Saua liỹa' lelaatqa so Jesús ỹa'maxarente' so Pablo
1Ca na' ỹovite' catorce ñaxari, ca lotqai liỹa saigue da Jerusalén, iỹaatac so Bernabé, chaqai sauec so Tito. 2Saigue da'maxare, ma' ñi qota'a ỹa'ue so iuanaxanaxac quiyim saigue da'maxare. Ca na' seueta'ñi yi Jerusalén, ca' 'ue so netaxaỹaxac, qam qaỹoỹooteta'oga quesó'maq mashic qaỹa'yiinchigui na'gaxalateripi. Ca sa'xatema dá'maq 'neeta dá'maq na'qaatec chicqaugui da nca'laxa dá'maq sa'xatetac quena sqai judioipi. Shi'ntegue dajo, ma' se sa'maxaren quiyim sqaica ca 'negue nqohin dá'maq shi'gue so'ueetetac chaqai dá'maq so'ueetetac nagui. 3Qam vire'ta so Tito ma' ñauequeta'pegue' ma' so'maxare sqai judío le'ec, qam qaiyiita sqaica ca qohinapega quiyim qaỹa'ue quet ca netanaxaset na loshicmaxa. 4'Nesa ma' llic ma' 'vii naua sqai ỹaatqajam 'chichiriñi qarqaỹa' nalecqajansauguilo qomi', nañoxotesañi, ca ỹahosaque quiyim qaỹa'ue ca netanec na loshicmaxa. Na'maxare nalecqajno, qam chi na'ajnaxanaripi quiyim ỹa'ajan dá'maq shinqatari' quiyim qaica canchaqaica ma' ña'daqatau'a so Cristo Jesús, ca' ỹahotaque quiyim liỹa ñcoñiraxaguit na nelaataxanaxaquipi. 5Qam qomi' sqaica ma' qolaxa'ueguelo quet saua'maxare, ma' sahoqotaque quiyim qamiri sqai 'xañiuec dá'maq ỹaatqajam llicyaxac dá'maq na'qaatec chicqaugui da nca'laxa.
6Ca' quiyauá'maq qaỹa'yiinchiguilo quiyim na'gaxalate' qaica ca ỹachaxane' dalaxaic napaxaguinataxanaxac caỹim, chaqai aỹim se ya'iitapigui cá'maq re'qoochigui 'neesari' yaua'maxare, ma' ñi qota'a se ra'iitapigui ca re'qoochigui 'ueenataxac. 7Ỹaatqajam ñaqa 'ue quet ca dalaxaic lapaxaguinataxanaxac caỹim. Ta'ta'a quiyim retane' quiyim chaqaiñi ñi qota'a ñí'maq yamaxalec quiyim sa'xat da na'qaatec chicqaugui da nca'laxa quena sqai judioipi, 'nejem da 'neeta queso Pedro quiyim qaỹamaxalec ỹa'xatem da na'qaatec na judioipi. 8Ca chaqaiñiita ñí'maq qota'a ỹo'uet quiyim aỹim nelaatec queso Jesús, qayilarelec na sqai judioipi, 'nejem so Pedro na' qailarelec na judioipi.
9Vichiguiño' saua Jacobo, Pedro, chaqai so Juan, sauá'maq paguec na'gaxalate', ỹa'deenda'a quiyim chaqaiñi ñi qota'a nañaañim dajo no'ueenataxanaxac. Ca necona'guita na'le qomi', ỹim chaqai so Bernabé. Ca' dajo qaneconaxac netanec quiyim chaqai qomi' niỹa', chaqai qaỹa'maxarenta quiyim qomi' so'ueenataxanaxaugui na mesqai judioipi, ca' saua'maxare, ca ro'ueenataxandougui na judioipi. 10Ta'ta'a quiyim qatalo qomi' quiyim se scouaqa'e na 'xoraiquipi, qam dajo chaqaida dá'maq 'xoic iuogoxo quiyim so'uet.
