Efesios 6

₁Chaqai qamiri ñaaqaipioqui', dá'maq 'neeta ma' mashic coñiguit da na'qaatec, ca na'xaỹaxañiỹalo naua qata'allii, ma' dajo dá'maq ỹaatqajam no'uen. ₂Ma' dá'maq 'auaxaic na'le queso naqataxaquipi chicqo'ot so Moisés quiyim 'ue da qaỹachaxantac 'neetasa': “Se napaquiralec ca qataa'i' chaqai aca qachii'i', ₃qaiyi ỹaatqajam qami' no'uen chaqai ladoc aca rqauaxagui'i' quena 'laua.”

₄Chaqai qamiri ma' qamiri neta'al, sqai 'ooqochichii' caua qachaalaxahi. Ta'ta'a quiyim naquetashi'me' nqai'ñii da no'uen na'deenataxanaxac, paxaguiñita'gue quiyim huelec so qara'gaxala'.

₅Chaqai qamiri nelaatqa na'xaỹaxañiỹa ca na'coori quenajo 'laua, se napaguiỹalec, richilli'a, raqamaxaita, shiquiaxam 'ueenataxañitacot so Cristo.

₆Quiyim 'ueenataxañii, mese repaguitaque quiyim ỹa'ajanta'pe qamiri ca na'coori, qaiyi nqo'talo qamiri. Ta'ta'a quiyim 'ec qamiri lelaatqa so Cristo machiỹauec añi re'taxanatahi quiyim 'viichitac dá'maq ỹahotaque ñi qota'a. ₇Quiyim 'ue ca 'viichii, ca' ỹaatqajam rasapchii'ta 'ec ná'maq quiyim 'ueenataxañitacot so qara'gaxala'. Mesqai 'ec ca qom nqai'ñii ca 'ueenataxañitacot. ₈Ma' mashic 'yiiñii quiyim quiñi 'óna icoñiguit ma'le queso qara'gaxala' cá'maq laseue' cá'maq lo'yaxanec ỹo'uet, na'ac loqo'm se na'ac.

₉Chaqai qamiri ma' qamiri 'cooro', qai'neeta denaxachiichigui dá'maq 'neetari' na relaataxahipi, sqai yiñitalec. Ñaqai 'yiiñi'a quiyim qamiri chaqai na'maxare viito'ot ñi qara'gaxala' ñí'maq neeta'gue da piguim, chaqai quiyim ñi'maxare qaica ca ỹapacqajnauec, ná'ogue naloqojne'ejta'.

₁₀Ca' nagui qamiri ỹaqaỹa', na'ñaxachiỹo', ma' mashic na'yiitau'a so qara'gaxala' quiyim chicqochigui da rquesaxanaxahi dá'maq chalego lquesaxanaxa so'maxare. ₁₁Quepaqataxañiỹalo naua'que nauá'maq ro'goxonqachiri ỹaanema qamiri ñi qota'a, qaiyi ralohita'pegue' na layinaxanaxaquipi so na'ỹaapec. ₁₂Ma' se seloquiaqata'pegue' ca chaqai qom qara'aajshaxaua, ta'ta'a ná'maq lquesaxanaxa se re'xogui na se no'uen hueeto'ot na piguim, ná'maq relaataxanac chaqai 'ue da lquesaxanaxa, chaqai ỹoiquentac ná'maq ñaqai hueetaugui na napalaxa quenajo 'laua. ₁₃Ca vichiguiño' chaqa'ma' ñiiñi naua'que nauá'maq nquepaqataxanqate' quena roshicmaxahi ỹaanema qamiri ñi qota'a, qaiyi shichii nachaachiỹa'guit ca se no'uen ma' novi' quecajo na'xa'a. Ca ma' ime 'ñii'tegue dajo, ca na'ñaxachiñi. ₁₄Ca' ỹaatqajam na'ñaxachichiguiñi, 'ec nosaachitagui dá'maq lliqueta, chaqai quepaqataxañiỹa da 'maxaraic 'ueenataxac, 'nejem nqai'en aca lquepaqataxanqate cana lotogue ca neetaho quena nouaataxanaq. ₁₅Chaqai na'maxachitañi quiyim 'xachii da na'qaatec chicqaugui da na'maxa, 'nejem quena' na'maxajñi ca neetaho quena nouaataxanaq quena' ỹañiñi caua lapelate'. ₁₆Qam quedá'ogue dajo, ca coñiỹa da rpi'ỹaxaguii, 'ec nqai'ñii aca nquepaqataxanqate quiyim ỹo'mat ná'ogue na novic ỹaviquetaugui lahinaxanqate so na'ỹaapec. ₁₇Chaqai da rca'laxahi, 'neetari' nqai'ñii aca nado'ii lquepaxaset na rqahiguii. Chaqai coñiỹa da la'qaatec ñi qota'a, 'nejem nqai'ñii ca lecat ỹaanema qamiri so Espíritu Santo. ₁₈Qam nqouagaxaiñii quiyim 'viichii dá'ogue dajo. Se neme ne'xorishiñitacot ñi qota'a, qam quiichigui nqai'ñii da rashiilaxanaxaguii so Espíritu. Ỹaatqajam nelohitec, qaiyi shichii 'viichii dajo. Se reuallitegueñi, chaqai nqouagaxaiñitalec ná'ogue ná'maq lalamaxaret ñi qota'a. ₁₉Chaqai nqouagaxaiñitalec aỹim qai'neeta, qaiyi ỹa'vii caua ỹa'qaatqa ñi qota'a ma' setaqa, qaiyi ra'ñiigui na iuel quiyim sa'xat dá'maq se re'xogui quedá'maq na'qaatec chicqaugui da nca'laxa. ₂₀Ma' ñi qota'a yila' ma' ỹauaaque aỹim letaxaỹaxanqajnec quiyim sa'xat dajo na'qaatec. Ca' chaqaida dá'maq 'em qaycoñiretari' nagui. Ca' nqouagaxaiñitalec aỹim ma'le, qaiyi se yo'chaalec ma' sa'xat da na'qaatec.

₂₁Ca' ñi Tíquico ñí'maq qanauochaxaua qarqaỹa chaqai qamaxaraic qarotaua queda lo'ueenataxanaxac so qara'gaxala', ñi'maxare ỹa'xat ma'le dá'ogue dá'maq shintari' chaqai quedá'maq so'ueetetac. ₂₂Ca' vichiguiño' selatalo qamiri, qaiyi ñi'maxare ỹa'xatema qamiri dá'maq shinqatari' quenajo. Ca' quedajo, ca ỹa'ñaxate' qamiri ma'le.

₂₃Ca' ñí'maq qota'olec chaqai so qara'gaxala' Jesucristo ỹaanem na qarqaỹaripi da na'maxa chaqai da ne'xorenataxanaxa, liỹaata nqai'en da npi'ỹaxac. ₂₄Ca' ñi qota'a ỹaanem ma'le ca no'uen llicyaxac cá'maq nqo'ta so qara'gaxala' Jesucristo quiyim se ỹoỹoota'a cá'maq lqo'iichi queso'maxare. Ajá'a, ca' chaqaida 'neeta dajo.