Gálatas 1

₁Ỹim Pablo, ỹim lelaatec so Jesús. Sqaỹim lelaatec chaqai sqaỹim lca'acsec ca chaqai qomyipi; ta'ta'a quiyim chaqaiso so Jesucristo, chaqai ñi qota'olec ñí'maq liỹa nca'laxatec na'le so'maxare queso nelauaxa. ₂Ỹim chaqai ná'ogue na iuoraripi qarqaỹaripi seraxañi anajo qarelaata quiyim tai'a ná'maq mashic icoñiguit da na'qaatec neetalec na 'laua Galacia. ₃Sahotaque quiyim coñiguit da qouagaxa chaqai da na'maxa chicqo'ot ñi qota'olec chaqai so qara'gaxala' Jesucristo, ₄só'maq nañaañiguit na'le da lelauaxa sauaxat naua qarasauaxasete', qaiyi nca'laxaterec qomi' quená'ogue na se no'uen huelec na 'laua. Ca' ipacqajanchigui dá'maq ỹahotaque ñi qota'olec coqomi'. ₅Ca' vichiguiño' ¡se neme quiyim semaqachinqatac ñi qota'a! Ajá'a, ca' chaqaida dá'maq 'neeta dajo.

₆Ỹaatqajam chalego da i'laxa quiyim chita'gue chaqa'ma' sham lachii ñi qota'a, ma' chaqaiñi ñí'maq roỹaxanalo qomi', ỹachigoxochichigui da le'xorenataxanaxa so Cristo coqomi', chaqai quiyim quiita'pegue' dá'maq ỹoqa'a na'qaatec qohinac chicqaugui da nca'laxa. ₇Mesqai llic quiyim 'ue quet ca liỹa na'qaatec chicqaugui quet ca nca'laxa. Dá'maq 'neeta ma' 'vii nauá'maq se ỹaqamaxate' qamiri, ca' ỹahotaque ỹaỹoqojnec dá'maq na'qaatec chicqaugui da nca'laxa chicqo'ot so Cristo. ₈Qam no'm 'ue ca ỹa'xatema qamiri ca ỹoqa'a na'qaatec, quedá'maq na'qaatec chicqaugui da nca'laxa, ca ca'maxare qaỹa'ue ma'le ca ỹaatqajam lodegaxat nouaxanaxaset quiñi qota'a, 'eno'm chaqaỹim loqo'm ca qota'a lelaatec chicqashiguim. ₉Da'maxare shi'gue sa'xatetac caqamiri, qam nagui lotqai liỹa shinac: Chaqai no'm 'ue ca ỹa'xatetac ca na'qaatec 'ec chicqaugui ca nca'laxa, qam ỹoqa'a quedá'maq shi'gue coñiguit, ca' ca'maxare qaỹa'ue ma'le ca chalego lecaic nouaxanaxaset.

₁₀Ca quena' shinac dajo, ca ¿peeta'a chi sahotaque ỹa'maxarenta ỹim na qomyipi, loqo'm ñi qota'a? Loqo'm ¿sahotaque yiuojonta na qomyipi? Ma' quet ñaq sahotaque quiyim ỹa'maxarenta ỹim na qomyipi, ca sqaỹim lelaatec so Cristo.

₁₁Qam qamiri ỹaqaỹa', dajo na'qaatec chicqaugui da nca'laxa, dá'maq sa'xatetac caqamiri, sahotaque quiyim 'yiiñii quiyim mesqai chi la'deenataxanaxac na qomyipi. ₁₂Ma' se sachigoqto'ot ca qom, chaqai mesqaica ca yapaxaguinegue. Ta'ta'a quiyim chaqaiso so Jesucristo ya'deenaxanaxanegue da'maxare.

₁₃Qamiri shi'gue 'xahiteguelec dá'maq shintari' na' ñaqa shiquetalec dá'maq huelec na judioipi. Chaqai 'yiiñii da ỹonogoxonaxac quena' socanaxantapigui na mashic icoñiguit da la'qaatec ñi qota'olec, quiyim sahotaque ñalauajñi. ₁₄Ca quedá'maq queetalec quiyim huelec na judioipi na' ñaq salequetaugui, ca 'xoic ná'maq quena chi ñaloxouaripi quená'maq chi iuo' laseripi ñapacalec, ma' ỹim ná'maq ỹaatqajam sa'maxate' nauá'maq lapaxaguinataxanaxaco so 'auaxaic qareta'allipi. ₁₅Qam ỹimo' lca'acsec ñi qota'a na' saqa' ñi'qaañi, ca quedá'maq chalego lecaic le'xorenataxanaxa, ca' roỹaxañiua'. Ca' chaqaida 'ne'tegue co'na' ỹovita so laloqo', ₁₆ca ỹo'uet quiyim seuana so llaalec, qaiyi sa'xat da na'qaatec chicqaugui da nca'laxa quená'maq mesqai judioipi. Qam cana' 'ue dajo, qaica ca shicpegue' quiyim senat. ₁₇Vire'ta sqa saigue da Jerusalén quiyim ya'ỹa'alo saua 'auaxaqa caỹim lelaatqa so Jesús. Ta'ta'a quiyim se ñaỹaloxoren quiyim saigue da Arabia. Ca na' ime, ca' yapila yi Damasco.

₁₈Ca' sqa saigue da Jerusalén, ta'ta'a na' ime'ueque saua tres ñaxari. Ca na'le, ca seuana so Pedro, ca sento'ot so'maxare quesaua quince na'xata'. ₁₉Qam qaica ca liỹa seuana queso liỹa lelaatqaipi so qara'gaxala', qaisoota so Jacobo só'maq lqaỹa so Jesús. ₂₀Ỹaatqajam se'taxachichiguiñi quiyim ỹaatqajam lliqueta dá'maq seretegueñi caqamiri, chaqai dajo ỹa'deenta ñi qota'a.

₂₁Ca na' ime dajo, ca shicpegue' yi 'laua Siria chaqai yi Cilicia. ₂₂Qam yi qarqaỹaripi, quiyí'maq shi'gue icoñiguit da na'qaatec queso Cristo quená'maq neetalec yi 'laua Judea, saqa' iuanapega aỹim. ₂₃Ta'ta'a quiyim chaqai 'qaateguelco' quen aỹim co'quena' qohinac: “Só'maq ỹale ỹocanta'pe quen qomi' na'le, qam nagui ỹa'xatetac dá'maq leloxoỹaxac da npi'ỹaxac, dá'maq ỹahotaque iuagaxatac quen quesom.” ₂₄Ca' qaimaqachintaco' quen ñi qota'a quedá'maq shintari'.