So Pablo ỹoviraqta'a na'le so Pedro quiyi Antioquía
11Qam na' so Pedro quepegue' yi na'a' Antioquía, ca hua'anyi na'le, ca soviraqta'a, ma' ỹaatqajam se ỹa'maxañi dá'maq ỹo'ueetetac. 12Ma' na' ñaqai 'aueta lqui'ỹaxaua quen na sqai judioipi. Qam na' 'vii saua novite' ỹale' lelaatqa so Jacobo, ca' quiyi, ca noỹootec na'le so'maxare, ca tot lqui'ỹaxaua na sqai judioipi, ma' no'cha'a ná'maq ñaqai queetalec quiyim qaỹa'ue na netanaxaset na noshicmaxa. 13Ca só'maq liỹaripi judioipi mashic icoñiguit da na'qaatec que'uegue dá'maq ỹa'deenta se no'uen 'neetari' so Pedro, vire'ta so Bernabé que'uegue dá'maq 'neesari' saua'maxare. 14Qam na' seuanchigui dajo quiyim se nachiñiguit dá'maq ỹaatqajam leloxoỹaxac da na'qaatec chicqaugui da nca'laxa, ca' setaxaỹa'a so Pedro, iuanchigui nqaishin sá'ogue só'maq mashic icoñiguit da na'qaatec. Shinac: “Qami', ma' qami' judío le'ec, qam quesaua liỹa' na'xata' 'ñiisari' ca sqai judío le'ec, ca mesqai 'ñiisari' ca judío le'ec. Qam ¿chi'neco' ma' viisaque quiyim na mesqai judío ỹadenaxat da no'ueenataxac na judioipi?”
Na judioipi 'nejem ná'ogue na liỹa qomyipi ca'lligui da lpi'ỹaxac
15Qomi', qomi' llaalqa na judioipi, chaqai sqai qomi' sauaqhuaqa, sqai shinqata na liỹa ỹoreta'oguit qomyipi. 16Qam qaiyiita sa'deenaq quiyim qaica ca 'oonoqui' qaỹa'maxarenta quiñi qota'a ma' ỹo'ueetetac na naqataxaquipi chicqo'ot na'le so Moisés, ma' qaidaata quiyim qoyiuelec so Jesucristo. Ca vichiguiño' qomi' quiyim seuaqlec so Jesucristo, ca ỹa'maxarente' qomi' ñi qota'a chicqochigui da qarpi'ỹaxac, ca' sqai chicqaugui quiyim qomi' so'ueetqatac na naqataxaquipi. Ma' sqaica cá'maq ỹa'maxarenta ñi qota'a quiyim ỹo'ueetetac na naqataxaquipi.
17Ca' nagui qomi' no'm sahoqotaque quiyim ỹa'maxarente' qomi' ñi qota'a chicqochigui nqai'en so Cristo, ca re'oq quiyim qomi' qai'neete' qomi' sauaqhuaqa, ca ¿peeta'a chaqaiso' só'maq Cristo só'maq ỹo'uet quiyim qomi' sauaqhuaqa? ¡'E', hua'iquet! 18Ma' no'm sosogui ná'maq naqataxaquipi, ime, ca lotqai liỹa ño'xonshiguim, ca' quiyi, ca ỹaatqajam 'ue ca ỹasauaxaset. 19Ma' ỹim 'ec shi'gue yileu, qaiyi sqaỹim lelaatec ná'maq naqataxaquipi chicqo'ot so Moisés. Ma' chaqaiso só'maq naqataxaquipi só'maq ỹo'uet quiyim yileu, qaiyi dá'maq ñachaalataxac taỹot ñi qota'a. 20Ma' ỹim 'eco' shi'gue yileu, iỹaatashiguim so Cristo na' qaipateno. Vichiguiño' ca mese ỹalamaxaret nagui dá'maq santañi ñachaalataxac, ca' chaqaiñi ñí'maq Cristo ñí'maq nachaatetaugui aỹim. Ca dá'maq ñachaalataxac nagui chicqochigui da ipi'ỹaxac queso llaalec ñi qota'a, ma' yi'xoren, ca nañaañiguit da lelauaxa caỹim. 21Ca se sa'maxaren quiyim lliỹoqa'piguit quet dá'maq lqouagaxa ñi qota'a. Ma' quet ishit ca 'óna quiyim qaỹa'maxarenta quiñi qota'a quiyim quiichi'nguilo naua naqataxaco chicqoro'ot so Moisés, ma' queta'le, ca' qaica quet ca 'negue da lelauaxa so Cristo.
