Ná'ogue 'ue na lovirqa'
1Quenajo 'laua ná'ogue 'ue na laloqo'; quiyim ỹovirelec canchaqaica, ná'ogue 'ue na lqodoquiaqa'.
2'Ue yí'maq laloqo' quiyim ne'qaañi,
chaqai ca laloqo' quiyim ileu.
'Ue yí'maq laloqo' quiyim nanaxanaxac,
chaqai ca laloqo' quiyim qanapoc ana nanecse.
3'Ue yí'maq laloqo' quiyim nalauataxanaxac,
chaqai ca laloqo' quiyim natarenataxanaxac.
'Ue yí'maq laloqo' quiyim 'ue ca qaỹosogui,
chaqai ca laloqo' quiyim qano'xonshiguim.
4'Ue yi laloqo' quiyim oỹenaxac,
chaqai yi laloqo' quiyim naỹallicyaxac.
'Ue yi laloqo' quiyim 'ue da nasauaxac,
chaqai yi laloqo' quiyim 'ue da naỹaac.
5'Ue yi laloqo' quiyim qaiuagaxat na qa',
chaqai 'ue yi laloqo' quiyim qalapoon.
'Ue yi laloqo' quiyim nqa'aalta',
chaqai 'ue yi laloqo' quiyim nalajta'.
6'Ue yi laloqo' quiyim 'ue ca 'deenaxac,
chaqai 'ue yi laloqo' quiyim 'ue ca qoyique'e.
'Ue yi laloqo' quiyim na'maqataxanaxac,
chaqai 'ue yi laloqo' quiyim 'ue ca qainaxauec.
7'Ue yi laloqo' quiyim 'ue ca qaỹasectaqta'gue,
chaqai 'ue yi laloqo' quiyim 'ue ca qaneuara'gue.
'Ue yi laloqo' quiyim retaqa na qom,
chaqai 'ue yi laloqo' quiyim i'maxañi.
8'Ue yi laloqo' quiyim nqo'data' na qom,
chaqai 'ue yi laloqo' quiyim noquiaata'ta'.
'Ue yi laloqo' quiyim 'ue ca lauataq,
chaqai 'ue yi laloqo' quiyim qaica ca lauataq.
9¿Negue' quet cá'maq chicqaugui nqai'en ca qom quiyim 'xoic ca na'ñaaqataxac? 10Ca' sa'deena'a dá'maq qaillilec na qomyipi quiñi qota'olec quiyim ỹahotaque nemanñi nqai'en queda'maxare. 11Ma' ñi'maxare na' ñaqai chita'gue ỹo'uet, ỹaatqajam lo'yaxanec nqai'en ná'ogue; chaqai illaagui yi la'deenataxanaxac na qom quiyim ỹa'deentapega ná'maq sqaica lqodoc, 'eno'm na qom se ỹovi' quiyim ỹa'den quet da lecaic ñi qota'olec quená'maq lo'ueenatec chaqai quecá'maq ỹo'uet ma'le.
12Ỹim sa'den quiyim dá'maq paguec la'maxa quiyim ỹo'uet ca qom, reualaxaitac chaqai ỹo'uet cá'maq ỹa'maqachiguiñi queda nachaalataxac. 13Ma' no'm squi'ỹaaqatac chaqai ñi'taqatac chaqai sa'ajanqatac ná'maq chicqaugui da qaro'ueenataxanaxac, so'ueetaq, ma' chaqaida dá'maq ỹaanema qomi' ñi qota'olec. 14Chaqai sa'den quiyim ná'ogue ná'maq ỹo'uet ñi qota'olec sqaica ca lqodoc. Ca' qaica quet cá'maq qaỹoqotec chaqai cá'maq qanaqata'a. Ñi qota'olec 'ne'tegue dajo da lo'ueenataxanaxac, qaiyi se qanapacalec ñi'maxare. 15Qaica quet cá'maq 'ue quiyim sqai shi'co' quen 'ue, chaqai qaica quet cá'maq 'ue ma'le quiyim sqai shi'co' quen 'ue. Ñi qota'olec ỹo'uet quiyim ná'maq shi'gue ỹoxe'uegue pilchigui nqai'en quiyim 'ue.
Dá'maq se no'uen queda chaalataxac
16Ỹim seshit seuana ná'ogue quenajo 'laua 'ue na namaanaxanqachic chaqai na se no'uen, ná'maq hua'ñi 'ue quet ca na'maxa chaqai ca 'maqataxac. 17Ca' vichiguiño' shinac ma' ñi qota'olec ñí'maq imit ma'le queca lasauaxaset ca 'maxataxaraic chaqai ca hualoxonaq, ma' quená'ogue 'ue yi laloqo' quená'maq 'ue chaqai quená'maq qaỹo'uet.
18Qai'neeta sa'xat dá'maq na'maqataxac na qom, quiyim ñi qota'olec i'guentac na qomyipi, qaiyi na'maxare retan quiyim na'maxare qai'neeta 'nejem na iseripi. 19Ỹaatqajam lliqueta quiyim na qomyipi dá'ogue da llicyaxac: ná'ogue dá'ogue dá'maq 'neeta ileu, chaqai ná'maq lacat dá'ogue dá'maq no'ueenataxac. Qaica quet cá'maq ỹapacauec ca no'ueenataxac quena qom chaqai quena isecỹac. Qam ná'ogue qaica quet cá'maq 'neeta, 20chaqai cá'ogue cá'maq taỹa'gue; ma' chicqaugui na 'laua, ca ná'ogue pilougui ma'le na 'laua. 21¿Negue' quet cá'maq ishit i'taxajñi quiyim ca la'al na qom taashiguim quena piguim, chaqai ca lqui'i na isecỹac ta'ñigui da pa'aañi quena 'laua? 22Ca' yitan quiyim qaica quet cá'maq paguec loyac quena qom, ta'ta'a quiyim netoonta'gue ná'maq chicqaugui da lo'ueenataxanaxac, ma' chaqaida dá'maq icoñiguit, ma' qaica quet cá'maq iuanaxanaxanegue cá'maq 'neeta quiyim ma' ime ileu.
