Gálatas 3

₁¡Aicuéra caqamiri Galacia lase', ỹaatqajam qaico' ca ra'deenataxanaxaguii! ¿Nega'ỹo' cá'maq ỹachi'iñi qamiri quiyim sqai viilec dá'maq na'qaatec ỹaatqajam lliqueta? Ma' quesó'maq 'avichiguiñi qara'qaataxanaxac ỹaatqajam sachaxanqa'tema qamiri so Jesucristo na' qaipateno queso qo'paq. ₂Ñigo' ñaqai 'xachiim aỹim nagui cá'maq 'neeta dajo: Na' 'viichitac da naqataxaquipi chicqo'ot so Moisés, ca ¿chicqochiquio' na'le quiyim coñiguit so Espíritu chicqo'ot ñi qota'a? loqo'm ¿chicqochigui na' viilec da na'qaatec 'xahichigui? ₃Ca' ¿chi'negue queta' 'ec tot qaica ca ra'deenataxanaxaguii? ¿Loqo'm 'ñiitapega quiyim quedá'maq chi na'ñaaqataxaguii, ca nalogoñi nqai'ñii dá'maq nachaalataxaguii chicqo'ot so Espíritu? ₄Ca ¿qaico' ca 'negue dá'maq 'em quiyim 'xoic da re'xoriguii? ¡Saxanchi' chaqaiyi quiyim 'ue quet ca 'negue caqamiri! ₅Ñi qota'a na' ỹaanema qamiri so ne'Espíritu, chaqai na' ỹachaxan ná'maq ỹo'uet na ne'laxa huauguilo nqai'ne' qamiri, ca ¿chi'neco' ma' ỹo'uet dajo? Ñi'maxare ỹo'uet, qam sqai chicqaugui quiyim qamiri 'viichitac dá'maq 'naac na naqataxaquipi. Ta'ta'a quiyim viilec dá'maq 'xahichigui na'qaatec.

₆So Abraham ỹaatqajam 'uo' da lpi'ỹaxac quiñi qota'a, ca' quedajo lpi'ỹaxac chicqochigui quiyim ñi qota'a ỹa'maxarenta so'maxare. Ca ỹamata'gue huagaxaraic ỹale. ₇Vichiguiño' 'maxaraic quiyim qamiri 'yiiñii quiyim ná'maq ỹaatqajam llaalqaipi so Abraham, chaqaina ná'maq 'ue na lpi'ỹaxac. ₈Ma' naua naneresañi la'qaatqa ñi qota'a ma' shi'gue idaansa'a dajo quiyim qai'neeta ná'maq sqai judío laseripi, ca' ñi qota'a ỹa'maxarenta ma'le ná'maq 'ue ca lpi'ỹaxac. Ca' naua naneresañi na'qaatqa 'nerac queso Abraham quiyim: “Ná'ogue na ỹoreta'oguit qomyipi 'ue ma'le ca nqouagaxa chicqotougui aqami'.” ₉Ca vichiguiño' cá'maq huelec, ca 'ue da nqouagaxa, 'nejem so Abraham ma' huelec ñi qota'a.

₁₀Ná'maq illiitagui da lpi'ỹaxac ná'maq naqataxaquipi chicqo'ot so Moisés, na'maxare tai'a dá'maq chalego lecaic nouaxanaxaset. Ma' naua naneresañi la'qaatqa ñi qota'a 'nerecsa': “Ná'ogue ná'maq se ipacqajñigui ná'ogue ná'maq naneretalec aso lere naneraxalate na naqataxaquipi, ca na'maxare hueetalec na chalego lecaic nouaxanaxaset quiñi qota'a.” ₁₁Ca ỹaatqajam re'qoota quiyim qaica quet cá'maq qaỹa'maxarenta quiñi qota'a quiyim ỹo'ueetetac dá'maq 'naac na naqataxaquipi. Ma' naua naneresañi na'qaatqa 'neracsa': “Cá'maq ỹa'maxarenta ñi qota'a ca'lligui ma'le da lpi'ỹaxac.” ₁₂Da naqataxaquipi chicqo'ot so Moisés se ỹalecqajno da npi'ỹaxac. Ta'ta'a quiyim 'naac: “Cá'maq ipacqajanchiguilo quiyim ỹo'ueete' naua'que nauajo, ca chicqaugui ma'le ca nachaalataxac.”

₁₃Qam so Cristo quepaqataxanlgoto qomi' quedá'maq chalego lecaic qanouaxanaxaset quet chicqochigui so naqataxaquipi, ma' so'maxare npa'xanguit dá'maq chalego lecaic nouaxanaxaset talgoto quet qomi'. Ma' naua naneresañi na'qaatqa 'neracsa': “Chalego lecaic ca nouaxanaxaset quiñi qota'a ná'ogue ná'maq qaicoñirashiguim queca qo'paq.” ₁₄Ca 'uo' na'le dajo, qaiyi dá'maq lqouagaxa ñi qota'a ỹachaxantac na'le queso Abraham quiyim qoỹaanec quena mesqai judioipi, qam chicqochigui nqohin so Cristo Jesús; qaiyi qomá'ogue seconaxaguit so Espíritu Santo ỹachaxantac na'le ñi qota'a, chicqochigui nqai'en da qarpi'ỹaxac.

