Hechos 4

₁So Pedro chaqai so Juan ñaq retaqasapougui so qomyipi, co'na' noviriri' so letaxaỹaxanqajanqaipi na qomyipi quena' qaretaxaỹa'pegue' ñi qota'a. Chaqai qai'neeta novi' so lashi ná'maq reloqota'a añi no'ueenaxanaxaqui quiyi Jerusalén, chaqai so ỹalliripi chicqaugui na leenaxat saduceo. ₂Ỹaatqajam sá'ogue ro'o, ma' so Pedro chaqai so Juan ỹapaxaguinsac so qomyipi, ỹa'xatesac quiyim no'm 'ue ca ileu ishit liỹa nca'leuec, ỹaatqajam re'qoochigui nqohin, ma' liỹa nca'leuec so Jesús. ₃Ca' qaiconlgoto, qaicoñite', qoỹandaugui añi ncoñiitaxanaxaqui, qaỹoviraqtera'guit ca nete'e, ma' mashic vito' na'le. ₄Qam 'xoico' quesó'maq na'xaỹaxantapega da na'qaatec, ca huelec; ca noquiiguec só'maq ỹacoñiguit da na'qaatec, ca 'uo' ca quiyim nodaatec so ỹalliripi, 'uo' ca ỹovi' cinco mil.

₅Ca co'na' queca nete'e, ca lapoỹata' quiyi Jerusalén so lashillipi na judioipi, chaqai na qo'xoiquipi, chaqai na rapaxaguinataxanta'pegue na naqataxaquipi. ₆Qai'neeta ỹalequetaho so Anás, lashi na netaxaỹaxanqajanqaipi, chaqai so Caifás, Juan, Alejandro, chaqai sá'ogue so lauo' so nashillipi quená'maq netaxaỹaxanqajanqaipi. ₇Ca' qarelaataxana'alo quiyim qanaueguerec so Pedro chaqai so Juan. Ca' qoỹandañigui na lavinñi, ca' qainate':

—¿Negue' ca qamiri lelaatqa? chaqai ¿negue' leenaxat ca 'ueenataxañitapega quedajo?

₈Ca' so Pedro no'qaachigui queso Espíritu Santo, ca 'naapegalo':

—Qamiri nashil quena judioipi chaqai na qo'xoiquipi quena Israel laseripi, ₉mashic qamiri qarenachii quedá'maq 'neeta, quedá'maq no'uen qaỹo'uet queca ỹale ralolaxaic, ma' viitaque 'yiiñii negue' cá'maq 'neeto' na' imeuec. ₁₀Ca' nagui sa'qaataxanaxalo qamiri, qaiyi ná'ogue ỹa'den na Israel laseripi quenajo ỹale hueete'ena nagui ỹaatqajam imeuec chicqochigui da leenaxat so Jesucristo, Nazaret le'ec, só'maq lauachii chaqai pachiñiho, qam ñi qota'olec liỹa nca'leuec nqai'en. ₁₁Qamiri 'imec lo'ollipi, sojo Jesús só'maq ỹaatqajam qa', qam qamiri sqai coñiguit, chaqaiso só'maq ỹovita nagui quiyim ra'ñichiguiñi nqai'en ca 'imec, sqai 'nejem ca liỹa qa'. ₁₂Chaqai qaica ca liỹa chicqochigui ca nca'laxa. Ma' ñi qota'olec qaica ca liỹa neenaxat ỹaanema qomi' quiyim qarca'laxaqui, chaqaisoota so leenaxat so Jesús.

₁₃Co'na' so nashillipi ỹa'den quiyim se no'chiiralec da letaxaỹaxague' so Pedro chaqai so Juan, chaqai retane' quiyim saua ỹale' sqai napaxaguinaxaqa chaqai saua'maxare chaqai qomi', ca 'ue da le'laqa'. Ca' qaỹa'deene' quiyim ỹalequesaugui na nauegaxauaripi so Jesús. ₁₄Chaqai da liỹa, ma' só'maq ỹale mashic imeuec qai'neeta hueete'eyi nachaatetañi, vichiguiño' qaica ca qohinac se ỹa'maxañi. ₁₅Ca' quiyi, ca qailarerec, qaiyi se ỹaleguero queso lapoxoc, ma' so nashillipi ỹahotaque quiyim noda'ajta', ca retaxaỹata'. ₁₆Ca' 'nera'po':

—¿Chi negue' ca shinqa'teguelo' saua ỹale'? Ma' ná'ogue na na'ñi na Jerusalén ỹa'den quiyim ỹo'ueete' dajo netanec se qaiuanapega, ca' se seshitaq quiyim soqollictaq. ₁₇Qalaxam quiyim sahoqai ca lqodoc dajo, qaiyi sqai eec quiyim qaỹa'den quena qomyipi, sadenaxalgoto' quiyim taachi'ñi tot ỹa'xate' da leenaxat so Jesús.

