiyim netacocha, ca ỹalate' naua lanatqa na Israel laseripi, qaiyi qaỹapalaxate' naua lasauaxasete'. 32Ca' quedajo seuanqachigui qomi', ca sa'xataq chaqai so Espíritu Santo, só'maq ñi qota'olec ỹaanem ná'maq na'xaỹaxana.
33Ca co'na' 'xaỹa dajo so nashillipi, ca ỹaatqajam ro'o, ca' ỹahosaque qaỹalauate' saua'maxare. 34Qalaxam queso nashillipi 'uo' so ỹalequetaho fariseo, leenaxat Gamaliel. So'maxare napaxaguinataxanaq quena nelaataxanaxaquipi, ma' so'maxare na qomyipi ỹapacauec nqai'en. So'maxare nachajñi, ca 'naapegalo quiyim qaỹaueguere'oguiyi lecocho'qui' saua lelaatqa so Jesús. 35Ime, ca' 'naapega so nashillipi:
—Qamiri ỹale' Israel lase', rovichiỹari'o' quedá'maq sham 'ñii'teguelo dauajo ỹale'. 36Ñaq no'viñigue quiyim 'vio' saua na'xata' na' ne'laxashiguim so Teudas, ỹa'xat quiyim so'maxare ỹaatqajam 'ue da 'negue, ca qaico'uajlec queso 'uo' ca cuatrocientos ỹalliripi. Qam qaỹalauat, ca sá'ogue só'maq coỹareta'pegue' neuagaxatac, ca' da lo'ueenataxanaxac chi na'lliichiguiñi. 37Chaqai ñaqai cha'gue nachinchigui so na'xa'a na' qoỹiriñi na qomyipi na' nachaxan so leenaxat Judas, le'ec yi Galilea, qai'neeta 'xoic so qomyipi quegue; qam qai'neeta qaỹalauat, ca sá'ogue neuagaxatac só'maq coỹareta'pegue'. 38Vichiguiño' nagui 'xañiỹa'pe dauajo ỹale', mesqa 'iỹapega'alo. Ma' no'm dajo chi lo'ueenataxanaxac na qom, ca ime'uegue ma'le. 39Qam no'm ñi qota'olec lo'ueenataxanaxac, ca' qamiri sqai shichii huagaxachiỹac. Vichiguiño' rovichiỹari', 'neeto' loguiita'pegue', pa'guiñitac ñi qota'a.
40Ca sá'ogue so qomyipi chaqaida nqai'en da la'qaatec so Gamaliel. Ca qaroỹaxane'ogalo saua Jesús lelaatqa, ca qaỹouaxane', ca' qaỹaqatalo quiyim tot liỹa ỹa'xate' da leenaxat so Jesús. Ime, ca' qoỹaxandec. 41Qam ỹaatqajam 'xoic da netoonaxague' saua lelaatqa so Jesús co'na' que', chicqoterougui so nashillipi, ma' ñi qota'a ỹoviraqta'alo da ne'naxague' souesapigui da leenaxat so Jesús. 42Ca lama'xa sqai ỹaxañiñi da lapaxaguinataxanaxague' quiyim ỹa'xatesac so Jesucristo naua'que naua na'xata', quiñi no'ueenaxanaxaqui chaqai quenaua na'aate'.
