Deuteronomio 13

₆Ca no'm ca ỹaatqajam ralamaxarichi' rqaỹa'e', loqo'm ca qachaalqui', loqo'm aca qachaalli'i', loqo'm aca rqo'itqachi'i' roua'e', loqo'm ca nauochaxaua'e' riỹa'e' quiyim nemootetacot qami' quiyim nqouagaxaiñitot ca nadenqatec nqolac sqai huañirapega chaqai saua 'auaxaqa qata'alli', ₇ma' 'ue na lqolaquipi lashiilec na qomyipi sqoỹoqaque chaqai na qoỹoqo'ta ỹaqaletene' naua lahil na 'laua, ₈se nañaañichiguit dá'maq 'neeta'pegue, chaqai se na'xaỹaxañita, chaqai sqai 'xoriñi'; se rqouaquitegue chaqai sqai 'xochisegueñi. ₉Ta'ta'a quiyim lauachi'. Ca' qami' ná'maq 'au 'ue ca 'ñitetegue ca'maxare. Ca ma' ime, ca qalam ná'ogue na liỹa qomyipi. ₁₀Ca' naqai', do'isa'a na qa', chi ỹovireta'a quiyim ileu nqai'ñi' sauaxat quiyim ỹahotaque ỹoỹootec aqami' quiñi qara'gaxala' qota'olec caqami', ñí'maq naqata'a qami' na'le quiyi Egipto yí'maq hua'ñi na' qami' na'ac. ₁₁Ca' quedajo ma'le, ca' na Israel llaalqaipi 'ue ma'le ca lqolonaxa quiyim liỹa pilac ỹo'uet ca se ỹa'maxañi 'nejem dajo.

_12-13No'm 'ue ca qara'xaiguelec quena qomyipi sqai huelec ñi qota'olec quenaua na'aate' quená'maq ỹaanema qamiri ñi qara'gaxala', 'xaỹapeguelec quiyim sqai huelec ñi qota'olec, ỹauecauec ca qomyipi, ỹahotaque quiyim nqouagaxainot ca nashiilec nqolac sqai huañiỹapega, ₁₄ca' qamiri ỹaatqajam nataxañii'tegue cá'maq 'neeta dajo. Ca no'm ỹaatqajam 'yiiñita quiyim llic dá'maq qaỹo'ueetetac se no'uen, ₁₅ca ma'le, ca' qaỹalauat ca'maxare, qaỹodoota'a ca lecat, cá'ogue ca qomyipi na'ñi cajo na'a', chaqai ná'ogue na laloipi nimiichiguiñi nqai'ñii, chaqai ná'ogue ná'maq nouenec hueeta'ñi ca'maxare qai'neeta.