₁₈Ca' qaroỹaxane'ogalo, ca' qohinapegalo quiyim chaqa'ma' taachi'ñi quiyim tot ra'qaataxane', chaqai tot rapaxaguinataxantegue da leenaxat so Jesús. ₁₉Qam so Pedro chaqai so Juan 'neraco':

—Ñaqai 'deenataxañiỹac qamiri tegue' chaqai 'maxaraic quiñi qota'olec quiyim ña'xaỹaxanaxalo qamiri, ca' ñi'maxare, ca' se ña'xaỹaxanaxa. ₂₀Ma' qomi' se seshitaq quiyim saxanaxañi sa'xataq cá'maq sauanqachigui chaqai cá'maq sa'xaiqachigui.

₂₁Ca' so nashillipi ỹaatqajam ỹadeneguelgoto, qam qaỹosoorec. Se qaỹa'den cá'maq qohine'tegue quiyim qaỹouaxane', ma' sá'ogue so qomyipi imaqachintac ñi qota'a quedá'maq 'neeta so qaỹo'uet. ₂₂Ma' so ỹale só'maq qaỹomatec, só'maq qailliichigui dajo netanec lodegaxat, mashic napacalgoto cuarenta ñaxari.

₂₃Ca' so Pedro chaqai so Juan mashic qaỹosoorec, ca' que', querepegue' ca hueeta'ñi ca liỹaripi, ca ra'qaataxanta'pe quedá'ogue dá'maq qaỹa'xatema queso lashillipi na netaxaỹaxanqajanqaipi chaqai queso qo'xoiquipi. ₂₄Ca co'na' qara'xaỹalo saua'maxare queda ỹa'xate', ca sá'ogue nqouagaxainot ñi qota'a. Ca 'naaco':

—Qami' qara'gaxala', ma' ỹaatqajam qami' qota'olec ro'ueenachiqui' na piguim chaqai na 'laua, chaqai ana huaaxai, chaqai ná'ogue ná'maq nanchaqaina. ₂₅Ma' qami' chigoxochiterougui so Espíritu Santo quiyim ra'qaataxan nqai'ñi' so relaachiqui' nashi David, na' 'ñirac:

₂₇Ma' llic quiyim so nashi Herodes chaqai so Poncio Pilato lapoỹata' quenajo na'a' lodegaxat, chaqai na chicqauec ỹoqa'a, chaqai na Israel laseripi quiyim npa'guene'e' so co'teeta qachaalqui' Jesús, só'maq rca'acshiqui' quiyim nashi nca'laxaqui. ₂₈Ca' saua'maxare co'na' ỹo'ueete' dajo, ỹaatqajam taachigui nqai'ne' dá'maq shi'gue 'maxachisañi, ca ipaquichigui nqohin. ₂₉Qam nagui qami' qara'gaxala' qota'olec, 'ajñi' da npa'guenaxague', ca' 'ỹaañitem ca la'ñaxague' lavilli' caua relaataxahi', qaiyi ma' ỹa'xate' naua ra'qaataxahi' qaica ca no'chiiraque, ₃₀chaqai ỹomaterec na ralolaxaic quedá'maq rquesaxanaxa'e', chaqai ỹo'ueete' na netanqaipi chaqai na se qaiuanapega, quiichigui da leenaxat so co'teeta qachaalqui' Jesús.

₃₁Ca co'na' ime da nqouagaxainaxague', ca' i'loxol ca neesa'ñi lapoota'ta'. Ca sá'ogue qano'xataxachichigui queso Espíritu Santo. Ca' qaica ca no'chiiraque ỹa'xatesac da la'qaatec ñi qota'olec.

₃₂Ca 'xoico' só'maq mashic ỹacoñiguit da na'qaatec, ca' qana'yiinchigui quiyim 'oonoqui' da na'deenataxanaxac. Qaica ca se ỹasen ca louenec, ma' na nouenqaipi ná'ogue qanouantagui. ₃₃Ca' so nelaatqaipi 'xoic da lquesaxanaxa, ca' eec da na'qaataxanaxac, qaỹa'xatetac so qara'gaxala' Jesús quiyim mashic liỹa nca'leuec. Ca' ñi qota'a 'xoic da lqouagaxa quesá'ogue so qomyipi. ₃₄Sqaica ca 'ue ca ỹouentaque, ma' ná'ogue ná'maq 'ue na na'laua chaqai na 'ue na lauo', imen, ca ỹodouo ana laseuete, ₃₅ca ỹaanema saua lelaatqa so Jesús. Ca saua'maxare, ca ỹasectaqchirigui, naloqojonterec quecá'maq taachi'ñi ca nouenaxanaxa. ₃₆Ca' 'uo' so ỹale ỹalequetaho, leenaxat José, ne'xaỹoqsoqo' yi delec leenaxat Chipre, so'maxare chicqaugui na lotauaripi na netaxaỹaxanqajanqaipi, llaalqaipi so Leví. Ca' saua nelaatqa ỹahote da dalaxaic leenaxat Bernabé. Dajo neenaxat 'naac: Cá'maq lo'daxachigui na neuel. ₃₇Sojo ỹale chaqaiso só'maq imen ca na'laua, ca ỹodouo aca laseuete, ca ỹaanema saua lelaatqa so Jesús.