Qoỹiriñi so na'qaatec quiyim qaican qohinegue so judioipi
1Ca' chaqaiso sojo na'xa'a, ca' so nashi Asuero ỹaanem aso nashi Ester so lauo' so Amán só'maq npa'guenaxaua na judioipi. Ca' so Mardoqueo quepegue' so nashi, ma' aso Ester shi'co' ra'qaataxanem so nashi quiyim lqaỹa liỹa so'maxare. 2Ca co'na'le, ca' so nashi naqate'e aso lichicshaqate liỹo' icona na'le queso Amán, ca' ỹaanem so Mardoqueo. Ca' aso Ester, ca' ỹano so Mardoqueo quiyim neloxoỹaq quedá'ogue da lesallaxa chicqo'ot so Amán. 3Ime, ca' aso Ester lotqai liỹa retaxaỹa'pegue' so nashi, ca' ỹa'dooto naua le'cootal chaqai no'qaachi'ñiguilo naua nqote' quena lachiripi, ca ne'xoresene'tot so'maxare quiyim nosogoñi so na'qaatec se no'uen ỹiriño' na'le so Amán, qaiyi se ipac nqohin dá'maq shimo' qohine'tegue na judioipi. 4Ca' so nashi ỹaane'oga so lashile' 'oro aso Ester. Ca aso'maxare ne'laxashiguim. Ca' co'na' reloqoto'ot so nashi, 5ca 'naaco':
—Qami' qarashi, no'm 'maxariñite' chaqai quiyim da ỹashiilaxanaxac ỹa'maqachiguiñi, ca no'm chaqaiyi quiyim rqo'chiriua' chaqai yi'xoriñi', ca 'maxaraic queta' vite ca ra'qaachiqui' quiyim qaỹosogui da na'qaatec queso nelaatallipi ila' na'le so Amán hueetalec quiyim qanalauajñi ná'ogue na judioipi quenaua'que naua 'lauari quenauá'maq loqoisa'alo. 6Ma' ¿negue' quet cá'maq shinta'gue quiyim chi ña'ñaxateta'piguit dá'maq se no'uen qaỹahotaque qohine'tegue na iuo' laseripi, chaqai quiyim qaỹahotaque qanalauajñi ná'maq ỹalamaxat ỹaqaỹaripi?
7Ca' so nashi Asuero 'naaco' na'le caso nashi Ester chaqai queso Mardoqueo só'maq judío le'ec:
—Shi'gue saanem ada Ester ñi lauo' so Amán chaqai so'maxare qaicoñitot na lqosot, ca' qaicoñirashiguim, ma' ỹahotaque qanalauajñi na judioipi. 8Nagui, ca' selarelgoto qamiri quiyim 'chiiñi cá'maq chi ra'qaachiguii. 'Viiquiñitac cá'maq 'ñiita'gue paguec 'maxaraic na judioipi, chaqai ¡togoxoilec aca itanaxanqate!
(Ma' aca lere mashic hueetalec da leenaxat ca nashi chaqai qaỹotocqotalec aca letanaxanqate, tot qaishit qaỹosogui.)
9Ca chaqa'ma' qaroỹaxane'oga so leraxanqajanqaipi so nashi, ca mashic ỹovi' veintitres na'xata' quesaua tres shiriguiri quesó'maq shiraigo leenaxat Siván. Ca ná'ogue ná'maq relaataxanlec so Mardoqueo tai'a nqai'en na judioipi, chaqai na lotauaripi na nashillipi neetalgoto naua ciento veintisiete 'lauari, chicqochi'ñi yi 'laua India queda lqodoigue, ỹovira'a yi 'laua Etiopía queda lauashiguim. Qoỹeretalgoto nauá'maq chi la'qaatqa nauá'maq neetalgoto 'lauari, chaqai quena judioipi ana lere qoỹeretalgoto nauá'maq chi la'qaatqa. 10Na nelaatallipi hueetalec da leenaxat so nashi Asuero, ca na' ime quiyim qaỹotogoxolec aso letanaxanqate so nashi, ca' qailategue na lere lo'ollipi quená'maq neetalec na yaqaic shipiguiripi quená'maq chi laloipi so nashi. 11Ca' queso lerellipi hueetalec da la'qaatec so nashi, 'naapega sá'ogue so judioipi neetalgoto naua liỹa' 'lauari, quiyim lapoỹata' quiyim reloquilec dá'maq chi nachaalataxac, ca' ỹalauat ná'ogue na qomyipi chaqai nopoxoỹaxajñi chaqai nomachichiguiñi chaqai icona na louenqaipi ná'maq qomyipi 'ue na lo'goxonaxat quecanchaqaica qom loqo'm ca 'laua nalauate'e', se i'xoren aca 'aalo chaqai ca noctoqui'. 12Dá'ogue dajo qaỹo'uet queca 'oonoqui' na'xa'a quenaua'que naua 'lauari reloqota'alo so nashi Asuero. Só'maq na'xa'a qoỹicagui, chaqaiso so na'xa'a trece quesaua doce shiriguiri queso shiraigo leenaxat Adar. 13Ca ná'maq lerqaipi aso lerellipi qanaqajshiguim, ỹaatqajam nelaataxanaxac nqohin, ca' qaỹa'deenaxanaxanegue na qomyipi quena 'lauari, qaiyi na judioipi na'maxatetañi quecajo na'xa'a quiyim ỹa'ue ca lovi' quena npa'guenaxauaripi. 14Ca co'na' ỹaanec da la'qaatec so nashi, ca chaqa'ma' eec na lere lo'ollipi, taate'ogalo neetalec na laloipi so nashi. Ca' dajo na'qaatec qaiuagaxatec qai'neeta quiyi na'a' lodegaxat Susa.
15Ca' so Mardoqueo co'na' nenoxonec quiñi 'imec lodegaxat, ỹantañi aso nashi lapooto icolaq chaqai lalagaxai, chaqai ỹantañi aso nashi nado'o 'oro chaqai so nepo' lino naueralec da letogaxa. Ca yá'ogue yi na'a' lodegaxat Susa ỹaualqatagui queda netoonaxac. 16Chaqai queso judioipi quesá'ogue 'ec richiguiñi, toonaxac, naỹaac chaqai nemaqajnataxanaxa. 17Chaqai quenaua'que naua 'lauari, na'aateripi chaqai quená'maq ỹovira'a da la'qaatec so nashi, ỹaatqajam 'xoic da netoonaxac na judioipi, ca ỹo'uet na lqui'ỹaxac chaqai na lemaqachic. Chaqai quená'maq qomyipi quiyijo 'laua 'xoico' na nanerougui na judioipi, ma' paguec da lqolonaxa quena judioipi.
