Qaiuana aso nanecse ala ỹiita hueetañigui aso lahi'
1Dajo dá'maq ỹachaxañim na'le ñi qara'gaxala' qota'olec: 'Ue ana ỹiita nanecse ala hueetañigui aso lahi'. 2Ca ñi qara'gaxala' yinat:
—Amós, ¿negue' ná'maq 'ajñisac?
Ca shinac:
—Nanecse ala ỹiita hueetañigui añi lahi'.
Ca 'naac ñi qara'gaxala':
—Na Israel mashic ỹovita yi lqodoc, ca' tot qaica ma' liỹa quet yqouaguegue. 3Ca ỹovita ma'le cajo na'xa'a quiyim na no'ueenec quiñi 'imec lodegaxat ñigui ma'le ca ỹenaxac. 'Xoic ca qom ileu ma'le, ca' chi nachicochiguiñi, ma' qainaxe'oguiyi na leuaxaiquipi. Ñi qara'gaxala' i'taxajñi da la'qaatec.
Mashic nepalata da nouaxanaxaset yi Israel
4Ñaq na'xaỹaxañiỹa dajo qamiri, ma' qamiri nauá'maq pataxaiñi quen na 'xoraiquipi chaqai viitaque palaxachiỹac ná'maq qaica nqaiyi quena 'laua. 5Qamiri nauá'maq 'ñiỹaiquen: ¿Laquio' chaqai ime'uegue na nemaqachic quena dalaxaic shiraigo, qaiyi liỹa semeenaq na trigo? ¿Laquio' chi ime na na'xa'a co'mataxaqui, qaiyi semeenaq na nanecsec ala, qoỹoqota'a nqaishinaq chaqai sahoqe ca shinqa'tegue ana qaresallaqataxanaxaqui, rocachi nqaishinaq? 6¡Ñqo'naxataxauec ca le'xoric na 'xoraiquipi, vire'to' ma' ỹovita quiyim chi nemeenalta' quiyim qara'ac quiyim ishiueten aca la'uale, 'eno'm qaicauate' caua nepelate' la'ualqa! ¡Ca' semeenaq ma'le vire'ta na se no'uen trigo! 7Ñi qara'gaxala' qota'olec, ñí'maq qaimaqachin na'le queso Jacob, ỹaanec da la'qaatec quiyim qaica ma' ỹa'laxate quet dá'maq se no'uen 'neetari' na qomyipi.
8Ca vichiguiño' i'loxol ma'le na 'laua quedá'ogue dajo,
ca noỹentagui ma'le ná'ogue na neetalec na 'laua.
¡Na 'laua noquiicshiguim chaqai nqo'ñiñi,
'ec na huaxaỹaq caso lachiugue Nilo!
9Ñi qara'gaxala' i'taxajñi da la'qaatec quiyim quecajo na'xa'a,
ca' polec nqai'en añi ra'aasa queca na'xa'a lavinñi,
ca' quecajo ma'le, ca' ỹaatqajam na'xa'a,
qam 'xoic ca napalaxa ma'le quena 'laua.
10Na remaqachiguipi ñigui nqaishin ca ỹenaxac sauaxat na leuaxaiquipi,
chaqai na ro'ueenaxanaxaguipi ñigui nqaishin ca ỹenaxac quena' 'ue yi qaishinñi;
so'uet quiyim qamiri ñiiñi caua noho nachicoxoqui',
chaqai selaxachilgoto naua rqahigori netanec nqai'ñii caqamiri quiyim 'xoic da nqui'ic.
Ca' noỹiñii ma'le 'ec cá'maq qom na'laañi ca 'oonoqui' llaalec,
ca ma' ime dajo, qam no'ueenashiguim ca 'xoic nachicoxo.
11Ca ñi qara'gaxala' i'taxajñi da la'qaatec, 'naac:
Naate' naua na'xata',
Ca quenaua'maxare, ca so'uet ca nqopaaxa quena 'laua;
mesqai ca nqopaaxa queca pan chaqai neueetaxanaxa queca niquip quiyim qaica ca huaxaỹaq,
ta'ta'a quiyim 'ec qopat ỹahotaque 'xaỹalo naua qota'olec la'qaatqa.
12Na qomyipi taaguilo ma'le,
idaantapigui naua la'qaatqa ñi qota'olec;
queetegueñigui na huaaxaipi
chicqo'tegue da rapiguim, ỹovira'gue da lqodoigue,
qam se ỹanata da na'qaatec.
13Na lo'yaxana nequetegaxaipi chaqai na 'ñaaxaic lauel ne'naqaipi
ileueta ma'le quena laquip quecajo na'xa'a.
14Ná'maq nallitalta' ỹaanec da la'qaatec quena nqolaquipi quiyi Samaria,
ná'maq 'naac: Spi'ỹa'a ñi nashiilec na'ñi yi Dan,
loqo'm 'naac: Spi'ỹa'a na nashiilqaipi nqolaquipi quiyi Beerseba,
na'maxare huaañi ma'le, ca' tot ne'laxashiguim.
