Ezequiel 33

₂₁Na' ime' saua once ñaxari, nueve shiriguiri chaqai cinco na'xata' na' qai'xateguelo qomi' da ỹoqa'a 'laua, ca 'ue so ỹale 'eetaxaic chicqa'a yi Jerusalén noviriri', ca' ra'qaataxañiua' quiyim yi'maxare noxonec queso npa'guenaxaua. ₂₂Ca' queso 'auaxaic pe na' saqa' novi' so 'eetaxaic, ca' ñi qara'gaxala' ỹashil-lec aỹim. Ca' queso nete'eta na' novi' so ỹale, ca ñi qara'gaxala' lotqai ỹa'vii ỹa'qaatqa, ca' totqai ỹim moorolec.

₂₃Ñi qara'gaxala' novita ỹim, ca 'naac: ₂₄Na qomyipi neeta'ñi naua na'aate' quena Israel 'ue da le'xoric, 'naiquen: So Abraham 'oonoqui', qam ỹovireta'a quiyim ỹomata'ta' najo 'laua; huose'quet qomi', ma' qomi' 'xoic, sovirqa'a ma'le quiyim qaralamaxaret najo 'laua. ₂₅Ca' nagui qami' 'ñirapega: Da la'qaatec ñi qara'gaxala' 'neetasa': Qamiri 'guiitac na la'at 'ue na leuoripi, shiilaitac na nashiilec nqolaquipi, chaqai lauataxañii, ca ¿'ñiitapega quiyim ralamaxarichii ma'le najo 'laua? ₂₆Ỹaachiỹa quiyim qaica ca 'maxachiỹa'gue, viite'e na ro'goxonaxachii, 'viichitac ná'maq se yqo'ta, ná'ogue nedequentac, qam ¿'ñiitapega ralamaxarichii ma'le najo 'laua?

₂₇Qai'neeta 'ñirapega: Ñi qara'gaxala' 'neetasa' da la'qaatec: Ñallitalta' queda ñachaalataxac quiyim ná'maq neeta'ñi naua na'aate' 'ue da le'xoric qai'neeta qanalauajñi ma'le, chaqai ná'maq neetauec quena no'ueenaxa so'uet quiyim qaito quena isecỹac, chaqai ná'maq neetaho'guelo naua lauaco ana qa' so'uet quiyim ỹalauat na nalolaxa. ₂₈Sco'taxajlec ma'le najo 'laua chaqai so'uet da le'xoric, chaqai ñaqat ma'le dá'maq lquesaxanaxa nemaqajanteguelec. Co'telgoto ma'le naua qa' ladocahi quena Israel; qaica ca quejlgoto ma'le yaua'maxare. ₂₉Ca ma' sco'taxajlec chaqai sa'ue da le'xoric yijo 'laua sauaxat dá'maq se no'uen chaqai se yqo'ta ỹo'ueetetac yi'maxare, ca ma'le, ca' ỹo'leenta'a quiyim ỹim na'gaxala'.