Colosenses 2

₁Ma' sahotaque quiyim 'yiiñii quiyim ỹaatqajam ña'ñaxat seloquiteguelgoto qamiri, chaqai quená'maq neeta'ñi yi Laodicea, chaqai quená'ogue ná'maq se iuanapiguiỹa'. ₂Ca' 'ue da iloquiaxac, ma' sahotaque quiyim ra'ñiiguilo na lauele', ca neconta' queda ne'xorenataxanaxa, chi ỹovireta'a qaica ca ỹouen nalogoñi da lpi'ỹaxac chicqochigui da la'deenaxanaxa, quiyim ỹa'yiinchigui dá'maq se re'xogui ỹachaxantac ñi qota'a, ca' chaqaiso so Cristo. ₃Ma' chaqaiso só'maq ỹomata'ta' hueetaugui ná'ogue na na'deenaxanaxa chaqai da na'deenataxanaxac. ₄Ca sa'xatema qamiri dajo, qaiyi qaica ca ỹayine' qamiri, 'eno'm 'ue ca 'maxaraqa caua la'qaatqa. ₅Ma' 'eno'm se salequetauguilo qamiri, qam 'ec salequetauguilo qamiri quedá'maq se re'xogui ño'ueenataxac. Chaqai ỹaatqajam ñitoonta'peguelo qamiri ma' 'maxaraic dá'maq 'ñiitari', chaqai quiyim sqai 'xañiuec da rpi'ỹaxaguii queso Cristo.

₆Vichiguiño' quedá'maq 'ñiitari' na' coñiguit so qara'gaxala' Jesucristo, ca' chaqaida 'ñiitari' na'yiitau'a so'maxare, ₇'ec 'vii lpa'yii da nachaalataxaguii na'yiitalec so'maxare, chaqai queda rpi'ỹaxaguii 'ec no'xoñiitalec so'maxare. Ma' chaqaida dá'maq qaỹapaxaguinguelo qamiri na'le, ca' se neme 'ỹaañitacot da na'aachicyaxaguii ñi qota'a.

₈Rovichiỹari'o', 'neeto' lotqai quii'uegue ná'maq ỹahotaque rayiñii, ỹahote'e ná'maq na'deenaxanaxa huelec najo chaqai na sqai llic na'deenataxanaxac. Ma' na'maxare sqai chicqochigui so Cristo; ta'ta'a ná'maq chi no'ueenataxac na qomyipi, chaqai quedá'maq la'deenataxanaxac chaqainaata ỹa'deentapega ná'maq nanchaqaina re'qoochigui.

₉Ma' dá'ogue dá'maq no'ueenataxac ñi qota'a ỹaatqajam hueetagui da nachaalataxac so Cristo. ₁₀Ca' nagui ỹaatqajam no'qaachiguilo qamiri queda no'ueenataxac ñi qota'a, ma' na'yiitau'a so Cristo. So'maxare chaqaiso só'maq napacalec ná'maq nashillipi chaqai ná'maq nquesaxanaxa se re'xogui. ₁₁Chaqai quiyim na'yiitau'a so Cristo, ca' qaỹa'ue na netanegue' qamiri; qam mesqai ná'maq re'qoochigui quena noshicmaxa, ta'ta'a quiyim na' qanca'laxaterec qamiri quena nasauaxaset queda lamaanaxanqachic na roshicmaxahi. Ca dajo dá'maq netanaxac na qom chicqo'ot so Cristo. ₁₂Ma' cana' qanachilaxane' qamiri, ca' riỹahita'ñi' na' qarishiñiñi so Cristo. Ca' quedajo, ca' qai'neeta riỹahitashi'me' so'maxare na' liỹa qanca'laxatec, ma' viilec da lquesaxanaxa ñi qota'a ñí'maq liỹa nca'laxatec na'le so'maxare. ₁₃Ma' qamiri quesaua 'auaxaqa ñaxari 'ec qamiri leuaxaqa sauaxat na rasauaxashichii chaqai sqaica ca netanaxashichii. Qam nagui ñi qota'a, ca' ỹo'uet quiyim rca'laxauahi so Cristo na' ỹapalaxat ná'ogue na rasauaxashichii. ₁₄Ñi qota'a ỹapalaxat aso qara'uale só'maq ỹo'ueetetac da qanouaxanaxaset ma' se sepacqajnaxagui dá'maq 'nerac naua naneresañi naqataxaco. Qam ỹomachigui aso qara'uale, ca 'ec pateno queso npatenaxala'. ₁₅Ma' so Cristo co'na' ileu na' qaipateno queso npatenaxala', ca' loxonec ná'maq nashillipi chaqai ná'maq nquesaxanaxa se re'xogui. Ca' qaỹauanchigui quiyim qaica ca 'negue nqai'en na' ỹauec 'ec lcoñiitecseripi na' rauegaxan.

₁₆Ca' vichiguiño' caqamiri qaica quet cá'maq qoyiqueteguelec caqamiri quecá'maq qanoxohi chaqai quecá'maq ni'chiigui, loqo'm quecá'maq nemaqachic na'xa'a, loqo'm queca dalaxaic shiraigo, loqo'm queca na'xa'a co'mataxaqui. ₁₇Ma' ná'ogue najo chi lqui'i cá'maq novi' ma'le, qam dá'maq ỹaatqajam leloxoỹaxac chaqaiso so Cristo. ₁₈Mesqai 'xañiigue quiyim rouootaxana'gue cá'maq raviguiguii ná'maq 'ec nañoxojñi neneequesenta chaqai nqouagaxaintacot na nelaatqaipi piguim laseripi. Ma' na'maxare tau'a quiyim ỹo'uet ná'maq se iuanapega chaqai pi'chigui queda nemaqajnaxac quená'maq chi la'deenataxanaxac. ₁₉Na'maxare ỹoqota'oga queso Cristo só'maq lqahic na mashic icoñiguit da na'qaatec. Chaqai nqo'naxatetashiguim, ỹahotaque da lquesaxanaxa, chaqai ỹo'xonta' ná'maq ỹoreta'oguit louenqaipi, ipaquichigui nqai'en dá'maq ỹahotaque ñi qota'a.

₂₀Ma' qamiri quiita'ñi' so Cristo na' ileu, ca' le'en dá'maq chi ra'deenataxanaxaguii quiyim 'yiiñitapega ná'maq re'qoochigui. ¿Chi'neco' ná'maq 'viichitac ma' 'ñiitari' ná'maq hueetalec na 'laua? Ca 'viichitac na napaxaguinataxaquipi ₂₁ma' 'neetasa': “Sqai pochirau'a najo, totaxan a'qui' yijo, mesqai coñita cajo.” ₂₂Ma' ná'ogue na qarapaxaguinataxanta'pegue, na'maxare 'ue lqodoc, ma' najo napaxaguinataxanaxaquipi chi lelaataxanaxac na qomyipi. ₂₃'Nesa ma' llic quiyim ná'ogue najo 'ec quiyim ỹaatqajam 'ue ỹa'den cá'maq qom ỹo'uet. Ma' ilarelec da nqouagaxainaxac, neneequesenaxac, chaqai ỹo'uet da le'xoric na loshicmaxa. Qam na'maxare se ỹotauan quiyim nollaalta' queda lamaanaxanqachic na loshicmaxa.