₁₅Qamiri ỹaqaỹa', sa'ue da saloqojnaxana chicqochigui nqaishin ca chi na'deenaxac ca chaqai qom, 'neetasa': Ca qom no'm na'deene'e' ca liỹa, ca ỹo'uet aca lere, ca illilec ca na'deenaxac. Ca ma' ime qoỹiriñi, ca' qaica ca ishit quiyim se qaipacqajñigui, chaqai se ishit qanqo'naxatec. ₁₆Qam nagui retañite', ñi qota'a na' 'vii naua ỹachaxanta'pe queso Abraham chaqai queso llaalec, ca' naua nerecse' la'qaatqa ñi'maxare sqai 'nerac: “ca qachaalaxai'pi”, 'ec quiyim 'xoic ca qomyipi 'neetapega. Ta'ta'a quiyim 'naac: “ca qachaalqui'.” Ca' dajo 'oonoqui' cá'maq 'neetapega, ca cá'maq qohintapega chaqaiso so Cristo. ₁₇Ca' quedá'maq shinac 'neetasa': Ñi qota'a na' ỹa'ue so na'deenaxac queso Abraham, ca' ỹaanec da la'qaatec quiyim ipacqajanchigui ma'le. Ca vichiguiño' so naqataxaquipi chicqochigui so Moisés novi' na' ime'ueque saua cuatrocientos treinta ñaxari, qa' tot ishit quiyim ỹosogui sojo 'deenaxac, quiyim se ipacqajñigui quet dá'maq ỹachaxantac na'le ñi qota'a. ₁₈Ma' quetqai dá'maq lame ñi qota'a chicqochigui nqai'en da naqataxaquipi chicqo'ot so Moisés, ca' totqaida quet dá'maq qaỹachaxantac. Qam dá'maq 'neeta quiyim ñi qota'a ỹachaxantac dajo queso Abraham, qam qaca aca laseuete nqai'en.

₁₉Ca ¿nega'ỹo' cá'maq 'negue ná'maq naqataxaquipi chicqo'ot so Moisés? Qaỹoqoto' na'le, ma' qaỹahotaque quiyim ichoxot na nasauaxaseteripi. Ca ro'ueenataxan na'maxare, qam lqodoquiaqa' ma'le ma' novi' cajo ñaalec cá'maq 'em 'ue da qaỹachaxantac. Na naqataxaquipi na' qaỹa'xat, ca chicqochigui nqohin na nelaatqaipi piguim laseripi. Ca' so Moisés, ca' chi netaxaỹaxanqajnec. ₂₀Qam se qaipacaque ca netaxaỹaxanqajnec quena' qana'deena'pegue' ca 'oonoqui' qom. Ma' ñi qota'a qaiñiita 'oonoqui'.

₂₁Ca dá'maq naqataxaquipi chicqo'ot so Moisés, ca ¿npa'guenaxauo' dá'maq ỹachaxantac na'le ñi qota'a? 'E', mesqaida. Ma' quet qoỹaaneco' na'le ca naqataxac quiyim ca'laqataxan, ca' qaishit queta'le quiyim 'ue ca qaỹa'maxarenta quiñi qota'a quiyim ỹo'uet cajo naqataxac. ₂₂Qam nauá'maq naneresañi la'qaatqa ñi qota'a 'neracsa': ná'ogue na qom ncoñiiteguesec quena nasauaxaset. Ca' dajo 'neeta, ca' qaiyi quená'maq huelec, ca' ishit icoñiguit cá'maq ỹachaxantac ñi qota'a, chicqochigui nqai'en quiyim 'ue da lpi'ỹaxac queso Jesucristo.

₂₃Na' saqa' novi' da npi'ỹaxac, ca' na naqataxaquipi qarcoñiretari', nauaanta'a quiyim qaichoxot quiyim qaipi'ỹa'a so Jesucristo. ₂₄Ca ná'maq naqataxaquipi pa'aalgoto qomi' quiyim reloxoỹa'alo qomi', 'neeta'guelo qomi' ca ñaaqolqai'. Ca' qarapaxaguin, toco' ma' novi' so Cristo, ca' ma' seuaxalec so'maxare, ca' qaỹa'maxarente' qomi' quiñi qota'a. ₂₅Ca' nagui mashic novi' da npi'ỹaxac, ca tot reloxaỹa'alo qomi' na naqataxaquipi ma' 'ec ca napaxaguinataxanaq.

₂₆Ma' queda npi'ỹaxac, ca qamiá'ogue qamiri llaalqa ñi qota'a, ma' na'yiitau'a so Cristo Jesús. ₂₇Qamiá'ogue ma' noxoñiu'a quiyim na'yiitau'a so Cristo na' qanachilaxane' qamiri, ca' quiyi, ca qoỹanaxanguilo qamiri dá'maq no'ueenataxac so'maxare, 'nejem nqohin ca re'qoochigui nooỹac. ₂₈Ca' tot qaica quet cá'maq ỹoqa'a ca no'ueenataxac quena judío loqo'm quena sqai judío, loqo'm nelaatec loqo'm ca se nelaatec, loqo'm ca ỹale loqo'm aca 'aalo; ma' no'm na'yiitau'a so Cristo Jesús, ca' qamiá'ogue 'ec qamiri 'oonoqui'. ₂₉Ca no'm qamiri lalamaxarete' so Cristo, ca' qamiri lalamaxarete' llaalqa so Abraham. Ca' coñiguit ma'le quiyim ralamaxarichii cá'maq ỹachaxantac ñi qota'a.