So Faraón qaraloqojnaxana caso qo'paq cedro
1Na' ime' saua diez ñaxari chaqai dos shiriguiri, ca' queso liỹa na'xa'a, ca' noviriri' ñi qara'gaxala', ca 'naac caỹim: 2'Ñirac quiñi Faraón, nashi quiyi Egipto, chaqai quiyá'ogue yi lauo':
¿Negue' queto' ca qaraloqojnaxana queda recaiqui'?
3'Ec qami' aca qo'paq ciprés loqo'm aca cedro quiyi Líbano,
chalego loyaague' naua lasote la'altalec nqai'en na 'oochi,
ỹaatqajam ladocai, ca na lo'lo 'ec ỹoviro'ot na naueguelec.
4Na ỹaxat chaqai na huaxaỹaq quena 'laua
rotauañi' queda qachaxataxaqui';
naashiguim ana lachiugue
quená'maq hua'ñi na' qarayañiriñi;
na la'uaxaquipi ỹaquitaxachi'ñot
ná'ogue ana qo'paq quiyi 'laua.
5Ca ma' se ỹouen na huaxaỹaq,
ca' paguec liyic da llaxataxac caná'ogue ana liỹa qo'paq quiyi 'oochi;
dalaxai ana lasote,
ca' nqo'neuec da lecaic.
6Ỹaleque'ejta' na lashic ana qo'oole
ỹa'ue na lco'iichaxaqui cana lasote;
ná'ogue na ỹaleque'ejta' na isecỹac neuec
ne'qaañi na llaalec hueeto'ot ada'maxare.
Quena la'al ishit nca'laxatec
na 'xoic ỹoreta'oguit qomyipi.
7Ỹaatqajam lo'yaxana qo'paq chalego lecaic
ladocai naua lasote,
ma' naua lpa'yii ỹovira'ña na 'xoic huaxaỹaq.
8Qaca aca qo'paq cedro quiyi lanaxanqa' ñi qota'olec
ishit naloqojñiguit aso'maxare;
qaca aca qo'paq pino 'neete'm naua lasote aso'maxare,
qaca aca qo'paq castaño 'nejem quiyim 'xoic aca laue,
qaca aca qo'paq quiyi lanaxanqa' ñi qota'olec
'nejem da loyac.
9Ỹim so'uet quiyim lo'yaxana
chaqai quiyim 'xoic ana lasote;
ana liỹa qo'paq quiyi Edén,
yí'maq lanaxanqa' ñi qota'olec,
ỹaatqajam pa'guenta'a.
10Hua', ca' nagui dajo 'naac ñi qara'gaxala': Dajo qo'paq ỹovira'a quiyim chalego lecaic chaqai da ladogaxa ỹoviro'ot na naueguelec; ma' paguec da lecaic, ca vire'ta, ca' nemaqajan. 11Vichiguiño' ỹim se yqo'ta, ca' saxanegue quiyim qoỹoiquentac queca ỹoqa'a nashi, ca ca'maxare qa'viỹa'gue sauaxat da leualoxonqaishic. 12Ná'maq paguec qa'uaic ỹoqa'a qomyipi ỹouaxanlec, ca chaqaiyi hueeta'ñi nqai'en; ca' ana lasote ma' qac, ca' taalec ana qa' ladocai, ca'megue chaqai ana latogot quena 'laua, chaqai 'eet ná'ogue na ỹoreta'oguit qomyipi hueeto'ot na la'al, ca' no'ueenaxatetañi. 13Ná'ogue na ỹoreta'oguit qo'oollipi nacpegue' neetalec ayi qo'paq hueetañi, chaqai ná'ogue na ỹoreta'oguit iseripi nqa'paxanñi hueeto'oto naua lasote. 14Chaqai tot qaca aca liỹa qo'paq, 'eno'm hueeto'ot ca huaxaỹaq, tot nqo'in da llaxataxa 'nejem aso'maxare. 'Eno'm ỹaatqajam ỹaquiteto'ot, qam se ỹovijshi'ma na naueguelec, chaqai tot ladoc. Ná'ogue taỹa'a quiyim ileu, ca ta'ña yi pa'aañi quena 'laua, ca lapooguit ná'maq mashic hueetañigui ana lahi'.
15Ỹim na'gaxala' shinac: Ma' aca qo'paq ỹoviri'ña yi loiquenatec da nelauaxa, ca' so'uet quiyim rashivigui aca huaaxai chaqai hua'e nqaishin na huaxaỹaq cana lachiugue paguec da lachicoxo. Ca' sauaxat ca'maxare, ca' so'uet quiyim rachico yi 'oochi Líbano chaqai ná'ogue ana qo'paq quena no'ueenaxa neualñi ana laue. 16Ma' soviraxachi'ña yi loiquenatec da nelauaxa, ma' llapooñiguit ná'maq shi'gue ileu, da lelamaxa ma' ỹoviriñi, ca' i'loxol nqai'en na ỹoreta'oguit qomyipi. Ca ná'maq pa'aatañi quena 'laua lo'yigui lauel ana qo'paq quiyi Edén, ná'maq paguec loyac chaqai paguec qaỹocoretalec quiyi 'oochi quiyi Líbano. 17Yi'maxare qai'neeta ta'anquira, 'nejem yi'maxare quiyi loiquenatec da nelauaxa, ca' lapooguit ná'maq ileuaugui so lauataq. Ca ná'maq hueeto'ot na'le so la'al, ca' neuagaxatougui na ỹoreta'oguit qomyipi quena 'laua. 18Ca' qaca aca qo'paq caná'maq naalec yi Edén nalo'guit aso'maxare queda loyac chaqai da ladogaxa; qam qai'neeta ta'anquira, liỹaata'ñi' ana liỹa qo'paq quiyi Edén quiyi noma' pa'aañi quena 'laua ỹalliguiguit na ỹoqa'a qomyipi, ná'maq qomyipi ileuaugui so lauataq.
Ca' aso qo'paq chaqaiñi ñi nashi Faraón chaqai ná'ogue na lauo'. Ỹim na'gaxala', se'taxajñi da ỹa'qaatec.
(32.1—33.20 So nashi quiyi Egipto qaraloqojnaxañigui queso isecỹac lodegaxat. Só'maq na'ñi yi Egipto ỹovira'a yi nelauqa'.)
