Éxodo 13

₁₇Ca co'na' so Faraón ỹasenec quiyim eec so Israel llaalqaipi, ca' ñi qota'olec sqai que'tegue nqai'en so nayic queetougui yi na'laua so filisteoipi só'maq paguec ỹalamqata, ma' 'neetapigui lauel quiyim so Israel llaalqaipi queta' 'ue canchaqaica, ca' se nalauat. Qaidaata quiyim ỹahotaque pilegue da Egipto. ₁₈Vichiguiño' lepajlec nqai'en da llicyaxac queso nayic quiichigui yi 'laua qaica qom taachigui aso huaaxai leenaxat huaaxai toc.

Ca' so Israel llaalqaipi na' ca'e yi Egipto chaqa'ma' naloqojonchiguiñi, 'ec na nouaataxanaq. ₁₉Ca' so Moisés i'xate' saua lpi'naqa so José, ma' so José 'naaco' na'le queso llaalqaipi so Israel quiyim ỹaan da la'qaatec quiyim qaipacqajanchigui dá'maq la'qaatec: Ỹaatqajam llic quiyim ñi qota'olec ỹotauane' qamiri ma'le, qam ma' ỹovirelec quiyim ipaquichigui dajo, ca' qamiri 'xachii' ma'le naua ipi'naqa.

₂₀Ca' so Israel llaalqaipi na' eec ca'e yi Sucot, ca' lotqai na'ñi yi leenaxat Etam. Yi'maxare taachi'ñi ca ỹovira'a yi 'laua qaica qom. ₂₁Ca' ñi qara'gaxala' liỹaatac so qomyipi quiyi na'xa'a, qam hueetaugui so naueguelec 'aueta'gue dá'maq taata'gue, chaqai quiyi pe, ca' hueetaugui so 'ec norec lauaq, ca' coỹaretalec so'maxare. Ca' vichiguiño' so qomyipi ishit queetagui yi na'xa'a chaqai yi pe. ₂₂Ca' sojo naueguelec chaqai 'neetari' 'aueta'gue dá'maq taata'gue so qomyipi yá'ogue yi na'xa'a. Ca' quiyi pe, ca chaqaiso só'maq 'ec norec lauaq.